NGOs nchini zatakiwa kutekeleza majukumu yaliyo ndani ya usajili wao

WIZARA ya Afya, Maendeleo ya Jamii, Jinsia, Wazee na Watoto, imeyataka Mashirika Yasiyo ya Kiserikali (NGOs) kutekeleza majukumu yaliyo ndani ya usajili wao na kuepuka vitendo vya uvunjifu wa sheria.

Hayo yamesemwa na Marcel Katemba ambaye ni Msajili wa Mashirika hayo, kufuatia tuhuma za kuwepo kwa baadhi ya NGOs zinazojihusisha na kuhamasisha vitendo vya ushoga nchini.

"Siku za hivi karibuni kumekuwepo na tuhuma za kuwepo kwa baadhi ya Mashirika Yasiyo ya Kiserikali (NGOs) yanayojihusisha na kuhamasisha vitendo vya ushoga nchini. Tunapenda kuujulisha umma kuwa NGOs zinasajiliwa kutekeleza majukumu yanayokubalika kisheria na kwamba vitendo vya kuhamasisha ushoga si majukumu halali yanayopaswa kutekelezwa na NGOs" alisema Katemba.

Aidha, alisisitiza kuwa vitendo vya ushoga havikubaliki nchini kwani ni kinyume na mila, desturi na sheria za nchi.

Ofisi ya Msajili inaomba wadau na umma kwa ujumla kutoa taarifa zitakazowezesha kuthibitisha tuhuma tajwa ili hatua stahiki dhidi ya NGOs husika zichukuliwe. Taarifa zinaweza kutolewa kupitia namba zifuatazo: 022 2110714/0222123143/ 0754391942/0715391942.