malenga wetu

'MAEMBE'' AINA ZAKE NI NGAPI?

1.Ulimwenguni matunda,ni mengi yaso kifani,
Idadi yananishinda,kuhesabu sibaini,
Ila embe nalipenda,linanikidhi moyoni,
Jamani nijulisheni,aina zake ni ngapi?

2.Aina zake ni ngapi,wajuzi nijulisheni,
Au ni vitabu vipi, vilochambua makini,
Nipate japo ni kopi,nidurusu nibaini,
Jamani nijulisheni,aina zake ni ngapi?

3.Dodo ninalifahamu,limeshinda kwa thamani,
Hili halinishi hamu,kwangu ni nambari wani,
Sifa na wake utamu,limepasi mtihani,
Jamani nijulisheni,aina zake ni ngapi?

4.Ninalijua viringe,nalijua kwa undani,
Hili kwa mimi Mayange,namba mbili hesabuni,
Sitoingia mkenge,nilionapo gengeni,
Jamani nijulisheni,aina zake ni ngapi?

5.Tabu inapoanzia,ninapofika sokoni,
Fungu linapoanzia,la kwanza na la mwishoni,
Nashindwa tofautia,lipi niweke begani,
Jamani nijulisheni,aina zake ni ngapi?

6.Akianza muuzaji,kuyanadi mnadani,
Hili hapa embe maji,nyonyo ni lile pembeni,
Haya yatoka Rufiji,yale pale ya Pangani,
Jamani nijulisheni,aina zake ni ngapi?

7.Yale yalio kibao,wanunuzi yaoneni,
Yamechumwa leoleo,mali kutoka mtini,
Jina ni embe popoo,hayana dosari ndani,
Jamani nijulisheni,aina zake ni ngapi?

8.Yako mengine kwa pombe,ndiyo yake dizaini,
Sijui yaitwa kwembe,embe papai nadhani,
Ukitwika hiyo pombe,uharo u hatarini,
Jamani nijulisheni,aina zake ni ngapi?

9.Mengine ni kwa achali,majina sijabaini,
Si matamu ni makali,yasisimsha mwilini,
Mango piko pilipili,nayo ni maembe gani?
Jamani nijulisheni,aina zake ni ngapi?

10.Kwa hesabu nimeshindwa,nimefeli mtihani,
Nawaachia wapendwa,nyie magwiji wa fani,
Edita wangu mpendwa,liweke ukurasani,
Maembe yalivyo mengi,aina zake ni ngapi?

Na Mdau M. A. MGAMBA