MDHIBITI NA MKAUGUZI MKUU WA HESABU ZA SERIKALI WA TANZANIA AKABIDHIWA RASMI 'MIKOBA' YA BODI YA UKAGUZI YA UMOJA WA MATAIFA

Wajumbe wa Bodi ya Ukaguzi ya Umoja wa Mataifa,  UNBOA wakiwa katika picha ya pamoja na  Msimamizi Mkuu wa Ofisi ya Katibu Mkuu wa  Umoja wa Mataifa, Bi Susan Malcora mara baada ya ya Tanzania na Afrika ya Kusini kuachiana kijiti.  Tanzania  ilipitishwa kwa kauli moja na Baraza Kuu la 66 la Umoja wa Mataifa  katika mkutano wake uliofanyika mwishoni mwa mwaka jana, kuwa mjumbe wa Bodi ya  UNBOA ambapo itafanya kazi   na wajumbe wengine wawili ambao ni China na Uingereza

Naibu Mkaguzi Mkuu kutoka Afrika ya Kusini Bw. Thembele Makwetu   akimkabidhi mkoba  Mdhibiti na Mkaguzi Mkuu wa Hesabu za Serikali Bw. Ludovick Utouh,ikiwa ni ishara rasmi ya  Ofisi yake kuingia  katika Ujumbe wa Bodi ya Ukaguzi ya Umoja wa Mataifa.  Mdhibiti na Mkaguzi na Ofisi yake anachukua nafasi inayoachwa wazi na Afrika ya Kusini ambayo imekuwa mjumbe wa Bodi  hiyo kwa miaka  12. Tanzania  kupitia Ofisi ya Mdhibiti Mkuu itashika nafasi hiyo kwa miaka sita.  Wanaopiga  makofi kutoka kushoto ni Mkaguzi Mkuu kutoka Uingereza Bw. Amyas Morse  ambaye naye ni mjumbe wa Bodi na  Bw. Dong Dasheng  jumbe wa Bodi pia na ni  Naibu Mkaguzi Mkuu kutoka China.

Ilikuwa ni furaha tupu kwa   Wakaguzi hawa wawili baada ya kukabidhiana majukumu. Afrika ya Kusini ambayo ndiyo imemaliza muda wake wa Ujumbe katika Bodi hiyo,  imetoa ushirikiano mkubwa  kwa timu ya Tanzania katika kipindi chote  tangu  Tanzania ilipopitishwa  kuwa Mjumbe wa Bodi hiyo mwishoni mwa mwaka jana. Maafisa  kutoka ofisi ya mdhibiti na  mkaguzi mkuu wamefanya kazi bega kwa bega na maafisa wenzao  kutoka Afrika  ya Kusini, ushirikiano ambao umewezesha mchakato mzima kuelekea makabidhiano kufanyika  kwa ufanisi mkubwa sana.

Mhe.Katibu Mkuu Kiongozi, Balozi Ombeni Sefue akizungumza wakati wa makabidhiano hayo ambapo aliiwakilisha Serikali, Balozi Sefue wakati huo akiwa Balozi wa Kudumu wa Tanzania Katika Umoja wa Mataifa, alitoa mchango  Mkubwa katika kuhakikisha kwamba Ofisi ya Mdhibiti na  Mkaguzi Mkuu wa Serikali inapata nafasi hiyo. akizungumza katika  makabidhiano hayo aliwahakikishia wajumbe wa Bodi hiyo kwamba  Serikali ya Jamhuri ya Muungano wa Tanzania inaichukulia nafasi ya  hiyo ya kuwa mjumbe wa kukagua mahesabu na mali za Umoja wa Mataifa   kwa uzito wa hali ya juu sana.

Mdhibiti na Mkaguzi mkuu wa  Hesabu za Serikali Bw. Ludovick Utouh akizungumza wakati  wa  makabidhiano hayo.  Ambapo  pamoja na mambo mengine amesisitiza sana suala la kufanya kazi kwa  ushirikiano na  wadau wote bila ya upendeleo, au kukomoana  na kwamba Tanzania imejipaga vema kulibeba jukumu hilo kwa  hali na mal na kwamba uwezo pia inao.

Ujumbe wa  Tanzania ulioshiriki katika makabidhiano hayo.  Kutoka kushoto ni    Bibi Magdalena Rweyemamu, Bw.  Francis Kitauli, Bw. Edwin  Rweyemamu  anayeteta jambo na   Bw. Ludovick Utouh, Katibu Mkuu Kiongozi,  Balozi Ombeni Sefue,  Bw. Salhina Mkumba na Bw. Athanas Pius.

=====

Na Mwandishi Maalum

Ofisi ya Mdhibiti na Mkaguzi Mkuu wa Hesabu za Serikali ya Jamhuri ya Muungano wa Tanzania,   imekabidhiwa rasmi Ujumbe wa Bodi ya Wakaguzi ya Umoja wa Mataifa ( UNBOA)

Makabidhiano hayo  yamefanyika siku ya  Jumatano hapa Makao Makuu ya Umoja wa Mataifa, katika hafla iliyofanyika mwishoni mwa mkutano wa 66 wa Bodi ya Wakaguzi ya UM.

Katika hafla hiyo Afrika ya Kusini ndiyo iliyoikabidhi Tanzania kijiti hicho.  Makabidhiano ambayo yalishuhudiwa na  Katibu Mkuu  Kiongozi, Mhe. Balozi   Ombeni Sefue ambaye ameiwakilisha Serikali katika makabidhiano hayo.

 Afrika ya  Kusini imekuwa mjumbe wa Bodi kwa miaka 12 na Tanzania itamaliza ngwe yake mwaka 2018

Aidha hafla hiyo  pia ilihudhuriwa na  Bi Suzan Malcora ambaye  ni Msimamizi Mkuu wa Ofisi ya Katibu Mkuu wa Umoja wa Mataifa (Chief de Cabinet). Akimwakilisha Katibu Mkuu wa Umoja wa Mataifa, Mhe. Ban Ki Moon.

Akizungumza wakati wa hafla hiyo iliyowashirikisha pia wajumbe wengine wa bodi ambao ni   Bw. Dong Dasheng akimwakilishi  Mkaguzi Mkuu kutoka Uchina na   Bw. Amyas Morse Mdhibiti na Mkaguzi Mkuu kutoka Uingereza. Mdhibiti  na Mkaguzi Mkuu , Bw. Ludovick   Utouh amewahakikisha wajumbe wenzie pamoja na sekretariati ya Umoja wa Mataifa kwamba Ofisi yake imejipanga vema kulibeba jukumu hilo.

“ Hafla hii ya leo inahitimisha rasmi mchakato mrefu wa makabidhiano ya  jukumu hili, mchakato ulioanza tangu  uteuzi wangu ulipofanyika mwezi Novemba mwaka jana. Ni mchakato unaofungua ukurasa wa kubadilishana mawazo, uzoefu na utaalamu. Kwa niaba ya Nchi yangu, Ofisi yangu na mimi mwenyewe binafsi naomba nitoe shukrani zangu za dhati kwa wajumbe wa Bodi ya UM na  Kamati ya   Operesheni za Ukaguzi” akasema  Bw. Otouh.

Akabainisha kwamba Tanzania inachukua jukumu hilo la kuwa mjumbe wa UNBOA katika kipindi  muhimu, kipindi ambacho UM unapita katika mageuzi makubwa  ya kubadili mifumo  yake ya kiutendaji ikiwamo   kutoka utumiaji wa mfumo  ujulikanao kama  UNSAS kwenda mfumo wa IPSAS.

“ Tunaingia katika bodi hii  katika kipindi ambacho UM inapitia mageuzi makubwa yakiwamo  yale ya kutoka ukaguzi  uliokuwa ukifanyika kila baada ya miaka miwili na  kuingia katika ukaguzi wa kila mwaka”. Akasisitiza Otuoh

Na kuongeza. “ Matokeo ya mageuzi haya maana yake ni kuongezeka kwa  ukubwa wa  kazi kwa upande wa wakaguzi, ogezeko   ambalo litatupasa  si  tu kufanya kazi kwa umakini  mkubwa lakini pia  kutekeleza majukumu mengi na katika muda mfupi”.

Na kwa sababu hiyo, akasema, kwa kutambua uzito na unyeti wa kazi kubwa iliyombele, ndiyo maana baada ya kuteuliwa kwake yeye na maafisa wake walianza  jukumu la kujianda kwa kila hali ili waweze kulitekeleza jukumu hilo kwa ukamilifu na weledi mkubwa.

Akatumia fursa hiyo kuishukuru Ofisi ya  Mdhibiti na Mkaguzi Mkuu wa  Afrika ya Kusini kwa namna ambavyo imetoa ushiriano mkubwa na wa karibu sana,  kuanzia siku ile Ofisi ya  NAOT ilipopitishwa kwa kauli  moja na Baraza Kuu la 66 la  Umoja wa Mataifa kushika wadhifa huo.

Aidha akasema ingawa Afrika ya Kusini imemaliza ujumbe wake, Tanzania itaendelea kushirikiana nayo kwa karibu hasa kwa kuzingatia kwamba kukabidhiwa kwa jukumu hilo hakuhitimishi mchakato mzima wa kuendelea kubadilishana uzoefu na utaalamu.

 Naye Katibu Mkuu Kiongozi, Balozi Ombeni Sefue akizungumza kwa niaba ya serikali, pamoja na kuwashukuru wajumbe wa bodi ya  UNBOA na sekretarieti yake. Amesema Serikali inauchukulia ujumbe huo kwa uzito wa aina yake.

“Nimefurahi sana kuwapo hapa na kuiwakilisha serikali, ninapenda ninawakikishie kwamba, serikali yangu inalipa jambo hilo uzito wa kipekee sana. Heshima  na mchango wa  Tanzania katika Umoja wa Mataifa  unafamika na sasa tunapoingia katika jukumu hili ni dhahiri kwamba tunataka kufanya kazi nzuri hata katika maeneo  mengine  na uwezo huo tunao” akasisitiza.

 Naye  Naibu Mkaguzi na Mdhibiti Mkuu kutoka Afrika ya Kusini Bw.  Thembekile Makwetu akizungumza wakati wa makabidhiano hayo,  amemhakikisha Bw. Utouh na ofisi yake ushirikiano wa karibu na usiotereka. Huku wajumbe wengine wa Bodi nao wakielezea kutoa ushirikiano kwa Tanzani na kuikaribisha kwa moyo mkunjufu.

 Kwa upande wake,  Bi Susan Malcora akizungumza kwa niaba ya Katibu Mkuu wa Umoja wa Mataifa, yeye amesema anaikaribisha Tanzania katika ujumbe wa bodi hiyo kwa mikono miwili  na kusisitiza kwamba ujumbe wa Tanzania katika Bodi hiyo utasaidi sana katika kusukuma mbele ajenda ya uwajibikaji na  udhibiti wa fedha na mali zinazomilikiwa na Umoja wa Mataifa.

Akasema Umoja wa Mataifa, unatambua umuhimu na mchango mkubwa wa Bodi hiyo na kuongeza kwamba itafanya kazi kwa karibu wa wajumbe wa bodi ili kuhakikisha kwamba mageuzi yanayoendelea hivi sasa ndani ya UM yanafanyika kwa ukamilifu na kwamba watazingatia ushauri na maelekezo watakayopewa na Bodi.