CCM WAMLILIA MWANASIASA MKONGWE DK.CHRISANT MZINDAKAYA ALIYEFARIKI DUNIA JUNI 7, HOSPITALI YA MUHIMBILI

 

Na Mwandishi Wetu, Michuzi TV

CHAMA Cha Mapinduzi(CCM)kimepokea kwa masikitiko na huzuni kubwa taarifa ya kifo cha mwanasiasa mkongwe nchini Dk. Chrisant Majiyatanga Mzindakaya kilichotokea siku ya Juni 7,2021 katika hospitali ya Taifa Muhimbili.

Dk.Mzindakaya alikuwa Kiongozi Mwandamizi katika Chama Cha Mapinduzi na Serikali, ambae ametumikia  katika nyadhifa mbalimbali kuanzia wakati wa TANU na baadae CCM akiwa mtumishi katika Chama Cha Mapinduzi ngazi ya Katibu wa CCM Mkoa,  Mbunge, Mkuu wa Mkoa na Naibu Waziri wa Viwanda na Biashara.

Taarifa ya CCM iliyotolewa leo Juni 8,2021 na Katibu wa Itikadi na Uenezi wa Chama hicho Shaka Hamdu Shaka imesema "Chama Cha Mapinduzi  kimempoteza Kiongozi mahiri, mchapakazi, mzalendo na mwenye msimamo usiyoyumba.

"Katika kupigania maslahi ya Taifa wakati wote wa utumishi wake ndani ya Chama na Serikali na hata baada ya kustaafu alikuwa na mchango mkubwa katika kulisaidiaTaifa,"imesema taarifa hiyo ambayo pia inaeleza Mwenyekiti wa Chama hicho na Rais wa Jamhuri ya Muungano wa Tanzania Samia Suluhu Hassan amepokea kwa masikitiko makubwa taarifa za kifo hicho.

Shaka amesema Chama Cha Mapinduzi kinatoa salamu za pole kwa familia ya marehemu, ndugu, jamaa, marafiki na tunamuomba Mwenyezi Mungu  awape moyo wa subira na ustahimilivu  katika kipindi.

"Mwenyezi Mungu ailaze roho ya mpendwa wetu  Dkt. Crisant Majiyatanga Mzindakaya mahali pema peponi.Sisi ni wa Mwenyezimungu na kwake tutarejea,,"amesema Shaka.