BURIANI NDUGU YANGU TONY BARETTO

Tony Baretto

Na Muhidin Issa Michuzi

Nilikuwa nje ya Dar es salaam kikazi siku ya Jumanne wakati Catherine-Rose, binti yake, aliponipigia simu na kunifahamisha habari hii ya kustua na kusikitisha. 

Lakini simu yake ilikuwa ni moja ya nyingi  nilizopokea siku hii zikiwa na habari hizi za kustusha.

Ya kwanza ilitoka kwa rafiki yetu Mukesh Josh, aliyeanza kwa kunipa pole, mapema asubuhi. Nilipomuuliza ya nini, akashangaa kwa kusema huna habari kuwa rafiki yako Anthony  Baretto amefariki dunia?

Kabla ya mwangwi wa habari hiyo iliyoufanya moyo wangu unyong’onyee kutwa nzima kwa huzuni haujatuama, simu ya pili ikaita. 

Hii ilikuwa inatoka Arusha kwa rafiki yetu mwingine Sukhdev Chattbar . Alinipigia kutaka kuthibitisha habari hiyo. Tulilia kwa pamoja nilipomthibitishia kwamba ni kweli Braza Tony is no more…

Kwa hali ya kawaida, na kama Mola asingemchukua miaka mine iliyopita kwa ajali ya gari, ni wazi simu ingine  ingetoka kwa kaka Hamidu Bisanga (aliyekuwa mmoja wa Brotherhood yetu mie, Tony, Suk Chat, Mkumbwa Ally, Jajis Merali na Danfold Mpumilwa a.k.a Dan Lutte). Lakini simu ya nne, ya tano na nyingine nyingi  ziliendelea kunimiminikia kutoka kila kona, kwani wengi walijua urafiki wangu na Tony na familia yake.

Si urafiki tu, bali pia undugu wa karibu, tangia najiunga na Tanzania Standard Newspaper (TSN) wachapaji wa magazeti ya serikali ya  Daily News na Sunday News January 1, 1990.

Yeye Tony, Mzee Wenceslaus Mushi, Isaac Mruma, Charles Kizigha, Vicent Urio (RiP) Ernest Millinga (RiP), Jonas Marios, Jonas Mwasumbi, Chattbar,  Bisanga (RiP), Reggie Mhango (RiP), Charles Rajabu, Mkumbwa Ali,  Attilio Tagalile, Willie Chiwango, Adam Lusekelo (RiP)  Khadija Riyami, Emmanuel Bulugu (RiP), Mzee Mdimi, Bob Karashani, Stephen Rweikiza, Rose Kalemera, Ichikaeli Maro, Pudenciana Temba, Joyce Mhaville, Halima Shariff, Chemi Che-Mponda, Mzee Boniface Byarugaba  ndio walionipokea Daily News kwa mikono miwili na kuwa mwanga wangu mkuu wa kunionesha njia sahihi lakini iliyojaa kona na mabonde na gharika ya tasnia hii adhimu ya habari.

Nadiriki kusema Tony na   wote hao niliowataja kuwa ndio walionitaga, walionilea na kunifikisha hapa padogo nilipo kitaaluma. Sijui nifanye nini ama niseme kitu gani kuwalipa fadhira hiyo.

Ni vigumu kuamini kwamba Tony, aliyekuwa Mkuu wa Kitengo cha Matangazo cha Tanzania Standard Newspapers (TSN) wachapaji wa magazeti ya serikali ya Daily News na Sunday News, hatunaye tena.  Utendaji kazi wake uliojaa utani na ucheshi  wakati wowote, uwe wa matatizo ama fanaka, ulikuwa hauna mfanowe.

Nakumbuka siku moja wafanyakazi wa Daily News tulipofika kazini pale mtaa wa Maktaba jijini Dar es salaam asubuhi moja na kukuta milango imetiwa kufuli na mwenye nyumba wetu (Printpak) kutokana na kutolipa pango. Hakuna aliyeamini kuwa pamoja na kufungiwa nje, gazeti la siku ya pili yake lingetoka kama kawaida, kwani kila kitu kilikuwa kimefungiwa ndani.
 Lakini siyo Tony. Hata kabla ya saa tatu haijatimia tayari yeye na Reggie  Mhango  walishafungua ofisi chini ya mti pembezoni mwa jengo la ofisi yetu, baada ya kumuomba muuza kahawa na kashata nafasi katika meza yake pale. Wakaongoza mapambano ya kutengeneza gazeti kwa ushujaa ambao sintousahau.

 Na kweli, kesho yake Daily News lilikuwa mitaani kama kawaida. Vinginevyo  kwa mara ya kwanza katika historia yake ya  miaka 75 wakati huo, gazeti hilo lisingeona mwaka wa jua!  

Huyo ndiyo alikuwa Tony Baretto.

Ni kweli kwamba mtu anapoaga dunia ndiyo watu humtaja kwa maneno ya sifa na uzuri wake wakati alipokuwa hai, lakini si uwongo kwamba Tony alikuwa si mtu wa kawaida, na aliyestahili sifa zote hizo na za ziada.  Nembo zake kuu tatu – Upara, macho makubwa nyuma ya miwani na madevu (kama ya gaidi, tulimtania, naye alicheka tu) hazitosahaulika kwa sie tuliofanya naye kazi na pia kuwa karibu kifamilia.

Buriani kaka yangu,  ndugu yangu, mshauri wangu na mwanafamilia wangu Anthony Baretto.  Eelewa kuwa huko ulikotangulia, ambako sote tutafuata kwa muda tofauti, hatutakusahau milele. Mke wako Pearl, na watoto wako Catherine-Rose na John-Paul tutalia nao na kusherehekea pamoja maisha yako yaliyojaa bashasha na mapenzi kwa binadamu wenzio.

SISI TULIKUPENDA, ILA MOLA  KAKUPENDA ZAIDI

NA AIWEKE ROHO YAKO MAHALI PEMA PEPONI

AMIN

Kusoma makala ingine ya Tony BOFYA HAPA