usongo wa ufisadi BoT

Asalaam Aleikum Wadau wote,

Hii itakuwa ni mara yangu ya kwanza kuchangia ndani ya malumbano ya kisiasa na hasa kipindi hiki ambacho kimegubikwa na habari nyingi za kisiasa ambazo nyingi ni habari ambazo zimejaa simanzi ama manung’uniko ya kudhulimiwa, kutotendewa haki, na wengine wapo ndani ya shida za ukimbizi baada ya machafuko ya kisiasa.

Kwa kifupi na kwa kuazima maneno ya mwandishi mahiri Chinua Achebe ningelitumia “Hamkani si shwari tena”.

Katika uwanja wa siasa, hakika ni mengi ya kuongea na hata kulumbana kwenye tofauti za kiitikadi ama matashi kwamba wengine hupenda wapewe nafasi “(they need space!!)”.

Nisingependa kuliongelea hilo kwa sababu nina mengine ambayo mimi binafsi nimeyaona ni ya msingi zaidi na ni awali kuayongea labda yanaweza kulandana na mtizamo wa jumla katika kuchangia hoja na hasa hii ya ufisadi uliyotokea katika benki kuu ya Tanzania.

Aliyekuwa Gavana wa benki kuu ya Tanzania, Bw. Balali, ambaye ameshikishwa usukani wa kuliendesha gari la mafisadi wa tuhuma za kutumia nafasi zao na kutafuna mabilioni ya pesa za walipa kodi, ndiye amekuwa tena ameshika nafasi kubwa katika mazungumzo ya takriban nyanja zote za habari nchini Tanzania.

Siwezi kujumuisha yote yaliyokwisha semwa na wengi tuu tangu swala hili liingie katika duru hii ya malumbano. Mimi nitafupisha ili nilenge kuongelea lile ambalo limejiri mimi kuandika katika safu hii, hivyo nitaanza kuangalia taratibu za kazi ambazo nina hakika ndicho chanzo cha mambo yote haya kutokea na kufikia hapa yalipo hivi sasa.

Ninavyofahamu, ni kwamba ni Waziri wa fedha ambaye huchukua taarifa za mahesabu za benki kuu na kuzipeleka bungeni. Taarifa hizi huwa zinakuwa zimekaguliwa na Mhasibu Mkuu, na kupitishwa na Bodi ya wakurugenzi ya BoT. Hivyo utaratibu wa kuwasilisha taarifa za BoT zinafuata ngazi hizo kwamba inapofika taarifa kwa Waziri wa fedha, taarifa hiyo tayari ina baraka za Mhasibu Mkuu, Bodi wa wakurugenzi na mwishowe Gavana wa BoT.

Hakika ni mambo ya ajabu kabisa ambayo tunayaona yanatokea, kana kwamba hakuna taratibu, kana kwamba nchi inaendeshwa na utawala wa amri (hili linaweza kuwa kweli… maana si mara moja ama mbili nimesikia maneno kama “.. Rais amemuagiza… ama Waziri Mkuu amemuagiza….nk”).

Sentensi hizi zina maana nyingine tofauti kabisa katika nchi ambayo inashangilia demokrasia. Na mara nyingi maagizo haya hutokea mara tu panapokuwa na mushkeri na kwamba ni kwa sauti ya mkubwa tu ndipo mambo yatakwenda sawa.

Hii vile vile ina maana unapoagizwa katika hali kama hizi, maamuzi yako hayana uzito na kwamba kuna uzembe wa aina fulani kwako ama wewe hufahamu taratibu na hivyo wenye kuzifahamu ni lazima waache kazi zao na kuja fanya kazi yako ambaoyo utapewa maagizo ya namna ya kufanya.

Hili si jambo ambalo tungetegemea kuliona hapa Tanzania baada ya kipindi chote hiki cha kujitawala. Ni ya kuwa na wasi wasi mkubwa inapofikia kwamba kiongozi wa juu kabisa inabidi aje kuagiza mambo ambayo yana taratibu zinazooeleweka na sheria ambazo zinaongoza shughuli hizo.

Hapa panaweza kuwa na maswali mengi zaidi ya majibu na nina hakika maswali haya ndiyo hasa msingi wa yote hay aambayo tunayaona yakitokea katika nyanja mbali mbali za uongozi hapa Tanzania.

Swala hili linahitaji muangalio wa upeo wa juu katika taaluma za utawala na uongozi kinyume chake kitakuwa haya yalojiri BoT na hata sehemu zingine ambazo zina utata wa aina moja ama nyingine.

Kwa mtazamo huu huu wa taratibu za uongozi na utawala kwenda kuagiza, basi zipo sehemu ambazo serikali na wananchi wamekuwa hawafahamu nini mapungufu ama majaaliwa na sehemu hizo mpaka hapo patakapotokea hisia ya kuagiza, kumbe hili lingeepukwa na watu kufuata taratibu ambazo zitaweka bayana shughuli zote za sehemu hizo.

Kama hiyo haitoshi, nina hakika kwamba kama kweli tunafuata taratibu, basi ripoti ya mapungufu ya BoT ingelijulikana mapema sana tena kipindi kile kile ambacho ufisadi ulianza.

Kimsingi, Gavana asingekubali kusaini taarifa ya hesabu ya kwenda Wizara ya fedha na bodi ya wakurugenzi isingepitisha na wala mhasibu mkuu naye vile vile asingefanya makosa hayo na mwishoni wizara ya fedha ingelifikisha bungeni swala hili likiwa lina taarifa kamili za mapungufu na ni namna gani yametokea na yanashughulikiwa namna gani.

Cha ajabu ni kwamba katika mchakato wote huu hakuna aliyeona haya mapungufu nab ado nina imani kwamba vitengo vyote husika hapo juu vimekuwa vikipitia mara kwa mara taarifa hizi na kinyume chake kuzipitisha kwamba ni sahihi.

Matokeo ya kutofuata taratibu sasa yanavuruga taratibu zingine zote, kwamba Mkuu wa Polisi, Mkuu wa kitengo cha kuzuia rushwa na wengine wengi wameagizwa na Rais kufanya kazi zao BoT na kujipanga kutafuta suluhu la swala hili.

Hii ina maana sasa viongozi hao wafuate maagizo ya Rais na ni lazima wafuate na watafute muda wao wa kufanya kazi nyingine zinazowahusu ila lazima hili la agizo walipe kipao mbele na ikiwezekana hata usingizi iwe kitu cha kama anasa mbaya na hawatakiwa kuuendekeza!!!

Nina hakika kwamba viongozi hawa sasa hawalali na wapo juu juu ili wajinusuru katika kazi zao kutekeleza agizo la Rais.

Hili lingewezekana kufanyika kwa uyakinifu zaidi kama taratibu zingefuatwa, kwamba pindi mhasibu mkuu alipobaini kuna kugushi basi polisi wangepewa nafasi yao na hata vyombo vingine vya sheria na uongozi wa nchi nao kushiriki bila ya kuagizwa kwa kufuata taratibu zao za kazi na matukio husika.

Swala hili la taratibu na uongozi ndilo haswa jipu ambalo linatakiwa kupasuliwa maana hawa mafisadi ni msururu mzima wa watu ambao wamo serikalini na uraiani.

Na wote ama kwa kufahamu ama kutofahamu taratibu wametumbukia kwenye ufisadi bayana na kufanya uharamia ndani ya uwanja mkubwa tu wa wananchi wa Tanzania.

Nitarudia tena maandishi ya Jenerali Ulimwengu kwamba ili tuendelee tunahitaji vitu vinne; Uongozi bora, Uongozi bora, Uongozi bora!!!

akwi - kolazarzar@yahoo.com