Wakazi wa Kitewele,Ludewa wasafirisha wagonjwa kwa Machela za miti kufuata matibabu

Na Amiri Kilagalila,Njombe

Wakazi wa kijiji cha Kitewele chenye jamii za wafugaji,Wavuvi na Wakulima wilayani Ludewa mkoani Njombe wanadai kulazimika kusafirisha wagonjwa kwa machela za miti na mhanzi umbali wa zaidi ya km 32 ili kunusuru maisha ya ndugu zao kutokana na kuwa na barabara ambayo vyombo vya moto haviwezi kupita.

Barabara hiyo inayounganisha vijiji vya Madunda,Kitewele na Nakonde ilichimbwa miaka michache iliyopita kwa mkono na wakazi wa kijiji cha Kitewele chenye wakazi zaidi ya elfu moja huku lengo kuu likiwa ni kufungua mawasiliano ambayo yaliwafanya kuishi kama watu waliojitenga.

Wakipaza sauti katika mkutano wa mbunge wa Ludewa wenye lengo la kusikiliza kero za wananchi akiwemo Beno Lwiva na Kasilida Haule wanasema katika kijiji chao kuna zahanati lakini haifikiki vyombo vya moto hivyo endapo mgonjwa analetwa ama kupata rufaa hulazimika kutengeneza machera za miti na kisha kutembea umbali mrefu hali ambayo inasababisha baadhi yao kupoteza maisha wakiwa njiani hivyo wanaomba serikali ione umuhimu wa kuunga mkono jitihada walizofanya kwa kurekebisha barabara hiyo.

Mbali na ubovu wa barabara kuhatarisha uhai wa wagonjwa lakini pia wakazi hawa wanasema imeathiri kwa kiasi kikubwa uchumi wa kijiji hicho kwani soko la mazao limekufa kabisa.

"Ndugu zetu wengi wanapoteza maisha kwasababu ya ubovu wa barabara hii,tunabeba kwenye machera za miti ya mianzi kupeleka wapendwa wetu hospitali ya Wilaya Luddewa na Milo hivyo tunaomba mtusaidie mh Mbunge" Alisema Beno Lwiva

Ukitolewa Ufafanuzi kuhusu  hatua zinazokwenda kuchukuliwa ili kumaliza adha hiyo na kunusuru maisha ya wagonjwa,kilimo na sekta ya biashara katika ukanda huo Meneja wa TARURA wilaya ya Ludewa Enhad Willa amesema tayari ameitazama barabara hiyo na kuelewa maeneo yote korofi hivyo ili iweze kukarabatiwa inapaswa kusajiliwa kwenye barabara za TARURA  ndipo mwaka ujao itengewe bajeti ya kutosha

Nae mbunge wa Ludewa Mbunge Joseph Kamonga wakati akieleza anachokwenda kufanya ili kumaliza kero alizopokea ikiwemo ya pembejeo,umeme,barabara,elimu na afya akasema anakwenda kuanza na kutoa bati 40 kwa ajili ya ujenzi wa nyumba ya kisasa ya mwalimu katika shule ya msingi Kitewele huku suala la barabara akitaka tarura ilipe uzito mkubwa .

Kuhusu bei ya mazao na pembejeo Kamonga akasema tayari suala hilo amelisemea bungeni limeanza kupatiwa ufumbuzi kwa serikali kuanza kununua mahindi kwa wakulima na kisha kuanza ujenzi wa kiwanda cha mbolea mkoani Dodoma.

"Ninachokiomba kwenu TARURA suala la barabara hii ya Madunda,Kitewele na Makonde ifanyiwe kila jitihada ikamilike kwani wananchi wanateseka sana hapa ,haiwezekani kijiji kina wakazi zaidi ya elfu moja  kikose barabara ya uhakika .