mdau alia na sakata la upimaji viwanja

Salaam,

Nakupongeza kwa kazi nzuri sana. Kuna hili jambo nimelifuatilia kwa karibu nikaona hakuna njia muafaka ya kulifikisha kwa wahusika isipokuwa kupitia blog ya jamii. Maana nimejaribu kuwaona mpaka Viongozi wakuu wa Wizara husika lakini sikufanikiwa. 

Suala lenyewe ni hili. Wizara ya Ardhi chini ya Katibu Mkuu mama Sijaona ilianzisha mradi wa kupima Viwanja katika Jiji la Dar, maarufu kama Mradi wa Viwanja 20,000. Nadiriki kusema pamoja na matatizo madogo ya hapa na pale mradi ule ulifanikiwa sana. Nia ilikuwa kupunguza makazi holela (Skwata).

Baada ya hapo Wizara ikalishusha hilo jambo katika Halmashauri za Manispaa, Miji na Wilaya. Tunaita 'ku-decentralize'. Mpaka ninapoandika waraka huu, hakuna katika Manispaa tatu za Jiji la Dar ambayo imeweza kufanikiwa kupima na kugawa japo viwanja elfu moja. 

Na mpango wenyewe uko hivi, Wizara 'inazikopesha' Manispaa fedha kwa ajili ya kutwaa, (kuchukua maeneo ya watu na kuwalipa fidia) kupima na kuuza, baada ya hapo fedha zinarudi Wizarani. Manispaa inapata faida, wananchi wanapata viwanja vilivyopimwa-Surveyed plots. Huo mfuko unaitwa Revolving Fund. Sasa kuna mengi yamejitokeza

1. Uvamizi katika maeneo ya ukanda wa kijani ‘Green belt’

Watendaji wa Manispaa wamewauzia wananchi maeneo ya ukanda wa kijani 'Greenbelt' kiasi kwamba ile mantiki hasa ya kupima maeneo ili kupunguza Skwata imekuwa haina mantiki tena. Ukiwaambia Manispaa,hakuna hatua wanazochukua,Mimi Binafsi nimemueleza Meya wa Manispaa ya Ilala ana kwa ana. Akaahid kuchuku hatua, lakini nadhani ni ahadi tu.

2. Uvamizi wa maeneo ya wazi,viwanja vya michezo na huduma za jamii.

Katika maeneo mengi ya Mradi wa viwanja 20,000, Wizara ilifanya kazi nzuri sana, ilifanya kitaalam haswa,ikatenga maeneo kulingana na matumizi na mahitaji. Jambo la kusikitisha maeneo hayo pia yanavamiwa na wanaoongoza kufanya hivyo ni watendaji wa Manispaa, Wizara ukiwaambia wanasema kuwa wao ni wasimamizi wa Sera, hilo la kulinda maeneo ni la Manispaa. Nikawauliza hata kama ni Sera, mbona nimemsikia Mhe Rais akisema Dodoma 'I want to you guys out there on the field' je hamuwezi kufika mkakagua maeneo na kutoa maagizo,makaripio au onyo?

Pendekezo

Kwa uzoefu wangu,maana nilishiriki uzinduzi wa Mradi wa Viwanja 20,000 pale Temeke (Tuangoma), na pia nilishiriki kutatua baadhi ya migogoro iliyojitokeza kama vile baadhi ya watu wasiostahili kulipwa fidia nk. 

Nimeshuhudia kwa ukaribu kabisa kuwa Mradi wa Viwanja elf tatu (3000) katika Manispaa ya Ilala umechukua miaka zaidi ya mitatu haujakamilika,na hata juzi hapa walipotaka kuuza viwanja hivyo wameishia kugawa (kuuza fomu) kwa shilingi elf ishirini (20,000/=) na mpaka leo hakuna kinachoendelea maana wao, wametwaa maeneo,hawakulipa fidia wenye maeneo,wakapima wakataka kuuza,wenye nacho wakaja juu (kumbuka kuwa mwongozo unasema unatwaa eneo,unalipa fidia,unapima ndo unauza)wao wametaka kuuza maeneo bila kuwalipa wamiliki wa awali fidia.

Kadhalika Manispaa ya Temeke, juzi kwa mbwembwe wakatangaza kuwa watauza viwanja,wananchi wakaminika kuchukua fomu na kulipia, wakaishia kutoa fomu mia nane tu (800), na hata hilo zoezi nina mashaka. Manispaa ya Kinondoni, mara mbili mwaka jana na juzi waliuza fomu,mpaka leo uliza kama wananchi walipata hivyo viwanja. Ndio maana nasema

Serikali inaweza ku-decentralize mambo mengi lakini kwa hili na hasa kwa Jiji la Dar imethibitika kuwa Manispaa zetu haziwezi. Hivyo basi Wizara ya Ardhi na Maendeleo ya Makazi ichukue tena jukumu hili kama ilivyokuwa kwa Mradi wa Viwanja 20,000. Madiwani na Manispaa watapiga sana kelele, maana itakuwa ni kuwaondolea ‘ulaji’ lakini linapokuja suala la Maendeleo ya watu,acha wachache wapige kelele,wengi wanufaike.

Mtu ni Utu-Tanzania yenye Neema Inawezekana.

Mdau wa Maendeleo ya kweli.