ankal amwaga vina kwa wadau mwamgongo na mroki

       Ewe bwana Mwamgongo, wa kule pwani ya Tanga

Asante kwavyo vigongo, vinavyocheza pachanga

Kana kwamba ni  bolingo, waipendayo waTanga

Zangu mie shukurani, kunogesha  libeneke

      Na weye bwana Mroki, Hakika sijamaizi

Kwamba nawe wajikoki, kunogesha simulizi

Nilidhani husomeki, kwenye zetu anga hizi

Zangu mie shukurani, kunogesha  libeneke

      Zangu mie shukurani, kunogesha  libeneke

Enyi marenga wa Pwani, mwanikosha kwa makeke

Yalosheheni  utani, wa kunifanya nicheke

Zangu mie shukurani, kunogesha  libeneke

    Sina nia na upande, wa kushabikia hapa

Tungo zenu kama kande, zenye mchuzi wa papa

Wa kupenda na apende,  la na aondoke hapa

Zangu Mie shukurani, kwa kunogesha  libeneke

  Katika zama za sasa, kweli adimu kuona

Wadau  wenye hamasa, kwazo hoja zenye vina

Nyie kweli ni vitasa, na mfanowe hamna

Zangu mie shukurani, kunogesha libeneke

      Hoja yangu mie hapa,  kuhamasisha wadau

Muendelee kutupa, tuliyokwisha sahau

    Mashairi ninaapa, wengi tumeyadharau

Zangu mie shukurani, kwa kunogesha libeneke

      Naomba muendelee, kuleta vina na ngeli

Wadau wachekelee, umahiri wa kweli

Ya gubu tuyakemee, kwa hasira na ukali

Zangu mie shukurani, kwa kunogesha libeneke

     Mshindi hapa hakuna, wala mshindwa wa hoja

Twendelee kubishana, bila ugomvi wa haja

Mashairi yatafana, kwa juhudi za pamoja

Zangu mie shukurani, kwa kunogesha libeneke

   Beti hizi zinatosha, Mwamgongo na Mroki

Tuendelee kupasha, bila chuki na hamaki

Kwa we kinachokuwasha, lia chozi la samaki

Zangu mie Shukurani, kwa kunogesha libeneke

Na Ankal