DC KIGAMBONI AMTAKA MKADARASI ADVENT KUENDANA NA KASI YA DAWASA

Mkuu wa Wilaya ya Kigamboni Mhe. Fatma Nyangasa amemtaka mkandarasi Advent kufanya usambazaji wa miundombinu ya maji mtaani kwa wakati ili wananchi kupata maji mara baada ya mradi wa Kisarawe II kukamilika.

Ameyasema hayo leo alipofanya ziara ya kukagua mradi wa maji wa Kisarawe II pamoja na kuwasha pampu ya kisima kimoja kinachopeleka maji kwenye tanki la maji lenye ujazo wa lita milioni 15 litakaloweza kutoa huduma ya maji kwa wakazi wa Kigamboni na maeneo ya pembezoni.

"Namsisitiza mkandarasi anayehusika na usambazaji wa miundombinu ambaye ni Advent kuendana na muda walioutoa DAWASA wa miezi mitatu ili aendane kasi hiyo na asilete sababu zozote kwani kila kitu kipo ili wananchi waanze kupata Maji." Alisema Nyangasa

Nyangasa amewataka wananchi wa Kisarawe II pamoja na maeneo mengine ya Kigamboni kuanza kufanya maombi ya kuunganishiwa maji ili mradi wa maji unapokamilika waanze kutumia maji safi na salama na sio kusubilia mradi umemalizika ndio wanaanza kuomba uunganishwaji wa maji.

Pia amesema kisima kimoja kilichowashwa leo kinaweza kutoa huduma kwa nusu siku kwa wakazi wa Kigamboni hivyo vikiwashwa visima vingine vitaweza kumaliza changamoto ya upatikanaji wa maji katika wilaya ya Kigamboni.

"Kuna utaratibu umeandaliwa na DAWASA ambapo mwananchi atakayetaka kuunganishiwa maji atapewa gharama zake na kama atashindwa kulipia gharama za kuunganishiwa maji basi  ataunganishiwa kwa mkopo ili kuweza kupata huduma ya maji huku akilipa kidogokidogo mkopo wake" alisema Nyangasa

Naye Afisa Mtendaji Mkuu DAWASA Mhandisi Cyprian Luhemeja amesema mradi wa Maji Kisarawe II unahusisha uendelezaji wa visima kumi na mbili vya maji vyenye uwezo wa kuzalisha maji lita milioni 57 pamoja na ujenzi wa tanki la kuhufadhia maji litakaloweza kuhifadhi maji lita Milioni 15 umefikia asilimia 95.

“Mradi huu unatekelezwa kwa sehemu mbili, sehemu ya kwanza ni ujenzi wa kituo cha kusukuma maji, kituo cha kupokea Maji, ulazaji wa mabomba ya maji na ujenzi wa tanki kubwa la kuhifadhi maji la lita milioni kumi na tano linalojengwa Kigamboni na awamu ya pili ikihusisha kazi ya kufunga njia za umeme kwenye visima na kutoa maji kwenye visima na kupeleka kwenye kituo cha kusukuma maji amesema Luhemeja.

Luhemeja amesema Mradi huu ulianza kutekelezwa mwezi Disemba mwaka 2019 huku ukigharimu kiasi cha bilioni 24 fedha za ndani za Mamlaka na kukamilika kwakwe kutanufaisha wakazi 250,000 wa maeneo ya Kibada, Mjimwema, Masonga, Kimbiji, Mpera na maeneo ya karibu.

Kwa upande wa Diwani wa Kisarawe II Issa Hemed Zohoro ameiomba DAWASA kuipa kiupaumbele kata ya Kisarawe II kwani ndio mzizi wa mradi huo wa Maji.

  

"Nitashangaa Sana kuona wananchi wa kata ya Kisarawe II hawana maji lakini maeneo mengine wamepata maji hivyo namuomba mkandarasi kuweza kukaa na DAWASA ili kuangalia ni kwanamna gani tunaweza kupewa kiupaumbele" alisema Zahiro

Mkuu wa Wilaya ya Kigamboni Mhe. Fatma Nyangasa(kulia) akiwasha pampu ya kisima cha kwanza kinachopeleka maji kwenye tanki la lita milioni 15 katika mradi wa maji Kisarawe II unaotekelezwa na DAWASA kushoto ni Afisa Mtendaji Mkuu DAWASA Mhandisi Cyprian Luhemeja. 

Mkuu wa Wilaya ya Kigamboni Mhe. Fatma Nyangasa(kulia)  akipata maelezo kutoka kwa Afisa Mtendaji Mkuu DAWASA Mhandisi Cyprian Luhemeja(kushoto) kuhusu moja ya  kisima pamoja na pampu ya kusukumia maji wakati wa kuwasha pampu hiyo katika mradi wa maji wa Kisarawe II unaotekelezwa na DAWASA.

Afisa Mtendaji Mkuu DAWASA Mhandisi Cyprian Luhemeja akitolea ufafanuzi Tanki la maji la Kisarawe II lenye ujazo wa Lita Milioni 15 linalojengwa na DAWASA katika Wilaya ya Kigamboni Jijini Dar es Salaam wakati wa ziara ya Mkuu wa Wilaya ya Kigamboni Mhe. Fatma Nyangasa ya kukagua mradi wa maji wa Kisarawe II pamoja na kuwasha pampu ya kisima kimoja kati ya Saba. Wa kwanza kushoto ni  Diwani wa Kisarawe II Issa Hemed Zohoro

Mkuu wa Wilaya ya Kigamboni Mhe. Fatma Nyangasa akizungumza wakati wa kutembelea Mradi wa maji wa Kisarawe II ili kujiridhisha na kazi inayofanywa na DAWASA ya kumaliza changamoto ya maji katika wilaya ya Kigamboni 

 Mkuu wa Wilaya ya Kigamboni Mhe. Fatma Nyangasa  akiangalia maji yanayojazwa kwenye Tanki la Kisarawe II lenye ujazo wa Lita Milioni 15 wakati wa ziara yake ya kutembelea mradi huo.

 Mkuu wa Wilaya ya Kigamboni Mhe. Fatma Nyangasa akiendelea na ziara yake ya kukagua mradi wa maji wa Kisarawe II unaotekelezwa na DAWASA.

Mkuu wa Wilaya ya Kigamboni Mhe. Fatma Nyangasa akizungumza na waandishi wa habari kuhusu namna Serikali iliyojipanga kumaliza changamoto ya maji katika wilaya ya Kigamboni mara baada ya kumaliza ziara yake ya kukagua ujenzi wa Tanki, uchimbaji wa visima kwenye mradi wa maji wa Kisarawe II pamoja na kuwasha pampu ya kisima cha kwanza inayopeleka maji kwenye Tanki la lita milioni 15 .

Afisa Mtendaji Mkuu DAWASA Mhandisi Cyprian Luhemeja akizungumza na waandishi wa habari kuhusu DAWASA wanavyosimamia mradi wa maji wa Kisarawe II ili uweze kumalizika kwa wakati na kuweza kuwaunganishia wananchi maji safi na salama katika maeneo mbalimbali ya wilaya ya Kigamboni.

 Diwani wa Kisarawe II Issa Hemed Zohoro akizungumza na waandishi wa habari kuhusu Naman wananchi wa kata yake wanavyosubilia maji kwa hamu mara baada ya mradi wa maji wa Kisarawe II kukamilika unaotekelezwa na DAWASA katika Wilaya  Kigamboni Jijini Dar es Salaam.

  Msimamizi wa mradi kwa upande wa Advent, Mhandisi Michael Njau akizungumza na waandishi wa habari kuhusu zoezi la ulazaji wa mabomba makubwa na madogo kwenye mradi wa maji wa Kisarawe II unaotekelezwa na DAWASA.