Serikali ya Zanzibar haikurupuki kuuza majengo yake - Mh. Mzee

NA Khadija Khamis–Maelezo.

Waziri wa Nchi Ofisi ya Rais Fedha Uchumi na Mipango ya Maendeleo Omar Yussuf Mzee (pichani) amesema kuwa Serikali inapofanya maamuzi, ya kuuza Mali au Majengo huuza kutokana na uchakavu wa majengo hayo kwa utaratibu maalumu uliowekwa na Serikali.

Ameeleza kuwa Serikali haikurupuki kuuza majengo yake ila kuna utaratibu maalumu ambao hutumika kwa kukaguliwa na wakaguzi wa Serikali kisha hufanya maamuzi yakinifu .

Hayo aliyasema leo huko katika ukumbi wa Baraza la Wawakilishi Mbweni, Nje kidogo na Mji wa Zanzibar, wakati alipokuwa akijibu suala la Mwakilishi wa Jimbo la Kwamtipura Hamza Hassan Juma ,aliyetaka kujua ukweli wa Jengo la Makao Makuu ya zamani ya Wizara ya Elimu .

Alisema kuwa jengo hilo lililokuwa la Wizara ya Elimu liliyopo Shangani Mjini ni Jengo la zamani ambalo limejengwa kwa kutumia malighafi ya mawe na chokaa kutokana na uchakavu mkubwa wa Jengo hilo Serikali mnamo mwaka 2010 iliamua kuliuza .

Aidha alisema kuwa Jengo hilo limeuzwa kwa Said Salim Awadh Raia wa Tanzania kwa lengo la kuliendeleza na baadae kulitumia kwa mujibu wa sheria na taratibu zilizowekwa .

Waziri huyo alieleza kuwa kuuzwa kwa majengo ya Serikali kunatokana na kujali zaidi usalama wa raia ambao hutumia majengo hayo machakavu,

Akifahamisha utaratibu ambao unafanyika alisema kuwa kabla ya kuuzwa kwa kitu chochote cha Serikali ni lazima kikaguliwe na Mkaguzi Mkuu wa Serikali kisha kutangazwe kwa Tenda , na kwa njia ya Mnada na pia akijitokeza mtu ambae ataomba kukinunua Serikali ikiridhia atauziwa .

Omar alisema kuwa kuuza Majengo ya Serikali kiholela si rahisi kwani Mali zote za Serkali huu.zwa kwa idhini ya Serikali yenyewe .

Jengo hilo la Wizara ya Elimu limeuzwa oktoba 2010 kwa dhamani ya sh Billion moja na nusu za Kitanzania .na Fedha hizo zimewekwa kwenye mfuko maalum wa kujengea Majengo mapya ya Serikali .