IHEFU SC WALIVYOTIBUA REKODI YA WANANCHI

Na Bakari Madjeshi, Michuzi TV

MBOGO Maji!!! Ihefu SC wameharibu rekodi ya Young Africans SC ya kutofungwa (Unbeaten) michezo 49, baada ya kuifunga timu hiyo mabao 2-1 katika uwanja wa Highland Estate, Mbarali mjini Mbeya ikiwa ni mchezo wa Ligi Kuu Soka Tanzania Bara (NBC PL) msimu wa 2022-2023.

Mabao ya Ihefu SC yaliyoharibu rekodi hiyo ya Wananchi yamefungwa na Kiungo Never Tigere kwenye dakika ya 38’ ikiwa ni bao la kusawazisha katika mchezo huo, wakati bao la kwanza la Young Africans SC likifungwa dakika ya 8’ na Mlinzi wa timu hiyo, Yannick Litombo Bangala.

Mbogo Maji walienda mapumziko katika dimba lao la nyumbani kwa sare ya bao 1-1. Kipindi cha pili, Ihefu SC walirudi uwanjani kwa kasi na kupata bao la ushindi kwenye dakika ya 61’ kupitia kwa Mlinzi wao, Lenny Kissu ambaye aliunganisha ‘Krosi’ safi ya ‘kona’ ya Never Tigere.

Mara ya mwisho, Wananchi kupoteza mchezo, ilikuwa Aprili 26, 2021 ambapo walifungwa bao 1-0 na Azam FC kwenye dimba Benjamin Mkapa, jijini Dar es Salaam, bao lililofungwa na Mshambuliaji, Prince Dube.

Ihefu SC wameharibu rekodi ya Wananchi wamepanda hadi nafasi ya 13 katika msimamo wa Ligi hiyo ya Tanzania Bara msimu huu, wakiwa na alama zao 11 katika michezo 14 wakati Young Africans SC wapo nafasi ya kwanza na alama zao 32 wakiwa na michezo 13.