KILIO CHA WANA-KAHAMA KWA MKURUGENZI WA HALMASHAURI HIYOO

Kwanza kabisa tunachukua fursa hii kukupongeza kwa kazi nzuri unayoifanya ambayo kwa kweli ni ukombozi tosha kwa jamii. Hii ni mara yetu ya kwanza kujitokeza katika blogu yako tukitoa malalamiko yetu, tunaamini kabisa hii ndiyo njia sahihi kwetu wanyonge kuweza kufikisha kilio chetu sehemu husika.

Ni matumaini yetu kuwa wewe ukiwa ni mdau muhimu sana katika suala zima la maendeleo nchini hapa, basi kwa hakika kilio hiki kitasikika na hivyo wanyonge tutakomboka. Tunakuomba sana mdau kero hii itoke hewani ili wote wanaojihusisha na vitendo vya dhulma, unyanyasaji na uchafu mwingine waweze kuona na kwa hakika iwe ni funzo kwao na kupelekea kukomesha mara moja vitendo vyote vilivyokinyume na maadili halisi ya Mtanzania.

Tumeamua kumuandikia barua ya wazi Mkurugenzi wa Halmashauri ya Wilaya Kahama kupitia blogu hii adhimu kabisa na inayotembelewa na wengi ili ajionee madudu yanayofanywa na watendaji waliochini yake hivyo kupelekea kuboronga kwa halmashauri yako na kuleta chuki dhidi ya uongozi wake kwasababu ya uzembe wa watu wasiopenda maendeleo.

Chondechonde mdau, tunakuomba uweke hewani ujumbe huu, tunaamini utawafikia walengwa na kuleta tija katika suala zima la maendeleo wilayani kwetu.

Kilio chetu sisi wanyonge tunakielekeza kwako Mkurugenzi wa Halmashauri ya Wilaya Kahama nacho ni juu ya huyu Mhandisi wa Halmashauri yetu ya Wilaya Kahama, Mhandisi Kalokola, kwakweli tumesikitishwa sana na vitendo ambavyo anatufanyia sisi wanyonge, na tutaendelea kusikitika mpaka hapo tutakapoona hatua stahiki zinachukuliwa dhidi yake.

Mhandisi Kalokola ameagiza kujengwa madaraja kuelekeza katika maeneo yetu na kuona hiyo haitoshi kaagiza kubomolewa kwa uzio (boma) ambalo limejengwa kwa lengo la kuzuia maji, hivyo baada ya boma hilo kubomolewa kumesababisha maji kuingia katika eneo hilo na kutusababishia hasara kubwa kwa kulowesha mali yote ambayo sisi tunahifadhi katika eneo hilo.

Wakati tupo hapo katika eneo la tukio tukijaribu kutafakari juu ya hasara tuliyoipata kwa kuloweshewa bidhaa zetu, Mhandisi Kalokola alifika eneo hilo na kutoa lugha ambayo kwa kweli ilituchafua sana na kutuchanganya zaidi. Kwa kifupi kauli ya Mhandisi imetuletea mfadhaiko mkubwa na ndiyo maana tumeona ni vyema tumshitaki kwako ili uweze kumchukulia hatua. Alisema tukizidi kumfuatilia kujua haki yetu atatufutia viwanja vyetu na alidiriki kusema kuwa hatuwezi kumfanya lolote.

Kwa kweli kauli hiyo imetusitua sana, sijui jeuri hiyo kaitowa wapi huyu Mhandisi.

Nakuomba Mkurugenzi wa Halmashauri ya Wilaya Kahama ujaribu kufuatilia nyendo za huyu Mhandisi wako na vitendo vya unyanyasaji anavyovifanya kwetu wanyonge na ikibidi umhamishe maana sisi wananchi tumechoshwa na vitendo vyake, kila kukicha watu wanamlalamikia yeye, kwakifupi Mhandisi Kalokola hatufai.

Wanakahama -Kwa pamoja tuijenge Wilaya yetu.

Wapendahaki/ Wanyonge

S.L.P

Kahama.

Mpendahaki66@gmail.com