Tanesco yaendelea na Zoezi lake la Kukamata wanaoiba Umeme jijini Dar

Na Said Powa,Globu ya Jamii - Dar es Salaam

ZOEZI la kukata umeme na kukamata wezi wa umeme kanda ya Tanesco Temeke Liliendelea jana ambapo watu wanne wameshikiliwana na Jeshi la polisi kwa tuhuma za wizi wa umeme kwa mfumo wa kuchezea mita.

Akizngumza kwenye operesheni hiyo Meneja wa kanda hiyo Richarld Mallamia, ambaye ndiye aneongoza zoezi hilo la nyumba hadi nyumba alisema, zoezi hilo ni endelevu kutokana na watu kujenga mazoea ya kuiba umeme kwa kuwatafuta vishoka ambao uharibu mita ili zisisome na kuiba umeme.

Kwenye zoezi hilo ambalo jana lilifanyika eneo la Mbagala Rangi tatu nyumba moja ilikutwa tangu imeunganishwa umeme wa luku kwa zaidi ya miaka 10 lakini umeme waliotumia kwa kipindi chote hicho haujafika unit 1000 kiwango ambacho watu wakawaida hutumia kwa mwezi mmoja tu.

Akifafanua hali hiyo kitaalamu Mkaguzi wa umeme wa kanda ya Dar es Salaam na Pwani Elia Shimwela, alisema kiwango kinachoibwa kwenye nyumba hiyo ni kikubwa hasa ukizingatia kuna vifaa vingi vinavyotumia umeme.

“Hawa wananunua umeme kama geresha tu ili mfumo wa Tanesco uonekane kama ni wananunua umeme kwa kiwango cha chini lakini kimsingi umeme wanaotumia wote wanaiba tu, kwahiyo wateja wanamna hii tunawachukua na kuwafungulia mashtaka ya wizi mahakamani,” Alisema Shimwela.

Hadi jana wateja wote ambao wanatarajiwa kupandishwa kizimbani wamefikia 17 ambapo imeelezwa muda wowote zitakapokamilika taratibu za mashtaka watapandishwa kizimbani.

Katika hatua nyingine mmoja wamiliki wa Jengo la Ghorofa mbagala Rangi tatu nyumba yake imekutwa imeunganishwa umeme kwa mfumo wa wizi huku akiwa na vifaa vingi vinavyotumia umeme hali iliyowastua wakaguzi hao na kusababisha kumchukua aliyechiwa kusimamia jengo hilo hadi atakapo kwenda mwenyewe kwenye kituo cha Polisi Kilwa Road.

Wizi wa umeme kwenye kanda hiyo umekua ukisababisha hasara ya Tsh89 Millioni ila mwezi.