libeneke laivu ndani ya clouds 88.4fm

wikiendi hii mie,  beda msimbe a.k.a  mzee wa lukwangule.blogspot.com (kulia)  na mtaalamu wa teknolojia phares magesa ambaye ni bosi wa www.nsitz.com tulipata heshima ya kualikwa na mdau ephraim kibonde katika kipindi chake cha 'mlango wa dharura' ambapo kwa masaa matatu tuliongelea mambo ya libeneke la globu lilivyo.

kwa ufupi mada iliyotawala ni jinsi ambavyo wabongo tunavyonyata katika kuikumbatia teknolojia ya habari na mawasiliano, wakati wenzetu wakikimbilia kwenye njia kuu ya teknohama, tena huku tukitambua kwamba baada ya mkonga wa mawasiliano (fibre optic) utapoanza kazi mwezi juni mwaka huu mambo yatakuwa mswano.

tuliongelea pia umuhimu wa fani ya globu katika jamii na kutoa rai kwamba wadau wakaze buti na kuanzisha libeneke la globu kwa wingi kwani uwanda ni mpana sana. tatizo kwa sasa kila mdau anaanzisha libeneke ambalo halina tofauti na mengine yaliyo hewani, yaani ya habari na matukio ya siku. ikatolewa rai kwamba kuna haja kwa wadau kuanza kuangalia nyanja zingine ambzo hazina huduma ya libeneke hivyo kuendelea kudumaa kwa kukosa wapasha habari.

libeneke la globu mbalimbali pia liliongelewa ikiwa ni pamoja na zile za mlengo wa kushoto, mlengo wa kati na mlengo wa kulia. mlengo wa kushoto ni zile zinazosadikika kuchafua hali ya hewa, za mlengo wa kati ni zile zisizochafua hali ya hewa na kutoegemea upande wowote wakati za mlengo wa kulia ni zile zilizojikita kwenye nyanja moja tu, kama vile siasa, uchumi n.k.

wasikilizaji wengi walipiga simu kutoa maoni na wengine kuuliza maswali, mengi yakiwa juu ya udhibiti wa libeneke la globu kwa kile kinachoonekana 'kupitiliza' kwa baadhi ya globu, hususan za mlengo wa kushoto. rai ikatolewa kwa wahusika wa udhibiti wa uhuru wa habari kuliangalia swala hili kwa herufi kubwa na kuona namna ya kufanya mambo yawe mswano bila kunyima haki ya msingi ya kupata ama kupsha habari - bila kujali mlengo gani.

kwa niaba ya phares na mzee lukwangule, natoa shukrani za dhati kwa redio ya watu ya clouds 88.4fm kutupa nafasi hiyo adhimu na adimu, pia mtangazaji ephraim kibonde kwa kutukaribisha studio. vile vile tulifurahi kusikia kwamba clouds fm wanalifanyia kazi ombi letu la kupitia na kusoma habari zilizomo katika globu kama wafanyavyo kwa magazeti.

tunaiombea clouds 88.4fm maisha marefu yenye tija tele, hasa katika kipindi hiki ambapo wako njia moja kuhamia katika jengo lao huko sehemu za mikocheni ambako mitambo ya kisasa ya redio na tv imefungwa, tayari kufungua awamu mpya ya redio ya watu. 

Tunashukuru sana

-Michuzi