DART YAADHIMISHA SIKU YA WANAWAKE DUNIANI KWA KUGAWA VIFAA NA KUCHAGIA DAMU MLOGANZILA

IKIWA Dunia inaadhimisha siku ya Wanawake Duniani, Wakala wa Mabasi yaendayo Haraka nchini(DART) umetoa msaada wa vifaa, mahitaji mbalimbali zikiwemo shuka pamoja na kuchangia damu katika Hospitali ya Taifa ya Muhimbili, Mloganzila iliyopo Wilaya ya Ubungo Dar es Salaam.

Wakikabidhi msaada huo leo, DART kwa kushirikiana Wakala wa utoaji huduma za Mabasi ya Haraka (UDART) wameeleza lengo lao ni kusaidia kutatua baadhi ya changamoto zinazowakabili wagonjwa wanaopatiwa huduma mahali hapo.

Akizungumza kwa niaba ya Mtendaji Mkuu wa  DART, Kaimu Mkuu Mkurugenzi wa Uendeshaji na Usimamizi wa Miundombinu  DART Dkt. Eng. Philemon Mzee, amesema wametoa msaada huo kama sehemu ya kuadhimisha siku ya wanawake Duniani wakiwaunga mkono wanawake wa taasisi hiyo.

"Kwa pamoja sisi na wenzetu wa UDART tuliona vyema kuja kuwafariji kwa kiasi kidogo wagonjwa waliolazwa hospitalini hapa wakiwemo aakina Mama, tupo hawa kuwafariji wakati huu wanapopata matibabu hospitalini hapa" alisema Mzee.

Amesema, wamekuwa wakiboresha huduma ya usafiri katika hospitali hiyo kwa kuhakikisha kunakuwa na usafiri kwa kila baada ya dakika ishirini ili kuwasafirisha wananchi wanaokwenda kutibiwa na kuwaona wagonjwa.

Kwa upande wake  Mkuu wa Idara ya Utawala na Utumishi wa UDART Zaitun Hassa amesema wanatambua mchango mzuri hususani wa utoaji wa huduma kutoka katika hospitalini hao na kuongeza kuwa msaada walioutoa ni kutambua juhudi za hospitali hiyo sambamba na kuwafariji wagonjwa waliolazwa hospitalini hapo.

Bi. Zaitun ametumia wasaa huo kuwashauri watanzania kushiriki Sensa ya watu ya makazi itakayofanyika mwaka huu amewataka  ili kuiwezesha Serikali kupanga mipango sahihi ya maendeleo na kueleza kuwa  wameendelea kutoa huduma ya usafiri katika hospitali hiyo kadri ya uhitaji kwa kuanza na mabasi manne ambayo huingia hospitalini hapo kila baada ya dakika 20.

Aidha aliwaomba wadau wengine zikiwemo taasisi mbalimbali kujitokeza kutoa misaada mbalimbali hospitalini hapo kutokana na mahitaji mbalimbali yaliyopo kwa ajili ya kuwezesha utoaji wa huduma bora kwa wagonjwa.

Kwa upande wake Naibu Mkurugenzi Mkuu wa Hospitali hiyo ya Mloganzila Dkt. Julieth Magande, mbali na kuwashukuru watoa huduma hao wa mabasi yaendayo haraka kwa msaada huo, alisema  Mloganzila kama ilivyo hospitali zingine wanakabiliwa na changamoto ya mahitaji mbalimbali kwa ajili ya kuwezesha utoaji huduma.

Alisema Dkt. Magande wakiwa  kama wasimazi wa huduma za hospitali hiyo kwa kiasi fulani bado wanahitaji misaada ya kila aina yakiwemo mashuka na mengineyo ili kuwawezesha wagonjwa kuendelea kutoa huduma kwa wagonjwa.

Mbali na kuchangia damu vifaa viilivyotolewa na DART ni pamoja na shuka 50, kandambili, dawa za meno, mafuta ya kupaka, sabauni za kufulia na kuogea.

Naibu Mkurugenzi Mkuu wa Hospitali ya Taifa Muhimbili tawi la Mloganzila Dkt. Julieth Magande akizungumza mara baada ya kuupokea ugeni huo na kueleza kuwa wakala hiyo imesaidia kwa kiasi kikubwa kupunguza kero ya usafiri kwa wagonjwa wanaokwenda kutibiwa hospitalini hapo, Leo jijini Dar es Salaam.

Kaimu Mkurugenzi wa Uendeshaji wa DART Dkt. Eng. Philemon Mzee akizungumza wakati wa kukabidhi msaada huo na kueleza kuwa wamekuwa na utamaduni wa kuwafariji wagonjwa na kwa umuhimu wa hospitali hiyo wataboresha zaidi huduma za usafiri, leo jijini Dar es Salaam.

Mkuu wa  Idara ya Utawala na Utumishi wa UDART Zaitun Hassan akizungumza mara baada ya makabidhiano hayo na kueleza kuwa msaada huo ni kwa kutambua jitihada zinazofanywa na hospitali hiyo sambamba na kuwafariji wagonjwa.

Zawadi mbalimbali zikikabidhiwa kwa uongozi wa hospitali ya Taifa Muhimbili, Mloganzila.

Matukio ya ugawaji wa zawadi mbalimbali kwa wagonjwa katika wodi ya wazazi, Hospitali ya Mloganzila.

Baadhi ya wafanyakazi wa Wakala wa Mabasi yaendayo Haraka nchini (DART,) wakichangia damu katika Hospitali ya Taifa ya Muhimbili, Mloganzila jijini Dar es Salaam.