Mashahidi wawili wajitokeza Mahakamani kutoa ushahidi wao juu ya Kesi ya Mauaji ya Marehemu Swetu Fundikira

Kesi ya mauaji ya aliyekuwa mtoto wa Chifu Abdallah Fundikira, Swetu Fundikira imeanza kusikilizwa leo katika Mahakama Kuu Kanda ya dar es Salaam ambapo mashahidi wawili Mtangazaji wa TBC, Benedicto Kinyaiya na Sostenes Mbuya walitoa ushahidi wao.

Washitakiwa katika kesi hiyo ni wanajeshi, Rhoda Robert, MT 85067 Mohamed Rashid na Koplo Ali Ngumbe, aidha wanadaiwa kumuua Fundikira kwa kukusudia Januari 23, 2010 saa 1;30 usiku katika Barabara ya Mwinjuma eneo la Kinondoni jijini Dar es Salaam.

Mbele ya Jaji Zainab Mruke wakiongozwa na wakili wa serikali Charles Kato, mashahidi hao walitoa ushahidi wao.

Shahidi Ben Kinyaiya alielezea kuwa Januari 22, 2010 alitoka kwenda kwenye starehe zake Mango Garden, kabla hajafika hapo alikutana na Swetu akamuuliza 'wapi hiyo?' alimjibu 'Mango'.

Alidai mahakamani hapo kuwa baadaye kidogo akiwa njiani barabara ya Mwinjuma kwenye mataa ya kuungana na barabara ya Kawawa alikuta kundi la watu kama kuna ugomvi akamuona Swetu akaamua kuegesha gari pembeni kumfata.

Alipofika hapo swetu alikuwa shati imechanika kifuani na mdomo unadam kama mtu aliyepigwa, alimuuliza nini tatizo? alidai Swetu alisema 'wananipiga hawa, wananipiga hawa, wananipiga hawa.'

Beni ambaye anadai kuwa anamfaham Swetu kwa miaka mingi alimuuliza chanzo cha ugomvi huo lakini mshitakiwa mmoja kati ya hao watatu ambaye ni mwanamke alimjibu kuwa kama anahitaji maelezo zaidi aende polisi Ostabey wanampeleka huko.

"walimuingiza Swetu kwenye gari ili waondoke naye, mimi nilivuka barabara ambako nilipaki gari langu nikapanda nikawahi huko polisi," alidai Beni.

Alidai kuwa alipofika huko hakuwakuta wale watu waliomchukua Swetu wala Swetu na hata alipouliza mapokezi kama kuna watu walifika hapo muda mfupi uliopita walidai hakuna, aliamua kusubiri nje.

Anadai baada ya nusu saa hajawaona kufika hapo aliamua kuondoka kuendelea na ratiba zake akiamini watakuwa waliamua kumalizana na kumuacha andelee na mambo yake.

Aidha alidai baada ya muda akiwa kwenye pub ya Zonghua Garden alipigiwa simu na rafiki zake aliemtaka atoke nje, alitii na alipofika nje wakamueleza kuwa wamepokea taarifa kuwa Swetu ametupwa eneo la Sea View na kwamba wakati huo alikuwa anapelekwa Polisi Salenda Breage na baada ya hapo akapelekwa Hospitali ya Muhimbili.

waliondoka kwenda huko salenda,ambapo lilikuja Difender la Polisi na kuegeshwa hapo, aliweza kumuona Swetu ndani amelazwa amevimba sana mwili umejaa majeraha na damu lakini akiwa mtupu bila nguo. baadaye waliondoka kumpeleka Muhimbili.

Hata hivyo katika maelezo yake Beni alishindwa kuieleza mahakama kuwa ni kwanini katika maelezo yake ya polisi hakueleza kuhusu kwenda kwake salenda na kama alimuona marehemu akiwa katika hali mbaya kwenye Difender.

Beni pia alishindwa kueleza ni saa ngapi na lini aliandika maelezo hayo polisi. na ni kwanini baada ya kutomkuta Swetu kituo cha polisi Osterbey kama kweli alikuwa jamaa yake hakuendelea kumtafuta nyumbani kwake au kwenda kutoa taarifa kwa ndugu zake badala yake aliendelea na starehe zake.

Kwa mujibu wa shahidi, Mbuya alidai kuwa alikuwa na Swetu siku ya tukio akiwa amempakia katika gari lake ambalo ni taxi huku akiwa amekaa siti ya nyuma, baada ya kuipisha gari ya washitakiwa pale Mango na wao kuendelea na safari yao, walipofika kwenye eneo la tukio alikuja mmoja wa watuhumiwa na kumpiga kibao.

Alidai Swetu alishuka garini na kwenda upande ule wa dereva na kuanza kumuondoa yule mtu aliempiga kibao Mbuya, wale washitakiwa wengine walishuka kwenye gari lao na hapo ndipo ukaanza ugomvi ambao ulikusanya watu kuja kushangaa kinachoendelea.

Madereva Taxi waliokuwepo eneo hilo walifika katika eneo la tukio na walishauri waende kituo cha polisi,washitakiwa wakajitambulisha kuwa wao ni askari na wakatoa na vitambulisho vyao huku wakisema wanatangulia na Swetu kituo cha polisi kwa kutumia gari yao na kumtaka Mbuya awafate. 

hata hivyo shahidi huyo aliambiwa na Swetu arudi pale kijiweni kwa Ben kuwapa taarifa jamaa zao aende nao polisi.

Aliwaacha hapo washitakiwa na Swetu yeye akatangulia kutoa taarifa kama alivyotumwa wakaenda polisi Osterbey. hawakuwakuta washitakiwa wala Swetu.

Hata hivyo shahidi huyo alidai kuwa anamfaham Swetu kama mteja wake katika baa ya Kontena pale Kinondoni. Kesho yake alisafiri kwenda Dodoma, akiwa huko alipata taarifa kuwa Swetu ni mgonjwa sana na amelazwa anahitajika aje kutoa maelezo polisi akaamua kurudi, akiwa njiani alipata taarifa kuwa amekufa.

Kesi hiyo bado inaendelea kusikilizwa mahakamani hapo na Washitakiwa wanaendelea kusota rumande kutokana na kesi ya mauaji kuwa haina dhamana.