TANESCO ARUSHA YAWATAHADHARISHA WANANCHI

Na Woinde Shizza Michuzi Tv,Arusha

SHIRIKA la umeme Tanzania (TANESCO)mkoani hapa limewatahadharisha

wananchi kuepuka kufanya shughuli za kibinadamu chini ya miundombinu

ya umeme ikiwemo transfoma,nguzo na nyaya,ikiwa ni pamoja na kukaa

mbali na maeneo ambayo matengenezo ya umeme yanafanyika.

Kadhalika Shirika hilo limewasihi wananchi kuhakikisha kuwa wanatumia wakandarasi wenye ujuzi na waliosajiliwa kufanya kazi za kuchora ramani na kutandaza nyaya za umeme pindi wanapohitaji huduma ya kuunganishiwa umeme.

Afisa uhusiano wa Tanesco,Mkoani hapa,saidy mremi aliyasema hayo jana

alipokuwa akizungumza na waandishi wa habari ofisini kwake alipokuwa

akizungumzia tahadhari ya ajali za umeme kwa wananchi na mali zao.

Alisema kuwa wakati umefika kwa wananchi kutambua madhara makubwa

yanayoweza kujitokeza pindi wasipochukua tahadhari za ajali hizo za

umeme kwani licha ya kuharibu miundombinu ya umeme,pia hupelekea

wananchi kupoteza uhai pamoja na uharibifu wa mali.

“Nawasihi pia waendesha magari yanayobeba mizigo mikubwa na mirefu

wachukue tahadhari pindi wanapopita chini ya maeneo mbalimbali yenye

miundombinu ya umeme,pia wananchi wachukue taadhari kwa vitu

vilivyoguswa na nyaya za umeme zilizoanguka mfano miti,uzio na kamba

za kuanikia nguo”alisisitiza Mremi.

Afisa uhusiano huyo altumia fursa hiyo pia kuwasihi wananchi wanaotaka

kuunganishiwa umeme kufika moja kwa moja katika ofisi za Tanesco kwa

lengo la kuepukana na watu ambao wamekuwa wakijifanya maafisa wa

Tanesco(Vishoka)walioko huko mtaani ambao wamekuwa wakiwarubuni na

kuwatapeli.

Aliongeza kuwa fomu ya kuomba kuunganishiwa umeme hutolewa bure na

shirika hilo,na kwamba gharama za kuunganishiwa umeme zinajulikana

hivyo ni bora wananchi wakafika katika ofisi za shirika hilo zilizopo

katika Wilaya zote za mkoa wa Arusha.