JK: Serikali haina chuki na walimu

. Inathamini umuhimu wa kazi yao
. Asema kuwa mgomo sasa umekwisha
.Asema kuwa yaliyopita siyo ndwele, tugage yajayo
. Aonya kuwa Serikali imevumilia kiasi cha kutosha
. Asisitiza kuwa watakaojaribu kuvuruga amani na usalama wa nchi watashughulikiwa ipasavyo

Na Mwandishi Maalum,

Mahenge, Ulanga, Morogoro

Serikali haina chuki wala ugomvi na walimu, Rais Jakaya Mrisho Kikwete amesema katika kijiji cha Lupiro, wilayani Ulanga, Mkoa wa Morogoro.

Rais Kikwete pia amesema kuwa kwa kadri Serikali inavyohusika mgomo wa walimu umekwishakupita na kuwa yalipita siyo ndwele.

“Na ndugu zangu kama mnavyojua yaliyopita siyo ndwele. Sasa tugage yajayo,” amesisitiza Rais Kikwete.

“Serikali hii ni ya watu makini. Hatuna chuki na mtu na wala hatuna kinyongo na mtu. Kwa hakika hatuna chuki, ugomvi wala mgororo na walimu. Tunatambua na kuthamini sana kazi yao,” Rais Kikwete amesema.

Alikuwa anazindua mtambo na kiwanda cha kukobolea mpunga cha Saccos ya Walimu katika kijiji hicho kwenye siku ya tatu ya ziara ya Mkoa wa Morogoro.

Saccos hiyo ya walimu imepata mtambo huo kwa njia ya mkopo usiokuwa na riba wa kiasi cha sh milioni 35 kutoka Serikalini, kupitia Wizara ya Kilimo na Chakula. Ni Saccos ya kwanza ya aina yoyote kupata mkopo wa namna hiyo usiokuwa na riba kutoka Serikalini.

Amesema Rais Kikwete: “Ukiondoa maneno mengine ya kipuuzi, Serikali ninayoingoza mimi haiwachukii walimu. Hivi kama tungekuwa hatuwapendi tungewapa mkopo usiokuwa na riba? Si tungeliweza kusema wacha walimu wale jeuri yao na tukawanyima huo mkopo? Wangelifanya nini?”
Lakini Rais amesema kuwa Serikali imeamua kutoa mkopo huo kwa walimu kwa sababu inatambua umuhimu wa kazi yao na kujali maslahi ya walimu wote nchini.

Ameongeza Rais Kikwete, “na wala msije mkadhani kuwa tumetoa mkopo wa mashine hii kwa sababu ya tishio la mgomo. Bado tungewapa mkopo tu, kwa sababu wanafanya kazi nzuri kwa taifa letu. Tunaona wajibu wa kuwaunga mkono kwa sababu tunathamini sana kazi yao na kuheshimu mchango wa walimu katika taifa letu”

Hata hivyo, Rais Kikwete ameonya kuwa Serikali yake haitavumilia mtu yoyote ambaye anajaribu kuvuruga nchi na kusababisha kuvunjika kwa usalama na amani kwa sababu ama kisingizio chochote.

“Hatumavumilia mtu wa namna hiyo. Ndugu zangu tumevumiliana sana. Na sasa tumechoka. Kumbukeni kuwa hata Simba aliyenyeshewa mvua, bado anabakia samba tu.”

Rais pia amewashauri walimu na wananchi kwa jumla kutokuogopa kuchukua mikopo benki ili kuendeleza shughuli zao za kiuchumi. “Msiogope kukopa, hizi ndizo taratibu za dunia za kuendesha biashara.”

“Kazi ya mabenki ni kukopesha fedha. Hata wafanyabiashara wakubwa duniani kama vile Bill Gates na Warren Buffet hawatumii fedha yao katika kuendesha biashara zao, wanakopa. Hivyo, msiogope kopeni na vile vile rudisheni fedha za mabenki,” amesema Rais na kuongeza:

“Nilipata kushuhudia makala kwa makala zikiandikwa kuhusu mtu mmoja ambaye alikopa fedha benki ili kuendesha biashara. Makala zile ziliandikwa kama vile kukopa ni dhambi. Kukopa siyo dhambi, baya ni kuiba. Sasa walikata afanye nini aibe fedha za umma ili kuendesha biashara zake?” ameuliza Rais.

“Bila kufafanua zaidi, Rais amesema kuwa makala hizo za kila kukicha zilionyesha jinsi baadhi ya wananchi hawana kazi.

Baadaye, Rais Kikwete amezindua nyumba za kuishi watumishi wa Halmashauri ya Ulanga, mjini Mahenge na akaweka jiwe la msingi katika ujenzi wa ukumbi wa mikutano wa halmashauri hiyo. Baadaye amehutubia mkutano mkubwa wa hadhara mjini Mahenge.

Baadaye usiku, Rais Kikwete amepokea taarifa ya utendaji wa Serikali katika wilaya hiyo ya Ulanga.

Wakati anapokea taarifa hiyo, Rais amewatadharisha madiwani wa halmashauri hiyo na wengine wote nchini na wenyeviti wa vijiji kuwa makini katika kugawa ardhi ya vijiji na maeneo ya miji.
“Msije kuingia katika mikataba ya akina Carl Peters (mkoloni wa Kijerumani) na Chifu Mangungu, mkahongwa shanga na bunduki, ili kugawa ardhi yote ya wananchi bila kufiria kiasi cha kutosha kuhusu vizazi vijavyo,” amesema na kuongeza:

“Nilipata kukuta mkoa mmoja ambako Mkuu wa Mkoa huo alikuwa anataka kugawa ardhi ya kiasi cha ekari 100,000 kila mmoja kwa wawekezaji watano. Nilimwambia kuwa alikuwa anauza mkoa wake kwa kisingizio cha kutoa ardhi kwa wawekezaji. Msije kudanganyika kwa sababu wengi wa hawa wanatumia hati za miliki ya ardhi ya Tanzania kukopa fedha kutoka mabenki mbali mbali duniani ili kuendeshea shughuli zao nyingine katika nchi nyingine.”

Kuhusu miradi ya maji, Rais amewataka viongozi wa halmashauri, wilaya na mikoa kuandaa programu za kubuni, kuibua na kujenga miradi ya maji kwa ajili ya wananchi bila kusubiri ufadhili wa wakubwa ikiwamo Benki ya Dunia.

“Iwepo ama isiwepo Benki ya Dunia lazima tutafute namna ya kuhakikisha kuwa wananchi wetu wanapata maji safi na salama. Huu ni wajibu wetu, siyo wa Benki ya Dunia,” amesema Rais Kikwete wakati anasikiliza taarifa hiyo iliyosomwa kwake na Mkuu wa Wilaya ya Ulaya, Dk. RM Rutengwe.

Mapema kabla ya kuwasili mjini Mahenge, wilaya ya Ulanga akitokea wilaya ya Kilombero, Rais ametembelea eneo la Malinyi ambako amezindua daraja jipya katika Mto Furua, moja ya madaraja matatu yatakayounganisha wilaya ya Ulanga katika Mkoa wa Morogoro na wilaya ya Namtumbo katika Mkoa wa Ruvuma.

Njiani amesimama katika vijiji kadhaa kikiwamo cha Itete Njiwa, Mtimbira na kwenye makao ya tarafa ya Malinyi ambako amewaambia wachungaji kutoka mikoa ya Arusha na Mwanza waliovamia mabonde ya wilaya hiyo kujiondoa wenyewe mapema katika mabonde hayo kabla ya Serikali kuchukua hatua.

“Kama mmevamia ardhi oevu, ni vyema mkajiondoa wenyewe katika eneo hilo mapema kwa sababu ni dhahiri kuwa Serikali itachukua hatua. Kama waliondoka Bonde la Ihefu hata huku wataondoka tu. Hatuwezi kuruhusu nchi nzima ikawa kama wilaya za Bariadi, Maswa na Meatu.