Salam za Rambi Rambi kufuatia kifo cha Rais wa Ghana Mh. John Evans Atta Mills

Rais wa Jamhuri ya Muungano wa Tanzania, Mheshimiwa Jakaya Mrisho Kikwete jioni ya jana, Jumanne, Julai 24, 2012, alipokea kwa mshtuko mkubwa, masikitiko na huzuni nyingi taarifa ya kifo cha Rais wa Jamhuri ya Ghana, Mheshimiwa John Evans Atta Mills, kilichotokea mchana wa jana.

Kufuatia taarifa hizo, Mheshimiwa Rais Kikwete, kwa niaba ya wananchi wa Tanzania, Serikali yake na kwa niaba yake mwenyewe amemtumia salamu za rambirambi Makamu wa Rais wa nchi hiyo, Mheshimiwa John Dramani Mahama.

Katika salamu zake za rambirambi kwa Mheshimiwa Mahama, Rais Kikwete amesema: “Tanzania imepokea kwa mshtuko mkubwa, masikitiko na huzuni nyingi taarifa za kifo cha Rais wa Jamhuri ya Ghana, Mheshimiwa John Evans Atta Mills, kilichotokea mchana wa leo (jana)”.

“Kwa niaba ya wananchi wa Tanzania, Serikali yangu na mimi mwenyewe, natuma salamu za rambirambi kwako na kupitia kwako kwa wananchi na familia ya marehemu. Tuko pamoja nanyi katika kipindi hiki cha majonzi kwani ni msiba wetu sote. 

Mimi na Tanzania tumepoteza rafiki mkubwa na Afrika imepoteza kiongozi wa kutumainiwa. Daima tutamkumbuka Rais John Evans Atta Mills kwa msimamo wake thabiti wa kutetea maslahi ya Afrika na watu wake. Hakika tutaukosa mchango wake uliojaa busara na hoja zenye kina, mantiki na ushawishi mkubwa.

Rais Kikwete alimaliza kwa kusema: “Tunaungana nanyi katika wakati huu mgumu wa majonzi kumwomba Mwenyezi Mungu, awape nguvu, moyo wa subira na baraka zake ili muweze kuhimili kipindi hiki cha majonzi. Aidha, tunaungana nanyi kumuomba Mola ampe mapumziko mema marehemu Rais Profesa John Evans Atta Mills. Amen.”

Imetolewa na:

Kurugenzi ya Mawasiliano ya Rais,

Ikulu.

Dar es Salaam.