WANYAMA PORI ZAIDI YA 200 WALIOKUWA ENEO TENGEFU MTO WA MBU WAHAMISHIWA HIFADHI YA TARANGIRE

Na Pamela Mollel,Arusha

Wanyamapori zaidi ya 200 waliokimbilia eneo la pori tengefu la mto wa Mbu yaliyopo makazi ya watu kutokana na ziwa Manyara kujaa maji na kuongezeka wadau wa uhifadhi wameanzisha zoezi maalumu la kuwakamata na kuwahamishia hifadhi jirani ya Tarangire ili kuwanusuru wanyama hao wasidhuru binadamu au wao kudhuriwa na majangili

Akizungumza na waandishi wa habari katika oparesheni hiyo inayofanyika eneo la mto wa mbu,Afisa Uhifadhi Mwandamizi tiba ya wanyamapori kutoka Tanapa Idrissa Chuma alisema zoezi la kuhamisha wanyama hao lonaendelea na tayari wameshahamisha wanyama takribani 200 kati ya 270 walioingia katika eneo hilo

"Zoezi lilianza rasmi tarehe 10/12mwaka huu tumeanza kuwakamata wanyama aina ya Punda milia na tayar tumekamata 8 kwa leo wapo ndani ya lori maalumu la kuhamishia wanyama "alisema Chuma

Alisema ili kuweza kuwakamata nilazima watumie dawa ya usingizi alafu baada ya muda huwapa dawa ya kuwazinduwa ili waweze kusimama wima kwaajili ya safari kuelekea hifadhi ya Tarangire

Pia alitaja sababu ya wanyama hao kukimbilia katika makazi ya watu ni changamoto ya ziwa kujaa maji na wanyama kusukumwa kuja katika maeneo ya makazi kutokana na eneo lao walilokuwa wakitumia kama sehemu ya malisho kuwa finyu

"Kutokana na changamoto hiyo mamlaka za usimamizi wa wanyama pori wameunganisha nguvu ya pamoja ili kunusuru wanyama hao"alisema Chuma

Wadau hao wa uhifadhi walifanya utafiti wa kina kujua idadi ya wanyama lakini pia kujua sababu za wanyama hao kutoka hifadhini na baadae waligundua sababu kubwa ni ziwa manyara kujaa maji

Hifadhi ya Tarangire inasifika sana kwa idadi kubwa ya nyumbu wanaohama kati ya Tarangire na kwenda eneo Silale mpaka Simanjiro

"Pundamilia wapo katika hifadhi ya tarangire na wanaonganishwa na shoroba na wanyama hawa vina saba vyao vinafanana"alisema Chuma

Baada ya wanyama hao kufika katika hifadhi ya Tarangire watakuwa katika uangalizi maalumu ili kujua mwenendo mzima wa wanyama hao

Mkazi wa eneo hilo wanapohamishwa wanyama hao Pascalina Daniel amepongeza zoezi hilo kwa kuwa uwepo wa wanyama hao ndani ya makazi ni hatari kwa binadamu

"Sasa hivi sisi kina mama hatuendi tena kujishughulisha tukihofia kuwaacha watoto peke yao usalama umekuwa mdogo lakini leo tumefurahi kuona wanyama hawa wanakamatwa"alisema Pascalina

Kwa upande wake mwikolojia Mkuu wa Hifadhi ya Manyara Rehema Kaitala alisema wanyama hao baada ya kukamatwa watafungwa kola maalumu kwajili ya kufatilia na kujua mwenendo mzima wa wanyama hao sambamba na kuchukua sampuli itakayowezesha kujua afya zao pamoja na kuwa na sampuli kwaajili Tafiti

Aliongeza kuwa uwepo wa wanyama hao katika makao yao mapya ya Tarangire haitawaathiri kwakuwa wanyama hao wanafanana kijenetiki

"Hapa eneo la Matete kuna mto ambao unatiririsha maji hata kipindi cha kiangazi hivyo wanyama hawatapata shida ya maji na malisho"alisema Kaitala

Naye Daktari wa wanyama na mtafiti kutoka taasisi ya wanyamapori Tawiri Dkt,Mikidadi Mtalika alisema kuwa zoezi hilo linakwenda vizuri japo linachangamoto mbalimbali ikiwemo madawa kuchelewa kufika kwa wakati

"Zoezi hili linaendeshwa kwa gharama kubwa lakini pia linahitaji muda rasilimali watu ili kufanikisha kwa wakati"alisema Mtalika

Afisa Muhifadhi Mkuu idara ya mawasiliano Tanapa Mohammed Kiganja alisema kuwa mbali na zoezi hilo kuwa na changamoto mbalimbali wao kama hifadhi wataendelea kuhakikisha wanyama wote walioingia katika makazi ya binadamu wanahamishwa na ndani ya siku 14 zoezi hilo litakuwa limekamilika

Zoezi la kuhamisha wanyama kwenda hifadhi ya Tarangire linaendeshwa na wadau wa uhifadhi Tanapa,Tawiri na Tawa

Zoezi la kuhamisha wanyama waliokimbilia eneo tengefu  la mto wa mbu likiwa linaendela,wanyama  hao wanahamishiwa hifadhi ya Tarangire

Afisa muhifadhi mkuu idara ya mawasiliano Tanapa Mohammed Kiganja aakieleza namna zoezi hilo litakavyohakikisha wanyamapori wote wanahamishwa kama lilivyokusudiwa

Wanyamapori  aina ya pundamilia wakitoka katika lori maalumu la kuhamishia wanyama wakiingia katika makao yao mapya ya  hifadhi ya Tarangire

Daktari wa wanyama  na mtafiti kutoka  taasisi ya  Tawiri Mikidadi Mtalika akiandaa dawa maalumu zinazotumika katika zoezi la kuwakamata wanyama hao

Afisa Uhifadhi  Mwandamizi tiba ya wanyamapori  kutoka Tanapa Dkt,Idrissa Chuma akiongea na waandishi wa habari juu ya  zoezi hilo

Mwikolojia  Mkuu  kutokana hifadhi ya  manyara  Rehema      Kaitala akionyesha kola maalumu inayotumika kufatilia mwenendo mzima wa wanyama hao wakiwa katika hifadhi ya Tarangire

Mkazi wa eneo la mto wa Mmbu Pascalina Daniel  apongeza zoezi hilo la kuhamisha wanyama