OLE SENDEKA AWEKA SAWA KAULI YA WAZIRI BITEKO

Askofu msaidizi wa Kanisa Katoliki Arusha mhashamu Prosper Lyimo

(kulia) akiongoza misa ya harambee ya kuchangia ujenzi wa Kanisa

Katoliki Parokia ya Mirerani, wapili kulia ni mgeni rasmi wa harambee

hiyo mbunge wa Jimbo la Simanjiro Christopher Ole Sendeka na Paroko wa

Parokia hiyo Vincent Ole Tendeu, kulia ni mfanyabiashara maarufu wa

madini ya Tanzanite, Siria Meibuko ambapo zilizopatikana shilingi

milioni 50 zilipatikana.

Askofu msaidizi wa Jimbo Kuu Katoliki Arusha, mhashamu Prosper Lyimo

(kulia) akiweka wakfu Kanisa jipya la Parokia ya Mirerani, ambapo

mbunge wa jimbo la Simanjiro Christopher Ole Sendeka (kushoto)

aliongoza harambee na kupatikana shilingi milioni 50.

Mbunge wa Jimbo la Simanjiro Mkoani Manyara, Christopher Ole Sendeka

(mwenye suti nyeusi) akiingia kwenye harambee ya ujenzi wa Kanisa

Katoliki Parokia ya Mirerani, ambapo shilingi milioni 50 zilipatikana.

MBUNGE wa Jimbo la Simanjiro Mkoani Manyara, Christopher Ole SENDEKA

amesema kauli ya Waziri wa Madini Dotto Biteko imelenga kudhibiti

utoroshaji wa madini na siyo kuzuia wachimbaji wadogo wa madini kuwa

na Tanzanite.

Hivi katibuni, Waziri Biteko alitoa agizo la kufuta leseni kwa

wamiliki wa migodi ya Tanzanite na madalali watakaobainika kushiriki

utoroshaji wa madini ya Tanzanite na udanganyifu.

Hata hivyo, wachimbaji hao wadogo wanatakiwa kuuza madini hayo ndani

ya ukuta au kupita nayo lango la ukuta baada ya kulipa kodi kuliko

kuyapitisha kwa wizi na kuingia hatiani.

Ole Sendeka aliyasema hayo wakati akiongoza harambee ya ujenzi wa

kanisa katoliki, jipya la Mji mdogo wa Mirerani, ambapo zilipatikana

shilingi milioni 50 ikiwemo fedha taslimu na ahadi.

Alisema kauli ya Waziri Biteko imetafsiriwa tofauti kwani wanaApolo

ndiyo nguvu kazi ya uchimbaji na hawalipwi mishahara hivyo wanapaswa

kupata mgao kupitia madini.

Alisema baadhi ya wadau wa madini hawakuelewa agizo la Waziri Biteko

ndiyo sababu imesababisha sintofahamu juu ya maslahi ya wanaApolo.

"Lengo ni kuhakikisha kutowepo na wizi wa madini au udanganyifu ila

maslahi ya wanaApolo lazima yaangaliwe kwani wao ndiyo nguvu kazi na

bila hivyo shughuli hazitafanyika," alisema Ole Sendeka.

Alisema ni vyema wamiliki wa migodi wakae kwa pamoja na kuzungumza na

wanaApolo ili wafahamu hatima yao juu ya maslahi ili kuondokana na

sintofahamu iliyopo hivi sasa.

Askofu msaidizi wa jimbo kuu Katoliki Arusha, mhashamu Prosper Lyimo,

akizungumza kwenye harambee hiyo aliwashukuru wote waliojitolea

kuchangia ujenzi wa kanisa hilo.

Askofu Lyimo alisema pindi watu wakutanapo hata chini ya mti kwa lengo

la kusali, kumuomba na kumshukuru Mungu hilo ni kanisa, hivyo

anawapongeza waamini kwa kujitolea ujenzi huo.

"Nawashukuru wote kuanzia mgeni rasmi Ole Sendeka, waamini wote,

jumuiya zote, vyama vya kitume na wadau wote wa maendeleo waliojitolea

kwa ajili ya ujenzi wa kanisa," alisema.

Awali, katibu wa kamati ya ujenzi wa kanisa hilo Raphael Ombade

alisema gharama zitakazotumika kwenye ujenzi huo ni shilingi milioni

900.

Ombade alisema ujenzi wa kanisa hilo utajengwa kwa awamu nne ikiwemo

msingi, ukuta, upauzi na kisha umaliziaji.