WAJASIRIAMALI WASHAURIWA KUTUMIA FURSA ZA MITANDAO YA KIJAMII

Mwezeshaji wa mafunzo akimuelekeza mmoja wa washiriki wa

mafunzo namna ya kuweka bidhaa katika soko mtandao.

Mwezeshaji nwa mafunzo, Faki Othman Faki, akiendelea kutoa mada

kwa washiriki katika mafunzo hayo ambapo amewataka kuwa wabunifu zaidi.

Washiriki wa mafunzo hayo wakiendelea na mafunzo.

Na Gaspary Charles - TAMWA Zanzibar.

WANAVIKUNDI vya ujasiriamali kisiwani Pemba wametakiwa kutumia fursa

ya uwepo wa mitandao ya katika kuongeza wigo wa kutangaza

na kuuza bidhaa zao kupitia soko mtandao.

Akizungumza wakati wa mafunzo ya kuvijengea uwezo vikundi hivyo juu ya

matumizi ya soko mtandao yaliyoandaliwa na Chama cha Waandishi wa Habari Wanawake (TAMWA) Zanzibar mwezeshaji wa mafunzo hayo, Faki Othman Faki amesema ili mjasiriamali aweze kukua kiuchumi ni lazima ajue kutumia fursa ya mitandao ya kijamii.

Amesema uwepo wa mitandao hiyo imerahisisha uwezekano wa mjasiriamali

kuuza na kuwafikia wateja wengi zaidi kwa muda mfupi pasipo kutumia

nguvu kubwa kama ilivyo kwa njia nyingine za utaftaji wa masoko.

“Ni muhimu sana kuchangamkia fursa ya soko mtandao kwani ndiyo sehemu

pekee kwa sasa ambayo inaweza kukutanisha na wateja wengi zaidi na kwa

haraka duniani pasipo kutumia nguvu nyingi,” amesema.

Aidha mwezeshaji huyo alitahadharisha wajasiriamali hao kuachana na

dhana ya kuzalisha bidhaa kwa mazoea kwani kufanya hivyo kutapelekea

kuwakosesha wateja kutokana na bidhaa hizo kukosa mvuto na ubora wa

kushindana na bidhaa nyingine sokoni.

Pia amewasisitiza washiriki wa mafunzo hayo kuzingatia misingi ya

masoko ikiwa ni pamoja na kuimarisha mahusiano na mawasiliano chanya

kwa wateja ili kujenga uaminifu wa wateja kwa bidhaa zao.

Amesema, “Tuache taba ya kuzalisha bidhaa kwa mazoea na badala yake

tujenge misingi ya kuwa na mawasiliano ya karibu na wateja wetu ili

kujua mahitaji yao kwani hii itakusaidia kujua wapi pana hitaji

kuboreshwa ili kuendelea kuaminika zaidi sokoni.”

Mmoja wa washiriki hao, Fadhila Ali Juma ameshukuru kwa

mafunzo hayo kwani itawasaidia kutatua changamoto ya ukosefu wa soko

kwa bidhaa walizokuwa wanazalisha.

“Kiukweli leo nimefurahi sana kupata mafunzo haya kwani kuanzia leo

kikundi chetu tutaanza kutumia fursa hii tuliyooneshwa kwa ajili ya

kuuza bidhaa zetu ambazo ni, Sabuni asilia, Mafuta na majani ya chai

kwani changamoto kubwa inayotukabili ni upatikanaji wa masoko

tunazalisha sana lakini soko ni kikwazo,” amesema.

Mapema afisa mradi wa kuwawezesha wanawake kiuchumi Zanzibar - (WEZA

III) kutoka TAMWA ofisi ya Pemba, Asha Mussa Omar amesema lengo la

kutolewa mafunzo hayo ni kuwapatia mbinu za kuongeza wigo wa

upatikanaji wa soko la kuuza bidhaa zao wanazozalisha ili lengo la

kujikwamua kiuchumi lifanikiwe.

“TAMWA Zanzibar imeamua kutoa mafunzo haya ili yawawezeshe

wajasiriamali wetu kutambua na kuchangamkia fursa zilizopo katika soko

mtandao kwa lengo la kuendelea kujikwamua kiuchumi,” amesema.

Mafunzo hayo ni mwendelezo wa utekelezaji wa mradi wa kuwawezesha

wanawake kiuchumi Zanzibar - (WEZA III) unaotekelezwa na TAMWA

Zanzibar kwa ufadhili wa Milele Zanzibar Foundation.