Serikali yatoa picha Rasmi ya Rais wa Awamu ya Tano Dkt. John Pombe Joseph Magufuli

 Kaimu Mkurugenzi Idara ya Habari Maelezo Bi Zamaradi Kawawa (kushoto) na Mkurugenzi Msaidizi wa Idara hiyo Bw. Raphael Hokororo, wakionesha kwa  waandishi wa Habari  picha rasmi ya Rais wa Jamhuri ya Muungano wa Tanzania Mh. Dkt John Pombe Joseph Magufuli leo Ijumaa January 8, 2016. Picha hiyo inauzwa kwa sh. 15,000/- tu.

Kaimu Mkurugenzi wa Idara ya Habari MAELEZO Bi Zamaradi Kawawa akionesha kwa msisitizo  Picha rasmi  ya Rais wa Jamhuri ya Muungano wa Tanzania Mh. Dkt John Pombe Joseph Magufuli wakati wa mkutano na Vyombo vya habari leo Jijini Dar es salaam.

Na Zainabu Hamis, Globu ya Jamii.

PICHA Rasmi ya Rais wa Jamuhuri ya Muungano wa Tanzania Mhe.John Pombe Joseph Magufuri imetoka leo Januari 8, 2015 katika Ofisi ya Idara ya Habari  (MAELEZO)  jijini Dar es Salaam.

Akizungumza na Waandishi wa Habari, Kaimu Mkurugenzi  wa Idara hiyo Bi. Zamaradi Kawawa, amesema kuwa Picha hiyo ya Rais Magufuri  kwa kila moja itauzwa kwa sh15000/- ya Kitanzania bila ya kuwekwa frem, huku picha ya Baba wa Taifa Mwalimu Julius Nyerere  itauzwa kwa  sh 5000/-.

Aidha Bi. Kawawa amesema kuwa nakala za picha hizo zinapatikana Idara ya Habari Maelezo  na Ofisi za Wakala wa Huduma ya Ununuzi Serikalini  (GPSA).

Amesema picha hiyo ya Rais pamoja na ya  Baba wa Taifa zinatakiwa kutundikwa katika ofisi zote za Serikali,Taasisi za Umma, Mashirika na Ofisi Binafsi.

Aidha Mkurugenzi Msaidizi wa Idara ya Habari Maelezo Raphael Hokororo amesema picha ya Rais Magufuri imewahi kutoka mapema sana kuliko picha za Waheshimiwa waliopita na kusema  kuwa hairuhusiwi kukopi wala kunakili picha hiyo.

Serikali inatoa onyo kwa wale wote wanaosambaza picha isiyo rasmi pamoja na Serikali kusitisha matumizi ya picha hiyo na wale wote wanaotengeneza picha ukubwa usio rasmi, hatua za kisheria zitachukuliwa dhidi yao.
"Kwani ni Idara ya Habari MAELEZO pekee ndiyo yenye Hakimiliki ya picha hiyo" alifafanua  Bw. Hokororo.