Viongozi wa BAKITA na BAKIZA wafanya kikao cha mashauriano jijini Dar es salaam

Picha ya pamoja ya viongozi wa Baraza la Kiswahili la Taifa (BAKITA)  na wa Baraza la Kiswahili Zanzibar (BAKIZA)  baada ya kikao chao cha mashauriano kilichofanyika makao makuu ya BAKITA Kijitonyama, jijini Dar es salaam. 

Kutoka kulia waliosimama mbele ni Bi Mwanahija  Ali Juma (Katibu Mtendaji - BAKIZA), Dkt.Muhammed Seif Khatib( Mwenyekiti - BAKIZA), Dkt. Selemani Sewangi (Katibu Mtendaji- BAKITA) na Dkt. Method Samwel (Mwenyekiti - BAKITA) na wajumbe wengine.

Mkutano huo ulijadili mambo kadhaa ya mashirikiano ambapo ilisisitizwa kwamba mabaraza hayo mawili yafanye kazi kwa karibu ili kusadia Watanzania kutumia kiswahili kwa ufasaha na usahihi. 

Pia ulikubaliana kwamba wajumbe kutoka pande zote za Muungano wawe wajumbe wa Mabaraza yote mawili ili kuwepo na kiungo thabiti wakati  maneno mapya ya fani na kitaaluma( istilahi) yanapoandaliwa kwa ajili ya matumizi na kwamba ni vyema Mabaraza yote yashirikishwe kwa karibu na kukubaliana kwa maelewano.
Vile vile ilikubaliwa uandaliwe mkutano wa vyama vya Kiswahili  vya Tanzania kwa ajili ya kukiimarisha Kiswahili na kuleta utangamano wa wadau wa lugha hii adhimu.