mjue DJ Joe

DJ Joe akiwa na Mario Dewar Barrett
Mary J Blige akilonga na DJ Joe baada ya kumfanyia kazi njema kwenye show yake
Dj Joe akikamua ndani ya H20 Club

Moja kati ya watu waliothibitisha ushiriki wake katika LABOR DAY BASH litakalofanyika mwisho wa juma la mwisho wa mwezi huu (Aug 29-31) ni DJ Joe ambaye ameahidi kufanya "makamuzi" ya haja kwa wale watakaohudhuria.

Katika kutaka kumfahamu kwa undani, tulimsaka na kuweza kujua ni nani, ametoka wapi, anafanya nini na anaamini anaelekea wapi.

DJ JOE aka The CATDADDY ( www.djjoe202.com) ni mmoja kati ya wa-Tanzania wanaoweza kujivunia juhudi zao kuelekea katika mafanikio ya kazi zao za kila siku huko Washington DC .

Akiwa mmoja kati ya ma-Dj wanaofanya vema katika kituo kinachoongoza kwa kuwa na wasikilizaji wengi katika eneo hilo cha WKYS 93.9 Kiss FM (www.939wkys.com) , Dj Joe ambaye jina lake halisi ni Joseph anaeleza mchakariko wa kutafuta mustakabali wa maisha yake kama Dj, kazi na fani aliyoipenda tangu utotoni.

Joe amesema amekuwa akipenda saana shughuli za kuchanganya muziki tangu akiwa kijana mdogo (takriban miaka 14) , lakini kama ilivyo kwa wazazi wengi wa jamii yetu nyumbani Tanzania , waliona hiyo kama kazi ambayo ingemuwezesha kuendesha maisha yake kwa mafanikio hivyo kutopata ushirikishi mwingi toka kwao.

Lakini baadae ilipoonekana kuwa ana uwezo wa kufanya hivyo, mama yake alianza kumsaidia kumnunulia vifaa na miziki iliyomsaidia kuendeleza kipaji chake kwa sharti la kufanya vema kwenye masomo yake.

Akiwa sekondari, Dj Joe aliendeleza makamuzi kila alipopata nafasi huku akipata msaada wa kiujuzi toka kwa wakongwe kama Dj SUDI ( R.I.P) wa Club ya Shilam Dodoma, Super Deo wa YMCA na VISION pamoja na Dj John na Young Millionare wote wa YMCA na VISION zote za Dar.

Baada ya kumaliza elimu ya sekondari, Joe alipata nafasi ya kuelekea nchini Marekani mwaka 1993 na kufikia maeneo ya Washington DC ambako pamoja na kazi nyingine za kusaka maisha, pia aliamua kuendeleza kipaji chake cha u-Dj akijikita zaidi katika miziki ya kiafrika ambayo hata hivyo anasema kuwa haikupokelewa vema na jamii ya wa-Tanzania kama alivyotegemea hivyo kukumbana na kigingi kingine katika njia yake kuelekea kwenye mafanikio.

Kutokana na mapokezi finyu ya mahadhi aliyokua akitaka kujishughulisha nayo katika kazi yake, Joe aliamua kubadili mtazamo wa kazi na kuingia katika kuchanganya miziki ambayo ina washabiki wengi hapa nchini ( Hip Hop, R&B na Reggae) ambapo kwake hiyo ilikuwa hatua mpya iliyofungua pazia kuelekea mafanikio.

Kutokana na kipaji, utundu na ubunifu alionao katika kazi yake, Dj Joe aliweza kukubalika na kuanza kuona uwezekano wa kugeukia kazi ya u-Dj kama njia kuu ya kumuingizia kipato na kumuendeshea maisha yake na familia yake.

Baada ya kujenga uaminifa ndani yake na kazi yake, Joe aliamua kujiingiza kwenye mashindano ya kumsaka mkali wa ku-Dj kati ya mwaka 1997 na 1999 ambapo aliweza kujinyakulia vikombe kadhaa, hatua ambayo ilimpa uzoefu na ujuzi zaidi wa kazi na kumpa nafasi ya kwenda kufanya Showcase iliyomkubalisha ndani ya 93.9 FM WKYS.

Kituo kinachomilikiwa na TV na Radio one ambao pia wanamiliki vituo vingine 37 katika majimbo 37 nchini Marekani na baadhi ya vipindi ambavyo Dj Joe hushiriki huunganishwa na vituo vyote hivyo kufanya kazi yake isikike majimbo 37 nchini Marekani.

Mwaka 2000 Dj Joe aliamua kufanya kazi na u-DJ kama kazi kamili ya kumuendeshea maisha yake ambapo mbali na kupiga katika radio, pia amefanya kazi ama amepiga katika klabu kubwa na zivumazo maeneo ya Washington DC za Love (zamani Dream), Platinum na H2O na pia kumbi za DC Live na VIP (ambazo zimefungwa) ambazo pia hushirikisha wasanii mbalimbali maarufu wajao kufanya maonesho yao.

Kwa kufanya kazi katika kituo kikubwa cha Radio na kumbi kubwa, Dj Joe ameweza kuwapigia wasanii maarufu na pia kukutana na kufanya mahojiano na wasanii wengi nyota kama Mary J Blige, Jay Z, Beyonce, G-Unit (aliofanya nao mahojiano mara baada ya kurejea nchini Marekani kutoka Tanzania ambao waliisifia saana nchi yetu), L.L Cool J, Fat Joe na wengine wengi.

DJ Joe anatoa shukrani kwa wengi waliomsaidia kwa namna moja ama nyingine kufika hapa alipo na pia wale wanaoendelea kumuunga mkono ktk shughuli zake za kimuziki. Pia anamshukuru saaana Uncle Steve Mgaza ambaye alikuwa chachu yake kubwa katika kazi za redioni.

Kuhusu makwazo na magumu kuelekea tutakako, Joe anasema kuna ugumu mkubwa katika mafanikio lakini lazima watu watambue kuwa vikwazo tukutanavyo katika kazi zetu ni changamoto (challenge) kuelekea mafanikio yetu hivyo hakuna haja ya kukatishwa tamaa na kuyumbishwa na makwazo ya aina mbalimbali ambayo tunapambana nayo kwenye pilika zetu za kila siku.

Anakubali kuwa ana mafanikio kulingana na usawa aliokuwa wakati akianza kujishughulisha na kazi hii, lakini pia anasema ana mwendo mrefu kuelekea mafanikio halisi ambayo amekuwa akiyafanyia kazi na kuyapanga kwa muda mrefu.

Unaweza kutembelea tovuti yake Dj joe ambayo ni

www.djjoe202.com

kuona picha na video zake zimuoneshazo Dj aki-spin “vibaya mbaya” ndani ya studio za WKYS 93.9 FM.