mashindano ya kusoma hotuba kwa kiswahili yafana huko japan

Balozi wa Tanzania nchini Japani Mh. Salome Sijaona akimkabidhi kombe Bi. Tomomi Kosugi baada ya kuibuka mshindi katika mashindano ya 20 ya kutoa hotuba kwa lugha ya Kiswahili ya kuwania tuzo la mwasisi wa Chuo Kikuu cha Soka cha nchini Japani Bw. Daisaku Ikeda.

Mdau Anna Kwambaza wa Ubalozi wa Tanzania nchini Japani akichati na baadhi ya wadau wa lugha ya Kiswahili katika Chuo Kikuu cha Soka.

Francis Mossongo, Afisa ubalozi wa Tanzania nchini Japani na Raphael Mwenda, Afisa ubalozi wa Congo-DRC katika mnuso pamoja na wadau wa Kiswahili chuo cha Soka.

Baadhi ya washiriki wa shindano hilo la Kiswahili wakipiga makofi mara baada ya mmoja kati yao kutangazwa ni mshindi.

Balozi wa Tanzania nchini Japani Mh. Salome Sajaona leo amepongeza uamuzi wa Chuo Kikuu cha Soka cha nchini Japan kwa kutambua umuhimu wa kuienzi lugha ya Kiswahili nchini Japani na hasa katika Chuo kikuu hicho.

Akizungumza wakati wa mashindano ya kutoa hotuba ya Kiswahili kuwania tuzo la mwasisi wa Chuo cha Soka, Bwana Daisaku Ikeda, Balozi Salome alisema lugha ya Kiswahili ni moja ya lugha muhimu duniani na inatumika kama chombo cha mawasiliano na katika Afrika Mashariki Kiswahili ni lugha ya upendo, amani, mshikamano na umoja, akitolea mfano wa Tanzania ambako imeweza kuunganisha makabila zaidi ya 120.

Ujumbe wa mwaka huu katika mashindano hayo ilikuwa: "Kutoka Japani, tusambaze mbegu za amani kote duniani; nuru ya jua inamaanisha nini kwangu mimi?"

Balozi Salome alitumia fursa hiyo kuwahamasisha wanachuo wa Soka kuendelea kujifunza Kiswahili na kufanya ziara katika nchi za Afrika Mashariki ambalo ndiko chimbuko la Kiswahili ili kujiimarisha zaidi katika lugha hii.