Mbunge wa Moshi Mjini akutana na viongozi wa dini ya Kiisalmu mkoa wa Kilimanjaro

 Mbunge wa jimbo la Moshi mjini Philemoni Ndesamburo akiteta jambo na viongozi wa dini ya kiislamu.

 Mbunge wa jimbo la Moshi mjini Philemoni Ndesamburo akizungumza na viongozi wa dini ya kiislamu mkoa wa Kilimanjaro(hawako pichani)

 Sheakh wa wilaya ya Siha ,Sheakh Mlewa akichangia hoja katika mkutano wa viongozi wa dini ya kiislamu na mbunge wa jimbo la Moshi mjini Philemoni Ndesamburo.

 Meya wa manispaa ya Moshi Jafary Michael akizungumza katika mkutano na viongozi wa dini ya kiislamu mkoa wa Kilimanjaro(hawako pichani).

Viongozi wa dini ya kiislamu mkoa wa Kilimanjaro.

Na Dixon Busagaga wa globu ya jamii Moshi .

WAKATI serikali ikiwa imeshatoa msimamo wake juu ya suala la Mahakama ya kadhi,Mbunge wa Moshi mjini(CHADEMA),Philemon Ndesamburo ameahidi kusimama kidete kutetea waumini wa kiislamu kuitaka serikali kuanzisha mahakama hiyo.

Ndesamburo aliyasema hayo mwishoni mwa wiki katika hotel ya Keys mjini hapa wakati akizungumza na waumini wa kiislamu ikiwa ni sehemu ya mipango yake kusikiliza na kujadiliana na makundi hayo kuisadia jamii 

katika masuala mbalimbali.

Alisema haoni sababu kwa serikali kukataa kuanzishwa kwa mahakama hiyo ikiwa wameweza kutenga mabilioni ya fedha kuendesha vyama vya siasa na masuala mengine yasiyo na tija kwa maendeleo ya taifa.

“Kama mbunge wenu sioni sababu ya serikali kukataa kuanzisha mahakama ya kadhi, waislamu wana masuala yao ambayo wangependa kuyashughulikia….wakati ikikataa kufanya hivyo serikali hii hii inatenga mabilioni kuendesha vyama vya siasa”alisema.

Ndesamburo aliitaka serikali katika kutenda haki dhidi ya waumini hao ni vyema ikaandaa bajeti kila mwaka kati ya Bil 2 hadi 3 kwa ajili ya Waislamu na wakikristo ili  kuendesha masuala yao kulingana na mipango wanayojiwekea.

“Serikali yetu haina dini, mimi sitetei kundi moja lipewe na lingine liachwe, wote wapewe fungu fulani la fedha kuendesha mambo yao ili mradi wasikiuke katiba ya nchi …hii itasaidia kuondoa misuguano isiyo ya lazima”alisema.

Alisema madhehebu ya dini yamekuwa yakihudumia watanzania kiroho na kimwili kwa kuanzisha miradi mingi ya maendeleo ikiwamo ya Elimu,Afya, Maji na Kilimo ingawa baadhi ya masuala yalipaswa kutekelezwa na 

serikali.

Akizungumza kwa niaba ya wenzake , mmoja wa wajumbe wa waumini wa kiislamu mkoani Kilimanjaro, Shekh Mlewa kutoka wilayani Siha alimtaka Mbunge huyo ambaye pia ni mwenyekiti wa Chadema mkoani humo kufuta 

dhana iliyojengeka kuwa chama hicho ni cha kikristo.

Alisema dhana ya kwamba chama hicho ni cha kikristo inafuatia chama hicho kutotoa tamko lolote wakati rais Jakaya Kikwete alipotoa msimamo wa serikali kwamba haitaweza kuunda mahakama hiyo bali ni jukumu la 

waislamu wenyewe.

Mapema mwaka jana akizungumza na waislamu katika baraza la Idd El Fitri lililofanyika Septemba mosi mjini Dodoma, Rais Kikwete alisema Serikali haitaanzisha Mahakama ya Kadhi na kwamba badala yake Waislamu 

 wenyewe ndiyo waanzishe mahakama hiyo.

Pamoja na kauli hiyo lakini pia rais alisema Mahakama ya Kadhi haitowekwa ndani ya katiba jambo ambalo lililalamikiwa na baadhi ya waumini wa kiislamu.

Aidha waumini hao walisema kutokuwekwa kwa suala hilo katika katiba litasababisha kutokuwa na nguvu kama  ilivyo kwa mabaraza ya Kiisilamu ambayo yamesajiliwa kwa utaratibu wa kawaida lakini hayana uwezo wa 

kisheria.