JENERALI WA UGANDA ASHITAKIWA KWA WIZI WA CHAKULA

Kanali Sam Kirya kushoto na Brigedia Jenerali Michael Ondoga wakiwa kizimbani

Na Swahili TV

Kamanda wa wa zamani wa jeshi Uganda la kulinda amani  nchini Somalia (AMISOM) , Brigedia Jenerali Michael Ondoga, na wenzake wawili ameshitakiwa kwa tuhuma za kuiba na kuuza chakula na mafuta ya wanajeshi wanaotumika katika nchi hiyo. Pia jenerali huyo ameshitakiwa  kwa mashitaka mengine nane  yanayohusiana na utendaji wake.

Akisimama mbele ya mwenyekiti wa mahakama ya kijeshi Brigedia Moses Ddiba Ssentongo, Jenerali Ondoga alisomewa mashitaka yake na mwendesha mashitaka kuwa Jenerali Ondoga anatuhumiwa mnamo mwezi Oktoba mwaka jana, huku akijua  jukumu la kijeshi katika eneo la Afgooye-Baidoa kwa makusudi alipeleka wanajeshi 1000 badala ya 1500 na hivyo kusababisha vifo vya wanajeshi pia alishindwa kutoa maelekezo kwa kamanda wa kundi X kitendo kilichosababisha upotevu wa kifaru na wanajeshi wake.

Kwa mujibu wa hati ya mashitaka, Jenerali Ondoga anatuhumiwa pia kushindwa majukumu yake Oktoba mwaka jana pale  aliposhindwa kushughulikia upungufu wa chakula licha ya malalamiko kutoka kwa makamanda, na pia alishindwa kumudu wanajeshi walio chini yake kitendo kilichopelekea uhamisho wa Kapteni Rubahimbwa aliyekuwa akipingwa kutokana na utendaji dhaifu wa majukumu yake.

Inatuhumiwa pia kuwa  Jenerali alishindwa kuitisha bodi ya uchunguzi ili kuangalia  utoro wa Saameja wake bwana Keneth Mugusha aliyetoroka na  kutorosha lita 15,000 za mafuta kilichohatarisha mipango ya kijeshi ya kikosi chake.

Jenerali Ondoga pia anashitakiwa kuingilia upelelezi kwa kuchukua nyaraka zinazohusiana na uchunguzi na pia kuwadhalilisha walio chini    yake kuhusiana na kuwekwa kizuizini kwa Saameja Coleb Kashumbusha kwa siku saba.
Katika mashitka mengine, Jenerali Ondoga ameunganishwa katika mashitaka na Luteni kanali Sam Kirya ofisa habari  wa zamani wa jeshi la kulinda amani nchini Somalia, kwa kutoa habari za uongo kuhusu  mahali walipo maadui katika miji ya Janale na Sharambot, wawili hao pia wameshitakiwa kwa kushindwa kuzuia ugomvi wa madaraka katika kituo cha Aljazeera.
Hata hivyo Brigedia jenerali Ondogo na wenzake wamekanusha mashitaka, wako rumande hadi novemba 5 mwaka huu.Rais Yoweri Museveni hivi karibuni aliwarudisha nyumbani karibu  maofisa 24 wa jeshi lake akiwepo Ondoga kwa tuhuma za kuuza chakula cha wanajeshi, hatua hiyo ilifuatia uchunguzi wa kitengo cha usalama cha jeshi la Uganda kubaini wizi wa chakula, mafuta na rushwa iliyoshamili katika kikosi maalum cha kulinda amani nchini Somalia.