libeneke la polisi jamii lapamba moto arusha

Ofisa wa polisi jamii mkoa wa Arusha Afande Mary Lugola akiwa anaongea na wananchi wa kata ya Elerai  Picha na Habari na Woinde Shizza wa Globu ya Jamii Arusha

POLISI Mkoa wa Arusha, umewataka wananchi kuwafichua wahalifu mapema kabla ya kufanya uhalifu.

Ofisa Mkuu wa Polisi Jamii wa mkoa huo,  Afande Mary Lugola, ambaye pia ni mlezi wa polisi jamii Kata ya Elerai, alisema hayo wakati akitoa mafunzo kuhusu polisi jamii kwa wananchi wa kata hiyo.

Alisema kila mwananchi anatakiwa kuwafichua wahalifu ambao wanaishi karibu nao au mtu ye yote ambaye anamuonea wasiwasi kuwa ni muhalifu au anatarajia kufanya uhalifu kabla ya madhara hayajatokea.

Alisema polisi watatoa ushirikiano wa hali na mali  iwapo mwananchi atatoa taarifa  kuhusiana na uhalifu wa aina yoyote.

“Ukiwa una taarifa yo yote ya uhalifu iwe ni mtu anauza bangi au anauza gongo au anataka kwenda kuiba sehemu, toa taarifa kwa polisi na sisi tutamfichua mapema na kumchukulia hatua kabla ya mtu huyo hajafanya tukio lolote la uhalifu,” alisema.

Kuhusu malalamiko ya unyanyasaji yanayofanywa na Wamasai kwa maelezo ya kutekeleza mila zao, Mary alisema polisi kawa kushirikiana na polisi jamii watahakikisha kwamba unyanyasaji huo hauendelei kufanywa kwa kigezo cha kudumisha mila.

Katika kutekelea mila za Kimasai, hususan, jando, inadaiwa kuwa baadhi yao wananyanyaswa kwa kuvalishwa mabati, magunia, kuzomewa na mambo mengine kadhaa.

“Napenda kuwaambiwa wananchi hawa ambao wamekuwa wakifanyiwa vitendo hivi kuwa ili kumrahisishia polisi  kazi yake na ishughulikiwe mapema ni lazima mtu yule amfahamu mtu aliye mfanyika kitendo hicho japo kwa sura ili aweze kuchukuliwa hatua za kisheria,”  alisema.