Watu 6 raia wa kigeni wafariki kwa ajali mkoani Njombe

Njombe

Watu 6 ambao ni raia wa kigeni waliokuwa wakisafiri kwa njia haramu wamefariki dunia baada ya gari waliyokuwa wakisafiria kupata ajali katika kijiji cha Iyai kata ya Luduga Wilaya ya Wanging'ombe mkoani Njombe barabara kuu ya Makambako kuelekea mkoani Mbeya.

Kamanda wa Polisi mkoa wa Njombe John Makuri Imori amesema ajali hiyo imetokea mapema alfajiri ya kuamkia leo,huku watu wengine nane wakiwa majeruhi na wanapatiwa matibabu katika hospitali ya wilaya ya wanging'ombe huku Polisi wakiendelea kumsaka Dereva na kondakta wa gari aina ya Scania yenye namba za usajili T.501 AGJ waliosababisha ajali hiyo iliyokuwa pia na Raia wa kigeni ambao wanasadikika kuwa ni kutoka ethiopia.

 
"Aajali hii ilihusisha gari namba T 501 AGJ aina ya Scania iliyokuwa na tela lake lenye namba T595 ANJ iliyokuwa inatoka Makambako kuelekea Zambia baada ya kufika hapa tumekuta ndani ya gari kuna mizigo mingi sana ya vifaa vya ujenzi lakini pia baada ya kufungua tela tumekuta watu ambao ni raia wa kigeni na bahati mbaya hatujapata hati zao zozote za kuwatambulisha"amesema Kmanda Makuri

Kamanda Makuri amesema kuwa gari inamilikiwa na moja ya kampuni kutoka Arusha na sasa wanaendelea kufuatilia zaidi raia hao wanatokea nchi gani ambapo taarifa zaidi zitatolewa ambapo ametoa wito kwa wananchi kuacha mara moja biashara hiyo ya kusafirisha raia wa kigeni bila utaratibu.