Dk. Bilal asisitiza matumizi ya teknolojia ya Biogesi

Makamu wa Rais wa Jamhuri ya Muungano wa Tanzania Mhe. Dk. Mohamed Gharib Bilal, akizungumza na Maofisa Kilimo wa Wilaya ya Arusha wakati alipotembelea shamba la mkulima Suleiman Juma ambae ni mkulima wa mfano aliyepata maendeleo makubwa kwa kutumia Nishati ya BIOGES mjini Arusha leo. Kushoto kwake ni Mkuu wa Mkoa wa Arusha Mh. Isodore Shirima akifuatiwa na Waziri wa Nishati na Madini Mh. William Ngeleja

Mtaalam wa mambo ya umeme katika Taasisi ya Kitaifa ya Utafiti wa Teknolojia ya maendeleo ya Nishati ya Kilimo na Ufugaji CAMARTEC Msafiri Mhumwe akimuonesha Makamu wa Rais wa Jamhuri ya Muungano wa Tanzania Mhe. Dk. Mohamed Gharib Bilal, moja ya aina ya taa na baadhi ya vifaa vinavyotumia Nishati Jadidifu ya BIOGES kwenye uzinduzi wa Program mpya ya BIOGES katika ngazi ya kaya, uliofanyika leo katika viwanja vya Themi mjini Arusha. Katikati Waziri wa Nishati na Madini Mhe.William Ngeleja na Naibu Waziri wa Viwanda na Biashara Mhe. Lazaro Nyalandu.

Mtaalam wa kufua mafuta kwa kutumia mashine ya kienyeji katika Taasisi ya Kitaifa ya utafiti wa Teknolojia ya maendeleo ya Nishati ya kilimo na ufugaji CAMARTEC Abubakar Mwenda, akimuonesha Makamu wa Rais wa Jamhuri ya Muungano wa Tanzania Mhe. Dk. Mohamed Gharib Bilal, utengenezaji na ukamuaji wa mafuta ya Alizeti kwa kutumia mashine hiyo, kwenye uzinduzi wa Program mpya ya BIOGES katika ngazi ya kaya uliofanyika leo viwanja vya Themi Mjini Arusha. Katikati Waziri wa Nishati na Madini Mhe.William Ngeleja , Naibu Waziri wa Viwanda na Biashara Mhe. Lazaro Nyalandu kulia Mkuu wa Mkoa wa Arusha Mhe. Isidore Shirima.

Makamu wa Rais wa Jamhuri ya Muungano wa Tanzania Mhe. Dk. Mohamed Gharib Bilal, akiangalia Vifaa vya aina mbalimbali vinavyotumia nishati ya BIOGES vinavyotengenezwa na Bw. George Traser kutoka katika kampuni ya Kakute ya Ujerumani, kwenye uzinduzi wa Program mpya ya BIOGES katika ngazi ya kaya uliofanyika leo kwenye Viwanja vya Themi mjini Arusha.

Mkulima wa mfano aliyepata maendeleo makubwa kutokana na kutumia Nishati ya BIOGES Mkoani Arusha Bw. Suleiman Juma, akimfahamisha Makamu wa Rais wa Jamhuri ya Muungano wa Tanzania Mhe. Dk. Mohamed Gharib Bilal juu ya uandaaji na matumizi ya Nishati hiyo, wakati Makamu wa Rais alipomtembelea mkulima huyo shambani kwake Arusha leo, kabla ya kuzinduwa rasmi Program mpya ya BIOGES katika ngazi ya kaya. Katikati Waziri wa Nishati na Madini Mhe. William Ngeleja na Naibu Waziri wa Viwanda na Biashara Mh. Lazaro Nyalandu . Picha na mdau Amour Nassor wa VPO

Na Penzi Nyamungumi – Arusha

Makamu wa Rais Dk. Mohammed Gharib Bilal amesisitiza matumizi ya teknolojia ya Biogesi nchini kwa maendeleo ya wananchi vijijini.

Alisema hapa nchini takriban asilimia 14 tu ya Watanzania ndio wanaotumia nishati ya umeme na kwamba hali ni mbaya zaidi vijijini wanakoishi takriban asilimia 80 ya Watanzania ambapo ni asilimia 2.5 tu ndio wanaotumia umeme kutokana na uwezo mdogo wa kifedha wa wananchi wakati upatikanaji wa nishati hizo nao hautoshelezi.

Akizungumza kwenye hafla ya uzinduzi wa programu ya uenezi wa Biogesi ngazi ya kaya mjini Arusha Dk. Bilal alisema teknolojia ya biogesi ina sifa ya kuwa nishati safi, endelevu na yenye gharama nafuu na hivyo ni muhimu kuwapatia wananchi ili kuboresha maisha yao.

“Asubuhi ya leo nimepata fursa ya kuitembelea familia ya mtumiaji wa biogesi hapa Arusha, kuona nini kinaendelea katika matumizi ya biogesi na tumeshuhudia namna walivyobadilisha maisha yao,” alisema Dk. Bilal.

Aidha alisema amejionea pia ubunifu wa wananchi katika maonesho yaliyokuwa yameandaliwa wakati wa uzinduzi huo ambapo hakutegemea baadhi yao kufikia hatua ya kutengeneza majiko ya gesi jambo ambalo linaonesha kuunga mkono juhudi za serikali za kuhimiza utumiaji wa gesi ili kupunguza matumizi nishati ya mkaa na kuni ambayo yana athari kubwa kwa mazingira na afya za watumiaji hususan akina mama.

“Tanzania ina gesi nyingi asilia na mtazamo wetu kuwa miaka ijayo tutaitumia kwa matumizi ya nyumbani. Wito wangu kwa vyuo vya ufundi vya VETA vianze kuandaa vijana ambao watakuja kubuni teknolojia za kutusaidia,” alieleza.

Alisema teknolojia ya biogesi ina manufaa katika Nyanja ya ugavi, nishati vijijini, kilimo, afya, usafi wa nyumbani, uhifadhi wa mazingira na hivyo inachangia katika kufanikisha malengo na sera mbalimbali za serikali za kupunguza umaskini na hatimaye kuwaletea maendeleo wananchi.

“Matokeo ya program ya kueneza teknolojia ya Biogesi yanaleta manufaa funganishi yanayohusisha sekta ya kilimo na mifugo, uongezaji ajira, uhifadhi wa mazingira na nishati kwa pamoja. Hili ni suluhisho endelevu kwa matatizo ya nishati vijijini na uharibifu wa mazingira,” alisema Dk. Bilal

Makamu wa Rais alitoa wito kwa Kituo cha zana za kilimo na teknolojia vijijini (CAMARTEC) kujiandaa na kazi kubwa ya uenezi wa biogesi nchini ili kuwawezesha wananchi wengi zaidi wa vijijini kutumia nishati hiyo kwa maendeleo endelevu.

Mapema, akitoa taarifa Naibu Waziri wa Viwanda, Biashara na Masoko Lazaro Nyalandu alisema programu ya biogesi ambayo ilianza mwaka 2009 hadi sasa imeenea katika mikoa 11 nchini na kueleza matumaini yake kwamba ikienea nchi nzima itapunguza ukataji wa miti na hivyo kuokoa hekta zipatazo 8,000 za misitu.

Utekelezaji wa program hiyo unafanywa na CAMARTEC chini ya usimamizi wa Wizara ya Viwanda,Biashara na Masoko na kufadhiliwa kwa pamoja na Serikali ya Uholanzi, mashirika ya HIVOS na SNV.

Kwa mujibu wa Nyalandu mwezi Julai mwaka 2010 Tanzania ilikuwa nchi ya kwanza kati ya nchi tisa za Afrika zinazotekeleza program hiyo kwa kujenga zaidi ya mitambo 100 na hivyo kupewa zawadi ya Ngao ya Afrika ya Biogesi na vile vile Disemba mwaka jana Tanzania ilikuwa nchi ya kwanza katika Bara la Afrika kuwa na mitambo 1021 ya Biogesi.