MEYA WA JIJI LA ARUSHA NA BAADHI YA MADIWANI WAKE WAMSHUKIA LEMA

Meya wa jiji la Arusha,Gaudence Lyimo

Na Mary Ayo,Arusha

MEYA wa jiji la Arusha,Gaudence Lyimo akiungana na baadhi ya madiwani jijini humo wamemshukia mbunge wa jimbo la Arusha mjini,Godbless Lema kwa kumtaka aache tabia ya kupinga kila jambo la maendeleo wakati akiwa vijiweni na kumtaka mbunge huyo awasilishe malalamiko yake kwenye vikao.

Hatua hiyo inafuatia baada ya hivi karibuni mbunge huyo kupinga mradi wa kisasa wa uboreshaji wa mji wa Kaloleni kwa madai kuwa una harufu ya rushwa huku akitabiri hali ya machafuko katika jiji la Arusha endapo halmashauri ya jiji ikithubutu kutekeleza mradi huo.

Lema,alikaririwa na baadhi ya vyombo vya habari hivi karibuni akipinga kwa nguvu zote utekelezaji wa mradi huo hususani kitendo cha kuwahamisha baadhi ya wakazi wa eneo la Kaloleni watakaolazimika kuupisha mradi huo mara utakapo anza .

Akizungumza na waandishi wa habari jana ofisini kwake meya wa jiji hilo,Gaudence Lyimo alimtaka mbunge kuachana na tabia ya kupinga kila jambo la maendeleo katika jiji la Arusha kupitia mitaani na kumtaka ayawasilishe malalamiko yake kwenye vikao husika

“Ni vyema tumeona tumshauri mwenzetu kwanza ashiriki kwenye vikao vya baraza la madiwani ili ajue kinachoendelea,lakini siyo kukurupuka kwenye vijiwe kueneza siasa badala ya maendeleo”alisema Lyimo

Hatahivyo,meya huyo alisema kuwa ni vyema wakashirikiana kwa pamoja ili kurekebisha jiji la Arusha kwani mambo mengi hufanyika katika jiji hilo na nivyema likawekwa katika jiji la kisasa ili kuendana na hadhi ya jiji kama yalivyo majiji mengine mashuhuri

Hatahivyo,alifafanua ya kwamba lengo la utekelezaji wa mradi huo ni kupunguza kero katika jiji la Arusha,kukuza ajira,uchumi , kuondoa makazi holela sanjari na kuufanya mji wa Arusha kuwa wa kuvutia zaidi huku ajira zikiwa lukuki kwa vijana ambao hadi leo hawana ajira.

"Elimu kwa Wananchi ni muhimu ili kuweza kuwaelimisha kuhusu miradi mbalimbali ambayo inaendelea kwani sisi kama Halmashauri hatuwezi kufanya lolote bila kuwashirikisha wananchi kwani na wao wanamchango mkubwa sana"alisisitiza Lyimo

Alifafanua kuwa uongozi wa halmashauri hiyo bado haujaingia mkataba na mwekezaji yoyote katika mradi huo na kinachofanyika kwa sasa ni hatua ya awali ya kuusoma mradi huo ambapo mwisho wake watakwenda kuzungumza na wakazi wa eneo husika kujua nini cha kufanya.

“Hatujampa mwarabu,hatujaingia mkataba wowote bado tuko katika hatua za awali kabisa za kuusoma mradi wenyewe kama una manufaa au la na mwisho wa siku ni lazima twende tukazungumze na wakazi wa Kaloleni na mwisho wa siku hakuna atakayehamishwa kinyemela bila kujua anakwenda wapi kama atalazimika kuondoka’alisisitiza Lyimo.

Kwa upande wake diwani wa kata ya Sokon I,Michael Kivuyo(TLP) pamoja na diwani wa kata ya Baraa,Loota Laiser (CCM) walimtuhumu, Lema kwamba amekuwa akipinga kila jambo la maendeleo katika maeneo ambayo hayastahili kulalamika.

Walidai ya kwamba wakazi wa Arusha hawahitaji siasa za vijiweni na badala yake walimshauri mbunge huyo kujenga desturi ya kuhudhuria vikao husika na kisha kuwasilisha malalamiko na kero mbalimbali zinazomkera.