BREAKING NYUZZZZZ........: JK ANA KWA ANA NA DKT SLAA WAKATI CHADEMA WALIPOTINGA TENA IKULU USIKU HUU KUJADILI MCHAKATO WA KATIBA, AKUTANA PIA NA VIONGOZI WA NCCR-MAGEUZI

Rais Jakaya Kikwete akimkaribisha Ikulu Katibu Mkuu wa CHADEMA Dkt Wilbroad Slaa usiku huu pamoja na viongozi wengine wa chama hicho katika muendelezo wa mazungumzo yao na serikali juu ya mchakato wa kuundwa katiba mpya. Viongozi hao wa CHADEMA walitinga Ikulu milango ya saa kumi na mbili unusu za jioni, na wakaendelea na mazungumzo hadi saa tatu  usiku walipogawanyika kila kundi kwa mijadala ya ndani kabla ya kuendelea tena. Mkutano huu umemalizika saa Tano na robo usiku huu huku kila upande ukikubaliana na mwingine kuendelea kutafakari vipengele kadhaa vya kufanyiwa marekebisho ili mchakato utapoanza rasmi kusiwe na malalamiko ya aina yoyote yale 

Rais Jakaya Kikwete akiukaribisha Uongozi wa Chama cha Demokrasia na Maendeleo (CHADEMA) usiku huu Ikulu jijini Dar es salaam.

Katibu Mkuu wa Chama cha Demokrasia na Maendeleo (CHADEMA),Dkt. Wilbrod Slaa (kushoto) akifafanua jambo kwa Rais Jakaya Kikwete kuhusu mchakato wa Katiba Mpya ikulu Jijini Dar es Salaam leo.Katikati ni Mwenyekiti wa Chama hicho,Mh. Freeman Mbowe.

Chama Cha National Convention for Construction and Reform-Mageuzi (NCCR-Mageuzi) kimempongeza Rais Jakaya Mrisho Kikwete kwa kusimamia suala la Katiba vizuri na kwa umakini mkubwa.
Mwenyekiti wa NCCR-Mageuzi Bwana James Mbatia ametoa pongezi hizo leo jioni alipofika Ikulu, akiongoza ujumbe wa viongozi wenzake sita(6), kuja kujadili suala la Katiba Mpya ya Tanzania.
"Tunakupongeza kwa kusimammia suala la Katiba vizuri, ni suala zito ambalo litatupa uhai vizazi na vizazi vijavyo". Amesema kama utangulizi wa ujio wao Ikulu.
"Upinzani sio uadui, tunahitaji kufanya marekebisho ya Katiba kwa amani na hoja bila kuvuruga amani yetu” Bwana Mbatia amesema na kuongeza kuwa “suala la Katiba linahitaji ushirikiano wa pamoja kwa nia njema, kwani taifa hili ni letu sote" ameeleza.
Akiwakilisha hoja ya NCCR-Mageuzi kwa Rais Kikwete, Mkuu wa Idara ya Sheria wa NCCR-Mageuzi Dkt. Senkondo Mvungi amesema, NCCR - Mageuzi inatambua ukubwa wa jambo hili la wa Tanzania kupata Katiba.
"Ni jambo kubwa sana, wewe ndiyo Rais wa kwanza kutengeneza sheria ya kupata katiba mpya na kuanzisha Mchakato wa kupata Katiba Mpya.
Kikao cha leo cha Rais na viongozi wa NCCR-Mageuzi ni mwendelezo wa jitihada za Rais Kikwete, kusikiliza, kuchukua maoni na mawazo ya wadau mbalimbali kutoka vyama vya siasa, asasi za kijamii na makundi mbalimbali katika kuelekea mchakato wa kupata Katiba Mpya ya Tanzania.


Rais amesema kuwa nchi hii inayo Katiba ambayo imelilea vizuri na kulifikisha Taifa la Tanzania hapa lilipo, lakini pia Taifa linahitaji Katiba inayoendana na wakati na itakayoweza kulilea Taifa hili kwa miaka mingi ijayo.
Mara baada ya kumaliza kikao na viongozi wa NCCR-Mageuzi, Rais Kikwete amekutana na kufanya mazungumzo na viongozi wa Chama Cha Demokrasia na Maendeleo (CHADEMA) ikiwa ni mwendelezo wa mazungumzo yao yalioanza mwishoni mwa mwezi Novemba mwaka 2011, kuhusu Katiba Mpya ya Tanzania.
Katika mazungumzo haya na Vyama vya Siasa Rais amesisitiza kuwa lengo la mazungumzo haya yote ni kuhakikisha kuwa hatimaye Watanzania wote watakiri kuwa Katiba Mpya ni yao wote na hatimaye ifikapo mwaka 2015 nchi iweze kufanya uchaguzi wake na Katiba Mpya.


Kwa picha zaidi BOFYA HAPA