YANGA WATINGA BUNGENI BILA MSHAMBULIAJI NYOTA MORRISON....SPIKA NDUGAI AWAULIZA YUKO WAPO?

Na Said Mwishehe, Michuzi TV.

KIKOSI cha wachezaji wa timu ya Yanga pamoja a viongozi wao leo Juni 15,2020 wametinga Bungeni ambapo shagwe ziliibuka wakati wakisalimia huku Spika Job Ndugai akiuliza alipo mshambuli mahiri wa timu hiyo Benard Morrison.

Morrison ni yule mchezaji ambaye amejizolea umaarufu tangu alipofanikisha kufunga bao moja dhidi ya watani wao wa jadi Simba katika mchezo wa Ligi Kuu Tanzania Bara ambapo Yanga waliibuka na ushindi.Juzi wakati Waziri wa Fedha na Mipango Dk.Philip Mpango alimtaja wakati akiwasilisha bungeni bajeti kuu ya Serikali.Hali ambayo ilisababisha shangwe kubwa bungeni.

Hata hivyo leo kikosi hicho kimeingia Bungeni bila uwepo wa mshambuliaji huyo ambaye bao lake dhidi ya Simba Waziri wa Fedha analifananisha na mkuki wa sumu.

Wakati anawatambulisha wachezaji hao wa Yanga ,Spika Job Ndugai alisikika akiuliza mahali alipo baada ya kutomuona bungeni wakati wachezaji wengine wakiwa ukumbini humo.

Mchezaji huyo mbali ya kutoonekana leo bungeni, pia hata katika mchezo wao wa juzi dhidi ya Mwadui FC Morrison hakuwepo uwanjani.Pamoja na kutoonekana kwa mchezaji huyo uongozi wa Klabu ya Yanga bado haujasema chochote.Yanga iliwasili Dodoma jana jioni na leo wameenda Bungeni.