JK apamba siku ya sheria nchini

JK akiwasili mahakama kuu kuhudhuria sherehe za siku ya sheria leo hapa dar. Shoto kwake ni Jaji Mkuu Mh. Augustine Ramadhani na kulia kwake ni mwenyekiti wa chama cha wanasheria dk. twalib akifuatiwa na Spika Mh. Samwel Sitta.

JK akipozi na majaji wa mahakama kuu (waliosimama nyuma) akiwa na Jaji mkuu Mh Augustino Ramadhani, Spika Samwel Sitta, Waziri wa Sheria Mh. Mathias Chikawe na Majaji wa Mahakama ya Rufaa.
JK akila pozi na wafanyakazi wa mahakama kuu
JK akiwa na majaji wa mahakama ya rufaa

JK akiwa na majaji wa mahakama kuu

JK na viongozi wa sheria na mahakama wakipozi na

viongozi wa vyombo vya ulinzi na usalama waliohudhuria

JK na viongozi wa sheria na mahakama akipozi na majaji wastaafu

JK na uongozi wa mahakama akipozi na viongozi wa vyama vya siasa waliohudhuria sherehe hizo

'Asante JK kwa kutoingilia uhuru wa mahakama'
Na Mwandishi Maalum
MAJAJI na mahakimu wa Tanzania wamempongeza Rais Jakaya Mrisho Kikwete kwa kutokuingilia uhuru wa mahakama, hata mara moja, iwe kwa matendo ama kwa kauli, katika miaka mitatu ya uongozi wake.

Majaji na mahakimu hao wamesema kuwa tabia hiyo ni tofauti na ile ya baadhi ya viongozi wakuu wa Tanzania waliomtangulia.

Pongezi hizo zimetolewa leo, Ijumaa, Februari 6, 2009 na Jaji Mkuu wa Tanzania, Jaji Augustino Ramadhani wakati wa sherehe za Siku ya Sheria ambayo huanzisha rasmi shughuli za Mahakama kila mwaka nchini.

Katika sherehe hizo zilizofanyika Makao Makuu ya Idara ya Mahakama, Dar Es Salaam, na kuhudhuriwa na Rais Kikwete mwenyewe, Spika wa Bunge la Jamhuri la Tanzania Samwel Sitta na wakuu wa vyombo vya ulinzi na usalama nchini, Jaji Mkuu Ramadhani amemwambia Rais Kikwete:

"Awali ya yote, nachukua nafasi hii kukiri kwa dhati kuwa kwa muda wote huu wa miaka mitatu na ushei ya uongozi wako, Mheshimiwa Rais, hujaingilia mahakama kwa matendo na hata kwa kauli."

Ameongeza Jaji Mkuu: "Hivyo ndugu zangu Maji na mahakimu tumpongeze kwa kishindo Mhe Rais kwa kuwa muumini na kielelezo cha kuheshimu dhana ya mgawanyoÚwa madaraka kwa vitendo na kauli. Mheshimiwa Rais, asante sana." Kauli hiyo ilipokelewa kwa makofi ya pongezi.

Katika kauli inayoonyeswa uwazi mkubwa, Jaji Mkuu ameongeza kumwambia Rais Kikwete: "Waliokutangulia waliwahi kuteleza na kuvunja mwiko huo. Lakini hatuwazungumzii hao na isitoshe, yaliyopita si ndwele."

Katika sherehe ambazo kaulimbiu yake ilikuwa "Nafasi ya Mahakama katika Kutekeleza Shughuli za Mamlaka ya Nchi na Dhana ya Mgawanyo wa Madaraka", Jaji Mkuu pia alieleza jinsi ambavyo Bunge limepata kuteleza katika utekelezaji wa dhana ya mgawanyo wa madaraka kati ya mihimili mitatu ya dola.

"Kwa bahati mbaya, kaka yangu Mhe Spika mara moja tu alighafilika na akatoa matamshi kuhusu sakata la mafuta ya petroli huko Morogoro pale amri ya EURA ya kuvifunga vituo kadhaa vya mafuta ilipositishwa kwa muda na Mahakama ya Hakimu Mkazi. Kauli hiyo ingetolewa ndani na wala sio nje ya Bunge ingekuwa stahili yake."

Ameongeza Jaji Mkuu huyo kuhusu Bunge: " Kwa upande mwingine Bunge liliwahi kutaka liwe na madaraka ya kimahakama dhidi ya watu ambao wanazozana na Waheshimiwa Wabunge. Kwa bahati nzuri wazo hilo halikufanikiwa."

Ameongeza: "Lakini bado Bunge lilichukua kazi ya Mahakama na kusikiliza tatizo kati ya Mhe Malima na Bw. Mengi ambaye si Mbunge."

Wakati huohuo, Jaji Mkuu wa Tanzania ameonya kuwa vyombo vya habari vimeanza kutishia uhuru wa Mahakama nchini kwa kushindwa kutofautisha ukweli (facts) na maoni.

Jaji Mkuu huyo pia amesema kuwa uhuru wa Mahakama pia unatishiwa na mwenendo wa baadhi ya watu ndani ya jamii ya Tanzania, ambao wamejipachika mamlaka ya kushinikiza mahakama kwa kuwahukumu watu ambao hata hawajafikishwa mahakamani.

Jaji Mkuu huyo ametoa tahadhari hizo leo, Ijumaa, Februari 6, 2009, wakati anazungumza katika Siku ya Sheria nchini, sherehe ambazo huashiria kuanza rasmi kwa shughuli za mahakama kila mwaka.

Katika hotuba yake kwenye sherehe hizo zilizofanyika Makao Makuu ya Idara ya Mahakama na kuhudhuriwa na Rais Jakaya Mrisho Kikwete, Jaji Mkuu huyo amesema: "Hivi karibuni limezuka tishio dhidi ya uhuru wa mahakama kutoka Mhilimi wa Nne wa Dola, kama vyombo vya habari vinavyojiita.

Vyombo hivyo havitofautishi kati ya ukweli (facts) na maoni. Baadhi ya vyombo huandika maoni kana kwamba ndio ukweli wenyewe na hii hupotosha wananchi na athari iletwayo haitibiki hata kwa shubiri."

"Kwa mfano, Mhe Rais, mgomo wa walimu ulipigwa marufuku na Mahakama Kuu Divisheni ya Kazi. Uamuzi huo ulifikishwa Mahakama ya Rufani ambayo iliona suala hilo halikuwa limewasilishwa kihalali mbele ya Mahakama Kuu," ameongeza Jaji Mkuu.

Alifafanua: "Hivyo shughuli yote mbele ya Mahakama Kuu ilifutiliwa mbali. Magazeti mengi yaliandika vichwa vya habari kuwa Mahakama ya Rufani imebariki mgomo. Mahakama ya Rufani haikuamua hivyo. Nilimtuma Msajili wa Mahakama ya Rufani atoe maelezo sahihi."
Kuhusu tishio kutoka kwa umma.

Jaji Mkuu amefafanua: "Tatu, mahakama inapaswa kuwa huru na umma ama sehemu ya umma. Hitajio hili nalo ni muhimu sana. Wananchi wanaweza wakaamini mshitakiwa ni mharifu kumbe Mahakama ikamuona siyo."

Ameongeza: "Sasa mahakama isishinikizwe kumtia hatiani mtu ambaye hana hatia. Uhuru huu ni muhimu sana katika nyakati kama hizi za tuhuma zilizo kithiri za ufisadi ambapo baadhi ya wananchi tayari wamekwisha watia hatiani baadhi ya watuhumiwa hata kabla ya kufikishwa mahakamani."

Jaji mkuu pia ameorodhesha mambo mengine yanayoathiri uhuru wa mahakama na kukamisha utendaji bora zaidii yakiwamo mahitaji ya chombo hicho muhimu katika utawala wa nchi.

Rais Kikwete ambaye alikuwa anahudhuria sherehe hizo kwa mara ya pili tokea kuingia madaraka ameoamba kuzungumza kidogo kwenye sherehe hizo, hata kama kwa jadi, kazi yake huwa ni kusikiliza tu na kuiachia mahakama kuongoza ajenda yake yenyewe.

Katika salamu zake fupi, Rais Kikwete ameahidi kuwa atayashughulia matatizo ya mahakama yanayohitaji msukumo wa Serikali, na kuahidi kuwa Bajeti ya Mahakama haitapungua hata kama mapato ya Serikali yameanza kuathiriwa na Zahama ya Kifedha inayoikabili dunia.