AFARIKI DUNIA BAADA YA KUPIGWA NA TOFALI USONI AKICHEZA RHUMBA NA MKE WA WATU

Na Mwandishi Wetu,Ludewa

MKAZI wa Kijiji cha Lusala wilayani Ludewa mkoani Njombe  Razalius Kufabasi (50) anashikiliwa na Jeshi la Polisi mkoani hapa kwa tuhuma za kumpigia na tofali la kuchoma Linus Mtega(52) na kumsababisha umauti.

Imeelezwa kwamba siku ya tukio hilo kulikuwa na shughuli ya kujengea makabuli ambapo usiku watu walikuwa wakiburudika kwa muziki, hivyo Mtega(sasa marehemu) huyo alikuwa amemkumbatia mke wa mzee Kufabasi huku wakicheza pamoja.

Mashuhuda wa tukio hilo wameiambia Michuzi TV na Michuzi Blog kwamba hali  hiyo ilisababisha mzee huyo wivu hivyo akaamua  kuchukua tofali na kumpiga nalo mzee Mtega kwenye paji la uso.

Akithibisha kutokea kwa tukio hilo kwa waandishi wa habari,  Kamanda wa Polisi Mkoa wa Njombe Hamis Issa amesema mzee Mtega alichanika kwenye paji lake la uso na kulazimika kukimbizwa kituo cha afya cha Mlangali lakini hakuweza kupona baada ya kufikwa na umauti.

Kamanda Issa amesema  mtuhumiwa baada ya kuona amesababisha kifo cha mzee huyo  akijaribu kutoroka lakini hakuweza kufanikiwa kwani Jeshi la Polisi lilifanikiwa kumtia nguvuni ili sheria ichukue mkondo wake.

Aidha Kamanda Issa amelaani vikali tabia hizo huku akiitaka jamii kuacha wivu uliopitiliza kwani yanapotokea mauaji kama haya familia pamoja na watoto ndio huteseka.