Hoja ya Haja: Libeneke la TUCTA Vs Serikali

Kaka Michuzi,
Kwanza nakutakia mfungo mwema wewe

na waislam wengine popote ndani na nje ya Tanzania.

Nimeona niandike haka kameseji kadogo kwa Watanzania wenzangu kuelekea kipindi hiki cha uchaguzi. Na kameseji kangu ni juu ya malumbano yaliyoshika kasi kipindi cha hivi karibuni kutokana na kauli kama mbili tatu zenye utata kutoka kwa kiongozi wa waajiri (Serikali) Mh. Rais wa JMT na kauli nyingine ya kutoka kwa Kiongozi wa vyama vya wafanyakazi TUCTA.

Nachopenda kukizungumza ni kusikitishwa kwangu na namna upande wa serikali unavyoshughurikia hilo tatizo. Kumekuwa na press conference nyingi za watendaji waandamizi wa serikali tena wa kada za juu na matamko mengine yasiyo rasimi. Wote kwa pmoja wanasema TUCTA inakiuka, Sheria na Taratibu kujaribu kumpigia chapuo mgombea mmoja. Juu ya hilo mimi sijui kama serikali wapo sahihi au laa, wala sihitaji kulijadiri.

Kinachonisibu ni hivi, Je, Huu ndio utaratibu unaopaswa kufuatwa na serikali yetu kujibizana wafanyakazi kupitia media? Mimi binafasi kwa mtazamo wangu naona serikali inakosea na kwa kufanya hivyo inalifanya suala la TUCTA kuwa kubwa. Kwanza baada ya mheshimiwa Rais kutoa tamko kiitifaki haitakiwa watu wa chini yake kuendelea na matamshi labda wawe wametumwa na Rais mwenyewe. Mh. Rais alishasema msimamo wa serikali sasa hawa watumishi wa chini ya rais wanatoka na vitamko kila kukicha vya kusema nini? Hawa wanamchonganisha Mh. Rais/serikali na wananchi.

Hawa wanasiasa na watendaji wetu na wanaelewa taratibu, huwezi kwenda habari malezo ukatoa ujumbe unaomlenga kumfikia katibu mkuu wa TUCTA, ukidhani Mgaya kama katibu mkuu wa TUCTA ameupata? Una uhakika gani hajaenda kuzika ndugu yake huko Ludewa ambako hata gazeti halifiki? Tumewapa simu na fax ofisini kwao, tunalipia bili za simu hizo kwa ajili ya nini? Kwanini hawawezi kumpigia katibu mkuu wa TUCTA kumuomba kama sio kumuamrisha wazungumze? Tumewanunulia computer tumewaungia na Internet masaa yote wanatumia hizo internete kufanya nini??? Badala ya kukaa kwenye computer hizi wakaomba mkutano na TUCTA kwa njia ya chati, SKYPE, hata wakatumia hata kuandikiana e-mail na kujibizana kufikia muafaka wanatoka na kukaa vibarazani hapo habari maelezo na kutusumbua wakulima ambao sisi wenyewe tunawaza bei ya kahawa na kama tutapaa mvua next year. Kibaya zaidi wana ma-land cruiser yetu, tumewanunulia ili waweze kuyakimbiza zinapotokea emergency kama hizi, huyu bwana wa utumishi wa umma (kwa mfano) angeenda na lile cruiser lake ofisini kwaMgaya akamwambia anamthamini Mgaya kama mtanzania na zaidi kama mfanyakazi na anatambua mchango wa wafanyakazi sio tu katika ujenzi wa taifa hili lakini pia katika siasa za Tanzania, sasa basi, anamuomba waongee kesho au siku yoyote kungekuwa na shida gani??

Muda umefika sasa wa serikali kujua kuwa haipo juu ya wananchi wake? Serikali imewekwa na sisi wananchi ili itutumikie? Serikali inawajibika kwetu na si vinginevyo. Kauli za ubabe na vitisho haziwezi kuisaidia serikali kutawala. Serikali zilizofanikiwa kuongoza vizuri duniani kote ni zile zilizoongoza kwa kufuata utawala wa sheria na taratibu. Hawa watumishi waliotoka na kauli za vitisho wanamuabisha JK, sio hulka yake, hawa ndio wanamshauri vibaya Rais, wanatumia vibaya ofisi zao na madaraka yao? Kwanini hawatakai kuona kuwa wafanyakazi nao ni Watanzania wenye haki ya kusikilizwa na kuzungumza nao wanakimbilia kwenye magazeti, redio na TV?

Natoa wito watedaji wakuu wa serikali waache kutujaza hasira wananchi, watafute njia nyingine muafaka ya kushughurikia suala la wafanyakazi. Serikali watafuteni TUCTA zungumzeni, sisi kama wananchi tungependa kusikia kuwa serikali na TUCTA wamefikia muafaka huu, Kwishney!!! Hizi blaa blaa zingine hazituhusu.

Naamini Serikali yangu itanisikiliza kwa masrahi ya Watanzania na amani ya nchi yetu.
Mungu Ibarki Tanzania
Hekima,Umoja na Amani
Zibaki kuwa ngao zetu
Jackson Mbogela
Mdau wa Makete