JK atoa rambirambi kwa kifo cha Addah Sykes

Rais wa Jamhuri ya Muungano wa Tanzania, Mhe. Jakaya Mrisho Kikwete ametuma salamu za rambirambi kwa wanafamilia ya Mzee Ally Sykes kufuatia kifo cha mpendwa wao, Bwana Addah Sykes, kilichotokea Dar es Salaam mwishoni mwa wiki.

Bwana Addah Sykes alifariki dunia Ijumaa, Julai 2, 2010, kwenye Hospitali ya Kijitonyama, Dar es Salaam na kuzikwa kwenye makaburi ya Kinondoni jana, Jumapili, Julai 4, 2010.

Katika salamu zake kwa wanafamilia hao, Rais Kikwete amesema kuwa ameguswa sana na kifo cha Bwana Addah Sykes akifafanua, “Nimepokea kwa mshutuko mkubwa na huzuni nyingi habari za kifo na msiba wa Bwana Addah Sykes. Napenda kwa dhati ya moyo wangu kuwatumieni nyote wanafamilia ya Mzee Sykes salamu zangu za rambirambi kutoka moyoni kutokana na msiba huo.”

Ameongeza Rais Kikwete katika salamu zake za rambirambi: “Msiba wenu ni msiba wetu. Namwomba Mwenyezi Mungu awapeni nguvu na subira ili muweze kuvuka katika kipindi hiki kigumu cha majonzi makubwa ya kupotelewa na mpendwa wenu.”

Imetolewa na:
Kurugenzi ya Mawasiliano ya Rais,
Ikulu,
DAR ES SALAAM.
05 Julai, 2010