MAJALIWA AWEKA JIWE LA MSINGI UJENZI SHULE YA SEKONDARI WASICHANA MARGARET SITTA

 Waziri Mkuu Kassim Majaliwa leo Septemba 9, 2022 ameweka jiwe la msingi la ujenzi wa Shule ya Sekondari ya Wasichana Magreth Sitta iliyopo Urambo  mkoa wa Tabora. Pichani, Waziri Mkuu akiweka jiwe la msingi na wengine kutoka kushoto ni Waziri wa nchi Ofisi ya Rais TAMISEMI, David Silinde, Balozi wa Japan nchini  Yasushi Misawa, Mbunge wa Urambo Magreth Sitta na kulia ni Mkuu wa Mkoa wa Tabora, Balozi Dkt. Batilda Burian.

Waziri Mkuu, Kassim Majaliwa akiwaaga wanafunzi baada ya kuweka jiwe la msingi la ujenzi wa Shule ya Sekondri ya wasichana Margaret Sitta iliyopo Milambo mkoa wa Tabora, Septemba  9, 2022. 

(Picha na Ofisi ya Waziri Mkuu

*Waziri Mkuu afurahishwa na mchango wa  JTI Leaf 

WAZIRI Mkuu Kassim Majaliwa Majaliwa ameipongeza Kampuni ya JTI Leaf Services kwa mchango wake katika ujenzi wa shule ya bweni ya wasichana katika kata ya Urambo, Wilaya ya Urambo Mkoani Tabora.

Mh. Majaliwa ametoa pongezi hiyo baada ya kuweka jiwe la msingi katika ujenzi wa Shula ya Sekondari ya Margaret Sitta huku akiongozana na Balozi wa Japan nchini Mh. Yasushi Misawa.

Alimpongeza Balozi huyo kwa mchango wa nchi yake kwa Tanzania. “Nchi yake imeendelea kudumisha mahusiano mazuri kwa kuleta makampuni kama JTI Leaf ambayo mbali na kununua tumbaku kwa wingi, wamekuwa wakishiriki katika miradi ya maendeleo,” alisema.

Alisema ujenzi wa shule hiyo ya wasichana ni ukombozi mkubwa kwa wananchi wa Urambo lakini pia kwa watanzania kwa ujumla. “Hii ni zawadi kubwa kwa wananchi wetu na ni heshima kubwa kwangu kuja kuweka jiwe la msingi pamoja na Balozi,’alisema.

Kwa upande wake, Balozi Misawa alisema nchi yake itaendelea kushirikiana na Tanzania katika miradi mbalimbali ya maendeleo katika jamii.

“Naiopongeza JTI Leaf kwa kuendelea kuwekeza katika jamiina naahidi kuwa serikali ya Japan itaendelea kushirikiana na serkali ya Tanzania katika masuala mbalimbali ya maendeleo,” alisema Balozi.

Naye Mbunge wa Urambo Mh. Margaret Sitta alisema shule hiyo ambayo ujenzi wake bado unaendelea, itasaidia kuwanusuru wanafunzi wa kike ambao wamekuwa wakikatiza masomo kwa sababu ya ujauzito.

Aliishukuru Kampuni ya JTI Leaf kwa kuwa mstari wa mbele kuhakikisha shule hiyo inajengwa na pia aliipongeza serikali kwa kutoa eneo na watalaamu wa mradi huo.