tanzania na marekani damu damu

Mwakilishi wa Biashara wa Marekani duniani, Balozi Ron Kirk amesema kuwa hakuna nchi yoyote katika Afrika ambako kwa sasa Marekani inawekeza muda wake na raslimali nyingi zaidi kuliko Tanzania.

Mwakilishi huyo amesema kuwa mwelekeo huo wa Marekani unatokana na ukweli kuwa Tanzania ni nchi nzuri, tulivu na salama kwa makampuni na taasisi za kibiashara za Marekani kufanya biashara.

Aidha, Balozi Kirk amesema kuwa Tanzania ina nafasi kubwa ya kupata mafanikio makubwa zaidi katika miaka ya karibuni na kuwa Marekani inataka kuwa sehemu ya mafanikio hayo.

Balozi Kirk ameyaeleza hayo  wakati alipokutana na kufanya mazungumzo na Rais wa Jamhuri ya Muungano wa Tanzania, Mheshimiwa Jakaya Mrisho Kikwete, Ikulu, Dar es Salaam.

Balozi Kirk amemwambia Rais Kikwete kuwa Marekani inafurahia kwa kiwango kikubwa kiwango cha juu cha ushirikiano na uhusiano wake na Tanzania na inapenda kuona ushirikiano na uhusiano huo unakuwa kwa kasi zaidi na haraka zaidi.

“Marekani inafurahia sana uhusiano na ushirikiano wake na Tanzania. Hakuna nchini nyingine yoyote katika Afrika ambako Marekani inawekeza muda wake na raslimali zake kuliko Tanzania kwa sasa kwa sababu Tanzania ni nchi nzuri kufanya nayo biashara na ushirikiano wa kiuchumi,” amesema Balozi Kirk.

Miongoni mwa maeneo makubwa ya ushirikiano ambako Marekani inaisaidia Tanzania ni kwenye sekta ya kilimo ambako Marekani inasaidia mradi wa uzalishaji chakula wa Feed the Future. Tanzania ni moja ya nchi nne katika Afrika ambazo zimechaguliwa na Marekani kusaidiwa katika mradi huo.

Maeneo mengine ni miradi mikubwa ya MCC katika miundombinu ya umeme, viwanja vya ndege, maji na barabara iliyoanza kutekelezwa kati ya mwaka jana na mwaka huu, miradi mikubwa ya sekta ya afya ya PEPFAR na PMI ya kupambana na magonjwa ya ukimwi na malaria. Tanzania pia ni moja ya nchi zinazonufaika na fursa za AGOA.

Amesema Balozi Kirk: “Sisi katika Marekani tunataka kuwa sehemu ya mafanikio haya ya Tanzania.  Tunataka kusaidia kutengeneza nafasi nyingi za kazi, tunataka kuona uwekezaji mkubwa zaidi katika uchumi wa Tanzania, tunataka kuona makampuni mengi na makubwa ya Marekani yakifanya biashara na kusaidia kukua kwa uchumi wa nchi hii.”

Naye Rais Kikwete ameishukuru Marekani kwa misaada yake ya maendeleo na imani kubwa ambayo nchi hiyo inaonyesha kwa Tanzania na katika maendeleo yake na kumweleza Balozi Kirk kuhusu sekta na maeneo ambako makampuni ya Marekani yanaweza kuwekeza.

Maeneo hayo ni pamoja na utalii hasa katika ujenzi wa hoteli za daraja ya kati, sekta ya madini, sekta ya kilimo, miundombinu hasa ujenzi wa Reli ya Kati na uzalishaji.