TANZANIA KUSHIRIKIANA NA IRAN KUKABIRI WIZI WA KAZI ZA WASANII

Veronica Kazimoto na Aron Msigwa –MAELEZO, Dodoma.

Tanzania imeshauriwa kutumia mbinu mbalimbali zinazotumika katika nchi ya iran ili kukabiriana na wimbi la wizi wa kazi za wasanii.

Ushauri huo umetolewa leo na Naibu waziri wa filamu na Sanaa za Maigizo wa Iran Javad Shamaqdar wakati akizungumza na Waziri wa Habari, Vijana Utamaduni na Michezo Dkt. Emmanuel Nchimbi mjini Dododma.

Naibu Waziri huyo amesema wizi wa kazi za wasanii nchini kwake kwa kiasi kikubwa umepungua kutokana na juhudi mbalimbali zinazofanyika ikiwemo usambazaji wa kazi za wasanii maeneo yote ya nchi kwa wakati mmoja mara zinapotoka.

Amesema njia hii husaidia sana kupunguza wizi wa kazi za wasanii kwa kuwa mikanda ya picha za video, Dvd na ile ya mfumo wa sauti (CDs) hupatikana kwa wingi kila mahali na kwa bei nafuu ambayo hata mwananchi wa kipato cha chini anaweza kumudu kununua kazi hizo.

“Nchi yangu kwa mfano, mara kazi mpya ya msanii inapotoka wasambazaji huhakikisha “cd” zinafika karibu maeneo yote ya nchi na kwa bei nafuu kiasi kwamba mwananchi hashawishiki kununua cd za mitaani” Amebainisha Shamaqdar.

Mbinu nyingine aliyoitaja inayotumika iran ni ile ya kuwashirikisha viongozi mbalimbali wa dini ambao hutumia mahubiri na mawaidha yao kwenye nyumba za ibada kukemea watu wanaonunua kazi za wasanii zisizo halisi (original).

“Viongozi wetu wanatusaidia sana kupunguza wizi wa kazi za wasanii kwa kupitia mahubiri na mawaidha yao kwa kuwasihi waumini wao kutonunua kazi zisizo halisi (feki) kwani kwa kufanya hivyo ni sawa na wizi kitu ambacho ni dhambi mbele za mwenyezi mungu”.

Ameelezea njia nyingine kuwa ni kushirikiana na jeshi la polisi, mahakama na watengenezaji wa kazi za wasanii (producers) kuhakikisha wanawakamata wezi wa kazi za wasanii na kuharibu kazi walizonazo pindi wanapowakamata pamoja na kuwatoza faini.

Hata hivyo Naibu waziri huyo wa Iran amefurahishwa na hali ya amani na utulivu na mshikamano uliopo nchini Tanzania ambao umechangiwa kwa kiasi kikubwa na watanzania wenyewe kuheshimiana na kutobaguana kwa misingi ya dini, kabila wala rangi na pia hali ya kuheshimu na kudumisha utamaduni uliopo.

Kwa upande wake waziri wa Habari, Vijana, Utamaduni na Michezo Dkt. Emanuel Nchimbi amemshukuru kiongozi huyo na ugeni alioambata nao nchini Tanzania huku akikiri Tanzania kukumbwa na tatizo hilo la wizi wa kazi za wasanii na kuahidi kuwa wizara yake inafanya mpango wa kushirikiana na nchi ya Iran ili kubadilishana uzoefu wa kukabiliana na tatizo la wizi wa kazi za wasanii.

Aidha Dkt. Nchimbi amefafanua kuwa Tanzania inaweza kushirikiana na nchi ya Iran katika matumizi ya lugha ya Kiswahili katika tasnia ya filamu za Iran kwa kuwa inao wataalam wa kutosha wa lugha hiyo ambayo hivi sasa inatumiwa katika maeneo mbalimbali duniani ikiwemo kukubaliwa kutumika katika mikutano ya Umoja wa Afrika.