Rais Hu Jintao wa China ahitimisha ziara yake bongo

Ndege iliyombeba Rais Hu Jintao wa China na ujumbe wake ikiruka katika uwanja wa ndege wa Mwalimu Julius Nyerere leo asubuhi baada ya Rais huyo kumaliza ziara yake ya kikazi ya siku tatu nchini Tanzania

Mwenyekiti wa CCM Rais Jakaya Mrisho Kikwete akimtambulisha Mwenyekiti wa Chama cha CUF Profesa Ibrahimu Lipumba kwa Rais wa China Hu Jintao wakati wa dhifa ya kitaifa iliyoandaliwa kwa heshima ya Rais huyo wa China Ikulu jijini Dar usiku wa kuamkia leo

JK akimtabulisha mwanaye Khalfan Kikwete(8) kwa Rais Hu Jintao wa China muda mfupi kabla ya Rais huyo kutoa mhadhara katika ukumbi wa Diamond Jubilee leo asubuhi jijini Dar es Salaam.Baadaye Rais huyo aliondoka nchini baada ya ziara yake ya kikazi ya siku tatu.

Rais Hu Jintao amwaga sera ya China kwa Afrika

Na Mwandishi Maalum
RAIS Hu Jintao wa Jamhuri ya Watu wa China, leo, Jumatatu, Februari 16, 2009, ametangaza Sera Mpya ya China kwa Afrika ikiwamo Tanzania, ikiwa ni kilele cha ziara yake ya siku tatu yenye mafanikio makubwa katika Tanzania.

Rais Jintao ametangaza Sera hiyo katika hotuba muhimu aliyoitoa mbele ya viongozi wa Serikali za Tanzania na China, wanasiasa, wanafunzi wa sekondari na vyuo vikuu, wafanyabiashara na wawakilishi wa jumuia ya Wachina katika Tanzania kwenye Ukumbi wa Diamond Jubilee mjini Dar Es Salaam.

Akitangaza Sera hiyo mpya ya China kwa Afrika ikiwamo Tanzania, Rais huyo ameimwagia sifa nyingi Tanzania, akipongeza uhusiano kati ya Tanzania na China, uhusiano ambao umedumishwa na kuimarishwa kwa miaka 45 iliyopitwa.

Akizungumza mbele ya mwenyeji wake, Rais Jakaya Mrisho Kikwete ambaye ndiye amemtambulisha mgeni wake kwa hadhara hiyo, Rais Jintao amesema: “Tanzania ni asili ya Binadamu, kisiwa cha amani katika Afrika, mfano usiokuwa na kifani wa uhusiano kati ya China na Afrika, na mfano halisi wa uhusiano kati ya nchi zinazoendelea za Kusini.”

“Kama isemavyo methali ya Kichina, ‘hakuna lolote linaloweza kuwatenga watu wenye shabaha na azma moja, hata milima na bahari haziwezi. Kwa miaka 45 tokea Tanzania na China kuanzisha uhusiano rasmi wa kibalozi wananchi wa nchi hizi mbili wameshirikiana katika mengi. Katika miaka ya 1950 na 1960 tulisimama bega kwa bega kutafuta uhuru.

Watanzania ni marafiki wa kweli, ni marafiki wa kudumu, ni marafiki wa kuaminika, na siku zote tutabakia marafiki na wananchi wa Tanzania na Waafrika wote,” amesema Rais Jintao.

Amesema kuwa katika miaka ya karibuni uhusiano wa Afrika na China umeimarika zaidi kwa kuongezeka kwa mahusiano ya mara kwa mara ya kisiasa, kuongezeka kwa shughuli za uchumi na biashara kati ya pande hizo mbili, na thamani ya biashara kati ya Afrika na China kufikia kiasi cha dola za Marekani bilioni moja mwaka jana, ikiwa ni mara ya kwanza katika historia ya uhusiano kati ya pande hizo.

Ametaja baadhi ya miradi mikubwa ambayo China imegharimia katika Afrika kuwa ni pamoja na ujenzi wa Makao Makuu ya Umoja wa Afrika (AU) ambayo yanajengwa mjini Addis Ababa, Ethiopia.

Rais Jintao ametangaza kuwa Sera hiyo mpya ya China kwa Afrika itaongozwa na misingi mikuu sita ambayo ni pamoja na kutaka Afrika na China kuimarisha mshikamano ili kwa pamoja kuweza kukabiliana na changamoto za kiuchumi ambazo zinaikabili dunia kwa sasa.

Katika msingi huu, Rais Jintao ameihakikishia Afrika kuwa nchi hiyo haitapunguza misaada yao kwa Afrika pamoja na hali mbaya ya kiuchumi duniani, akiongoza kuwa, kwa hakika, China itaongeza kiwango cha misaada kwa Afrika, itapanua biashara na Afrika na kuongeza uwekezaji katika bara hilo kwa kadri nafasi inavyoruhusu.

Msingi wa pili, Rais Jintao amesema ni kuongeza kiwango cha kuaminiana na kuimarisha mahusiano ya kisiasa na maelewano ya jadi.

Katika hili, Rais Jintao amesema kuwa China itaendelea kushiriki na kuchangia katika shughuli za kulinda amani katika maeneo mbali mbali ya Afrika yanayohitaji kuungwa mkono kwa namna hiyo.

Rais Jintao amesema kuwa msingi wa tatu ni kuongeza kiwango cha ushirikiano wa utendaji wa kiuchumi na biashara kwa misingi ya nipe nikupe na kwa manufaa ya pande zote mbili.

Amesema katika hili, China itaendelea kuimarisha biashara na Afrika, kutilia maanani mahitaji ya Afrika kwa kadri ya uwezo wake, na kuchukua hatua za upendeleo kuruhusu bidhaa za Afrika kuingizwa katika China.

Rais Jintao amesema kuwa msingi wa nne umuhimu wa kupanuliwa kwa mahusiano kati ya watu wa Afrika na wa China na kuongeza mahusiano ya kiutamaduni baina ya watu wa pande hizo mbili.
Katika hili, Rais Jintao amesisistiza kuwekwa msisitizo maalum maeneo ya utamaduni, elimu, afya, michezo, utalii na maeneo mengine.

Pia amesisitiza haja na hoja ya kujenga mahusiano kati ya vijana na wanawake pamoja na taasisi zisizokuwa za kiserikali, vyombo vya habari na maeneo mengine ya kiutamaduni.

Tano, amesema kuwa nchi za Afrika na China lazima zifanye kazi kwa pamoja na kuongeza ushirikiano katika masuala ya kimataifa.

Amesisitiza kuwa China itaimarisha uhusiano wake na Afrika katika Umoja wa Mataifa, katika Shirika la Biashara Duniani (WTO) na taasisi nyingine za kimataifa.

Rais Jintao pia amesema kuwa chini ya msingi huu, China itashirikiana zaidi na Afrika katika kupambana na changamoto za mabadiliko ya hali ya hewa duniani, masuala ya usalama wa chakula, jitihada za kuondoa umasikini na maendeleo kwa jumla.

Msingi wa sita na wa mwisho ni kutaka ongezeko la ushirikiano na kwa pamoja Afrika na China kuendeleza ushirikiano kupitia katika taasisi ya Forum on China-Africa.

Mara baada ya hotuba yake hiyo muhimu, Rais Jintao ameondoka nchini kuelekea Mauritius ikiwa ni nchi yake ya tano na mwisho kuitembelea katika ziara yake ya Afrika.

Kwenye Uwanja wa Ndege wa Kimataifa wa Dar Es Salaam, Rais Jintao ameagwa na mwenyeji wake, Rais Jakaya Kikwete na maofisa wa Serikali za Tanzania na China.