kilimanjaro stars oye! Yaingia nusu fainali kwa kishindo. mrisho ngasa tishio chalenji...

Wachezaji wa Kilimanjaro stars baada

ya kuibanjua eritrea 4-0 leo na kuingia

nusu fainali za chalenji kwa kishindo

Picha na habari na

mdau Mathew Mndeme

KILIMANJARO Stars imefuzu kucheza nusu fainali kwa kishindo baada ya kuiadhiri Eritrea kwa mabao 4-0 huku Mrisho Ngassa akiibuka shujaa kwa kupachika mabao matatu peke yake (hat-trick).

Mabao hayo yanamfanya Ngasa kufikisha idadi ya mabao matano katika mechi nne alizocheza na usukani wa ufungaji wa mabao akimpiku Mzambia James Chamanga aliyefunga mabao manne katika michuano ya Kombe la Chalenji ambayo inaingia nusu fainali leo kwa mchezo wa kwanza baina ya Zanzibar Heroes na The Cranes ya Uganda.

Kilimanjaro Stars iliyouanza mchezo huo kwa kasi na kupoteza nafasi nyingi za kufunga walilazimika kusubiri hadi kipindi cha pili pale kinara wa ufungaji katika Ligi Kuu ya Tanzania Bara, John Bocco alipotumia vizuri urefu wake kwa kuruka juu na kuunganisha krosi ya beki Shadrack Nsajigwa dakika ya 61.

Winga Ngassa alifungulia karamu yake ya mabao kwa kufunga bao lake la kwanza akitokea upande wa kulia na kupiga krosi iliyokwenda moja kwa moja wavuni.

Nyota huyo wa Tanzania aliyekuwa mwiba mkali kwa ngome ya Eritrea kwa kufanya atakavyo akiwazidi mbio na chenga alifunga bao lake la pili na la tatu kwa Stars dakika 76 kwa shuti akimalizia kazi nzuri ya Bocco.

Ngassa alifunga bao lake la tatu dakika ya 84 baada ya Stars kugongea pasi nyingi kabla ya Mwaipopo kupitisha pasi ya juu iliyomkuta mfungaji huyo aliyempiga chenga kipa Yosief Zeratsion wa Eritrea na kumalizia mpira wavuni.

Hii ni mechi 32 ya kimataifa kwa Ngassa akiwa amefungaa mabao 10, huku Bocco akiwa amefunga bao lake la pili kwa Tanzania katika mechi 8 alizocheza.
Kwa ushindi huo, Kili Stars itachuana na Rwanda iliyoitoa Zimbabwe kwa mabao 4-1.

Nao Zanzibar Heroes wenye morali ya hali ya juu chini ya nahodha Abdi Kassim leo watapambana na The Cranes katika mechi ya nusu fainali ya kwanza kwenye Uwanja wa Nyayo jijini Nairobi.

Mrisho ngassa na wanahabari baada ya

gemu ambalo amepiga bao tatu peke yake

kocha marcio maximo wa kilimanjaro stars akipongezwa

na maafisa ubalozi nchini kenya baada ya kuwapiga

eritrea 4-0 na kusonga nusu fainali kwa kishindo

Balozi wetu nchini Kenya Mh. Nyasugara P. Kadege na afisa ubalozi wetu nchini humo Bw. Innocent Shio wakifurahia ushindi na makamu wa kwanza wa rais wa TFF Mh. Athumani Nyamlani

Balozi wetu nchini kenya Mh. Nyasugara P. Kadege na maofisa wa ubalozi ambao wako bega kwa bega na Kilimanjaro stars wakiwapongeza wachezaji kwa ushindi mnono wa bao 4-0 dhidi ya eritrea