UWT yazindua mradi wa mashine kuwasaidia wananchi na jumuiya Wanging’ombe

 

Na Amiri Kilagalila,Njombe

 

Wakazi wa kijiji cha Itambo kata ya Mdandu wilaya ya Wanging'ombe mkoani njombe wameondokana na changamoto ya gharama kubwa na kusafiri umbali mrefu kwenda kufuata huduma ya kukoboa na kusaga nafaka baada ya jumuiya ya wanawake Tanzania (UWT) wilayani humo  kuzindua rasmi mradi wa mashine ya kukoboa na kusaga nafaka katika kijiji hicho.

 

Mwenyekiti wa UWTt mkoa wa Njombe Scolastika Kevela amesema jitihada za viongozi mbalimbali akiwemo katibu wa siasa na uenezi CCM mkoa wa Njombe Erasto Ngole zimesaidia sana kufanikisha mradi huo huku mjumbe wa baraza la wanawake ccm taifa mkoa Anna Mwalongo akitaka wanawake wa Wanging'ombe kuutunza mradi huo ili uwaongezee kipato.

 

“Unapokuwa kiongozi wa mkoa hatuiangalii Wangi’ombe tu,huyu kiongozi anazunguka mkoa mzima kwa kweli sisi UWT tunamshukuru sana Mwenezi,leo tumepata kiwanda hiki kidogo ili kuinua uchumi wetu tunaomba mkitunze”alisema Scolastika Kevela

 

Taarifa ya mradi huo iliyosomwa na kaimu katibu wa UWT wilaya ya Wanging'ombe ambaye ni diwani wa viti maalum tarafa ya Mdandu Vumilia Kilamlya imeeleza kuwa hadi kukamilika kwake umetumia zaidi ya shilingi milioni sita.

 

Akizindua mradi huo katibu wa siasa na uenezi CCM mkoa wa Njombe Erasto Ngole ametaka jitihada hizo zioneshe matokeo chanya ili waweze kupewa motisha zaidi huku akionya suala la migogoro ndani ya jumuiya hiyo kauli iliyoungwa mkono na mwenyekiti wa UWT wilaya ya Wanging'ombe bi. Christina Sanga.

 

“Nitataka hesabu za kipindi cha mwaka mmoja ili nione kama mashine imezalisha vizuri na kwamba sasa mnastahili kupata Piki Piki,kwasababu palipo na akina kuna maneno, nah ii mashine pia inaweza ikawafarakanisha kwa hiyo tuwachugue watu wachache wenye uchungu waisimamie mashine yetu”alisema Erasto Ngole

 

Wakizungumza baada ya kuzinduliwa kwa mradi huo baadhi ya wakazi akiwemo Edina Mwagala  na Tumain Ngilangwa wanakiri kuwa sasa adha ya kutembea umbali mrefu kwenda kufuata huduma ya unga itapungua kwa kuwa mashine moja iliyokuwapo ilikuwa na foleni ndefu na pindi inapoharibika mateso ndipo yanapoanza.

 

Mradi wa mashine ya kusaga na kukoboa unatajwa kwenda kuwainua wanawake hao kiuchumi endapo watauendeleza vyema.

Katibu wa siasa na uenezi mkoa wa Njombe Erasto Ngole akikata utepe wa jengo la kuingia kwenye mashine ya kusaga na kukoboa nafaka inayomilikiwa na UWT

Katibu wa siasa na uenezi mkoa wa Njombe Erasto Ngole akiweka mahindi kwenye mashine kuonyesha ishara ya mashine hiyo kuanza kufanya kazi rasmi.

 

Mwenyekiti wa UWT mkoa wa Njombe Scolastika Kevela akiwaomba wanawake wa UWT kutunza mradi huo ili uwasaidie katika maswala ya uchumi