Na Janeth Raphael -MichuziTv
Rais wa Jamhuri ya Muungano wa Tanzania, Dkt. Samia Suluhu Hassan, amewataka Watanzania kulinda amani, usalama na utulivu wa nchi, akisisitiza kuwa misingi hiyo ndiyo nguzo kuu inayowezesha uwekezaji, ukuaji wa uchumi, utalii, biashara, ajira na maendeleo ya jamii.
Akihitimisha Tamasha la Kizimkazi Festival leo Ijumaa, Agosti 14, 2026, visiwani Zanzibar, Rais Samia amesema Tanzania imeendelea kupata mafanikio katika maeneo mbalimbali kutokana na kuwepo kwa mazingira ya amani na utulivu, hivyo wananchi wanapaswa kutambua thamani ya amani na kuilinda kwa nguvu zote.
Amesema maendeleo yanayoonekana nchini, ikiwemo kuongezeka kwa shughuli za uwekezaji, utalii, biashara na huduma za jamii, yanahitaji mazingira salama na yenye utulivu ili yaendelee kukua na kuwanufaisha wananchi. Kwa mujibu wa Rais Samia, juhudi za Serikali za kufungua fursa za kiuchumi na kijamii haziwezi kuzaa matokeo yaliyokusudiwa iwapo amani na usalama vitavurugwa.
Rais Samia amesisitiza kuwa Tanzania haiwezi kufikia malengo yake ya maendeleo endapo itaingia katika mazingira ya vurugu na machafuko, kwa kuwa hali hiyo inaweza kuvuruga shughuli za kiuchumi, kudhoofisha uwekezaji, kuathiri utalii na biashara, pamoja na kupunguza fursa za ajira zinazolengwa kuwafikia Watanzania, hususan vijana.
Kwa msisitizo, Rais Samia amewataka Watanzania kutolichukulia suala la amani kama jambo la kawaida au la kujihakikishia milele, bali kulitambua kama tunu muhimu inayohitaji kulindwa na kila mmoja. Amesema amani ndiyo mazingira yanayowezesha wananchi kufanya kazi, kufanya biashara, kuwekeza, kusoma na kushiriki katika shughuli mbalimbali za maendeleo bila hofu.
Aidha, amewataka vijana kuwa mstari wa mbele katika kulinda amani ya nchi na kutokubali kushawishiwa kufanya vitendo vinavyoweza kusababisha machafuko au kuvuruga utulivu wa taifa, akisisitiza kuwa kizazi cha sasa kina wajibu wa kuhakikisha Tanzania inaendelea kuwa nchi salama kwa ajili ya vizazi vijavyo.
“Uwekezaji, maendeleo tunayoyaona hapa; uwekezaji, utalii, biashara, ajira na huduma za jamii hayawezi kustawi katika mazingira ya vurugu na uvunjifu wa amani. Niwaombe Watanzania wenzangu hususan vijana msikubali kuharibu amani ya nchi yenu. Amani ndiyo kila kitu katika maisha yetu,” amesema Rais Samia.
Amesema kulinda amani ni zaidi ya kulinda utulivu wa nchi, kwani ni kulinda fursa za kiuchumi, ajira, uwekezaji, utalii, biashara na huduma zinazowezesha maisha ya wananchi kuendelea kuboreka. Kwa msingi huo, amewataka Watanzania wote kuendelea kushirikiana katika kuhakikisha Tanzania inabaki kuwa nchi yenye amani, usalama na utulivu ili safari ya maendeleo iendelee kwa kasi.
Toa Maoni Yako:
0 comments so far,add yours
Hii ni Blog ya Watanzania popote walipo duniani kwa ajili ya kuhabarisha, kutoa/kupokea taarifa na kuelimisha mambo yote yaliyo chanya kwa Taifa letu. Tafadhali sana unapotoa maoni usichafue hali ya hewa wala usijeruhi hisia za mtu/watu. Kuwa mstaarabu...