nini maana ya kiua kinachovaliwa na watu kibao Uingereza

 Ua aina ya 'Poppy' linaloonekana kuvaliwa na karibu kila mtu nchini Uingereza kwa sasa linasemekana lilianza kuvaliwa tangu mwaka 1920 kukumbuka askari veterani waliokufa vitani.

Historia inasema ua hilo lilipata umaarufu kutokana na shairi katika vita kuu ya kwanza liitwalo “In Flanders Fields”, na wa kwanza kulitumia walikuwa askari veterani wa Marekani maarufu kama American Legion, kukumbuka askari wa Marekani waliopoteza maisha katika vita hiyo iliyopiganwa mwaka 1914-1918. Baadae askari wa zamani katika nchi za Jumuiya ya Madola wakarithi utamaduni huo.

Hivi leo ua la Poppy linavaliwa zaidi Uingereza na Canada kukumbuka askari wao waliopoteza maisha katika kila aina ya vita tokea mwaka 1914. Aghalabu ua hilo huvaliwa siku ya Kumbukumbu ya Mashujaa wa nchi hizo kila Novemba 11 na majuma kadhaa kabla ya siku hiyo. Mashada ya maua ya Poppy pia huwekwa kwenye  makaburi ya mashujaa hao.

Uingereza ndio wanaoushabikia sana utamaduni huu. Katika majuma kuelekea siku hiyo ya Novemba 11, maua hayo yanagawiwa na chama cha maveterani wa vita wa Uingereza (The Royal British Legion), ambapo hulipwa pesa chache kukisaida chama hicho.