WAJASIRIAMALI WASHAURIWA KUZALISHA BIDHAA ZENYE TIJA NA VIWANGO KIMATAIFA

Na Woinde Shizza , Michuzi Tv  ARUSHA

WAJASIRIAMALI  nchini wametakiwa kuzalisha bidhaa bora zenye tija na viwango hali ambayo itawasaidia kupata uhakika wa masoko ya ndani na nje ya nchi na kukabili ushindani wa  masoko duniani.

Mwenyekiti wa wakuu wa Taasisi za Serikali zilizopo chini ya Wizara ya viwanda na biashara, Profesa Emanuel Mjema aliyasema hayo jana

alipokuwa akizungumza na wajasiriamali  wakati ujumbe huo

ulipofanya ziara katika ofisi za shirika la kuhudumia viwanda

vidogo(SIDO)Mkoani Arusha.

Ziara hiyo ambayo ilizikutanisha taasisi za serikali 15 zilizo chini

ya wizara hiyo ililenga kubadilishana uzoefu na ujuzi kati ya taasisi

hizo ikiwa ni pamoja na kutambua fursa za mawasiliano baina ya taasisi

husika ili waweze kuboresha huduma wanazotoa.

Profesa mjema ambaye ni Mkuu wa Chuo cha elimu ya biashara(CBE) mara

baada ya kutembelea kazi za wajasiriamali hao aliwapongeza kwa

shughuli walizozionyesha  ambapo aliwataka waongeze ubunifu ikiwa ni

pamoja na kufanya kazi kwa kushirikiana.

“Sisi CBE tumeendelea na tutazidi kuendelea kushirikiana na na wadau

wote ikiwa ni pamoja na nyie wajasiriamali na taasisi zingine za

Serikali lengo likiwa ni kuhakikisha kuwa chuo chetu kinaongeza nafasi

za masomo ya biashara kwa wajasiriamali hapa nchini.”Alisisitiza

Profesa Mjema.

Kwa upande wake Mkurugenzi mkuu wa Shirika la kuhudumia viwanda vidogo nchini(SIDO,) Sylvester Mpanduji alisema kuwa shirika lake litaendelea kutoa mafunzo kwa wajasiriamali juu ya kuanzisha viwanda  pamoja na kuongeza ubora katika bidhaa zao.

“Wajasiriamali wengi tuliowatembelea walieleza matatizo mbalimbali yanayowakabi ikiwa ni pamoja na mitaji ,ucheleweshaji wa

vibali vya kuanzisha biashara zao na sisi tunawaahidi tutaendelea

kuwapatia mikopo kwani tumekuwa tukitoa mikopo hadi ya thamani ya

shilingi milioni tano”alisema Mpanduji

Awali Meneja wa SIDO Mkoani Arusha, Nina Nchimbi aliwataka wajasiriamali

kutoka maeneo mbalimbali mkoani hapo kufika katika ofisi za shirika

hilo ili kuweza kunufaika na fursa mbalimbali zinazotolewa ikiwa ni

pamoja na mafunzo ya ujasiriamali.

Nchimbi alisema kuwa matatizo ambayo wamekuwa nayo wajasiriamali ni kutopata taarifa sahihi  zikiwemo za namna ya kupata mikopo ya

kukuza mitaji yao pamoja na kuzifikia taasisi mbalimbali za Serikali

kwa ajili ya kuisajili bidhaa zao na kwamba kupitia SIDO tatizo 

hilo itakuwa historia.

Katika ziara hiyo ujumbe huo ulitembelea viwanda mbali mbali vikiwemo vya zana za teknolojia(TDC),vya usindikaji unga lishe,bidhaa za

nyama,viwanda vya uchakataji vyuma,vifaa vya ujenzi ambapo

wajasiriamali mbalimbali walionesha bidhaa wanazozalisha.