TAARIFA KWA WADAU WA GLOBU YA JAMII: MICHUZI BLOG YATIMIZA MIAKA SITA LEO

Wapendwa Wadau wa Globu ya Jamii,

Kwa heshima, taadhima na unyenyekevu mkubwa tunapenda kuwakumbusha kwamba Septemba 8, 2011 Michuzi Blog inatimiza miaka sita toka kuzaliwa kwake kule Helsinki, Finland,  siku kama hii.

Awali ya yote tunapenda kutoa shukurani zetu nyingi kwenu nyie wote, bila kujali wapi ulipo ama umekuwa ukitembelea Globu ya Jamii kuanzia lini, kwani sapoti yenu iwe kwa uchache ama kwa uwingi ina maana kubwa sana sana kwa  timu nzima ya Michuzi Blog.

Katika kuadhimisha siku hii adhimu, ambayo kwa bahati mbaya hatutoiadhimisha kwa sherehe za aina yoyote kutokana na mambo yaliyo nje ya uwezo wetu na mikononi mwa Mola, ni vigumu kumtaja kila mmoja wenu kwa jina kwa msaada na sapoti mliyotupa muda wote huu.

Pamoja na hivyo, tunaomba kwa unyenyekevu mkubwa tuwataje wachache ambao sio tu watawakilisha kadamnasi nzima, bali pia michango yao imekuwa chachu kwa uhai wa Michuzi Blog ambayo kwa matakwa yake MAANANI inaendelea na Libeneke kama imeanza jana, na kubwa hapa ni kuaminiwa na wewe mdau kwa asilimia kubwa.

Tunaomba tuanze na Kaka Ndesanjo Macha, aliyembatiza Ankal katika fani hii. Bila yeye na Ankal kukutana na kubadilishana mawazo pale Finlandia Hall jijini Helsinki Septemba 8, 2005, Globu ya Jamii isingezaliwa. Pamoja naye tunamshukuru sana sana kaka Fidelis Tungaraza 'Mti Mkubwa', ambaye ni mdau wa kwanza kuchangia mawazo na hekima katika kufanikisha hiki kidogo tulichonacho. Mbarikiwe sana Fide na Ndesanjo.

Shukrani zetu nyingi ziende kwa Benki ya CRDB ambayo ilikuwa ya kwanza kuona umuhimu wetu na  kutudhamini kwa mara ya kwanza kabisa mwaka 2007. Bila CRDB uwezekano wa kupata wadhamini wengine ungekuchua muda sana, kwani ni wachache walioona umuhimu wa kusaidia katika hili. Asante sana CRDB.

Shukrani za pekee ziwaendee MK COMPUTER TWEAKS ambao ni wabunifu wa Globu ya Jamii. Yaani,  Hiki unachoona hapa kimesababishwa na wao. Ahsante sana sana Christopher Makwaia. Hatuna la kusema zaidi ya shukrani hizi. Ubarikiwe  kaka.

Tutakuwa watovu wa fadhila kama kwa kipekee kabisa tusipoitaja VODACOM TANZANIA kwa kuwa wafadhili wetu wakuu kwa miaka mitano  mfululizo. Hakika ufadhili wa kampuni hii pendwa ya mawasiliano imefanikisha mengi ya Globu ya Jamii kiasi hata tukiorodhesha fadhila zote ilizotupatia itachukua ukurasa wote huu na bado tusiwe tumetaja robo tu ya fadhila hizo. Asante sana VODACOM. Tunawashukuru, tuwawapenda na tunawaheshimu mno.

TANZANIA BREWERIES LIMITED (TBL) pia mmekuwa wahisani wetu wakubwa kwa muda usiopungua miaka minne sasa, ambapo mchango wenu kwetu na jamii kwa jumla ni wa kuigwa. Azma yenu ya kutimiza maana halisi ya  social responsibility daima itakuwa mioyoni mwetu. Kupitia kilaji chenu pendwa cha NDOVU PREMIUM LAGER hakika tumeweza kufika hapa tulipo leo. Asante sana TBL.

Bila kumaanisha umuhimu mkubwa ama mdogo katika uhisani, wapendwa wahisani wengine ambao shukrani zetu twazituma ni pamoja na  Benki ya Jamii ya NMB, Benki mama ya mabenki nchini ya NBC, Shirika la mfano la ndege la PRECISION AIR,  kampuni inayoongoza kwa usafiri ya SKYLINK TOURS AND TRAVEL , Kiota cha maraha na ukarimu wa Mtanzania cha GIRAFFE OCEAN VIEW HOTEL na wengine wote wanaotufadhili.

Pia  tunapenda kutoa shukrani kwa wakuu na watendaji wanaotupa moyo na sapoti kila kukicha wa a Ikulu za Dar es salaam na Zanzibar, Mawaziri, Bunge la Jamhuri ya Muungano wa Tanzania bila kusahau Taasisi za Serikali na za binafsi. Tunashukuru sana, sana sana waheshimiwa.

Shukurani za ziada ziawaendee pia wawakilishi wetu nchini na nje ya nchi. Hapa nyumbani tuna furaha na fahari kuwataja Jeff Msangi wa BongoCelebrity, Ahmad Michuzi wa JIACHIE BLOG, Othman Michuzi wa MTAA KWA MTAA BLOG, Woinde Shizza na Dickson Busagaga wawakilishi wetu Kanda ya Kaskazini, Audax Mutiganzi wa Kanda ya Ziwa, John Nditi wa Morogoro, Muhidin Amri wa Kanda ya Kusini, Francis Godwin wa Iringa, G. Sengo wa Mwanza, MBEYA YETU BLOG wa Mbeya na wengine wote mnaotusaidia.

Ughaibuni nianze na Kamanda wa FFU Ras Makunja wa Ujerumani na kundi lake kabambe la Ngoma Afrika, DJ Luke Joe wa VIJIMAMBO wa Washington DC, kaka Abou Faraji wa TZ UK London, Freddy Macha wa London, kaka Frank Eyembe na kikosi kazi chake cha Urban Pulse cha Reading, UK, Sporah Njau wa London, Jestina George wa London, Da’Chemi Chemponda na Da’Subi wa Marekani na wote wengine.

Kama mnavyoona orodha ni  ndefu sana, kiasi ya kwamba hatuna budi kuwataka radhi wale wote ambao hatukuwataja kwa majina ama nafasi zao. Tunaomba itoshe tu kwa kusema wote tunawapenda, tunawashukuru na kuwajali.

Mwisho ni shukurani kwa walezi wetu ambao kwa kweli tunajihisi ni wenye bahati kubwa kupata Baraka zao kila siku.Mh JK tunakushukuru kwa yote. Mzee Benjamin Mkapa na Alhaj Ali Hassan Mwinyi tunawaombea maisha marefu, maana misaada yenu ya mawazo kupitia wasaidizi wenu ni hazina kwetu.  Dr Asha-Rose Migiro (ulikuwapo Helsinki Michuzi Blog ilipozaliwa)Ubarikiwe kwa yote. Balozi Mwanaidi-Sinare  Maajar, Balozi Peter Kallaghe na naibu Balozi Chabaka Kilumanga na Balozi Mohamed Maharage tunaona fahari na heshima ya kipekee kuwa karibu nanyi. Profesa Mark Mwandosya na Mama Lucy Mwandosya tunakushukuru na tunakuombea Mola akupe ahueni huko uliko. Dr Emmanuel Nchimbi ahsante sana sana. Mh Sethi Kamuhanda asante sana kwa kutupa faraja na moyo. Mh Freeman Mbowe, Mh Zitto Kabwe tunashukuru kwa kutuunga mkono. Kaka Eric shigongo na vijana wako tunashukuru mno kuwa karibu nasi. Dada Regina Mengi ushauri wako tunauenzi daima.

Tunaomba tusishie hapa kwani orodha ni ndefu mno.

-MICHUZI