DC MATINYI WA TEMEKE AUNGANA NA TAASISI YA AL-HIKMA KUMSAIDIA MLEMAVU

 

  NA MWANDISHI WETU, TEMEKE

Mkuu wa Wilaya ya Temeke, Mhe. Mobhare Matinyi, ameungana na viongozi kadhaa kuhudhuria hafla ya ufungaji ndoa 70 iliyofanyika katika ukumbi wa Taasisi ya Al Hikma ya Chang'ombe wilayani Temeke, jijini Dar es Salaam.

Mhe. Matinyi ambaye alikuwa alikuwa akimwakilisha Mkuu wa Mkoa pia alitangaza kumpatia bwana harusi mmoja mlemavu wa miguu, Ally Kundi, sh. 200,000/- kila mwezi kwa mwaka mzima zikiwa ni za mafuta ya Bajaj aliyozawadiwa kwa kushtukizwa na Taasisi ya Al Hikma iliyoandaa hafla hiyo.

Taasisi hiyo inayoongozwa na Sheikh Nurdìn Kishki ilimzawadia Bajaj hiyo Kundi, maarufu zaidi kwa jina la Babu Ally, ili kumkomboa kiuchumi. Bajaj hiyo ina thamani ya shilingi milioni 9.8.

Awali mara tu baada ya kuipokea zawadi hiyo huku akitokwa machozi ya furaha, alishangaa tena kusikia viongozi wanne waliohudhuria hafla hiyo akiwemo Mstahiki Meya wa Jiji la Dar es Salaam, Omar Kumbilamoto, wakimpatia shilingi milioni mbili za gharama ya mafuta ya kuanzia biashara yake.

Babu Ally ambaye ni mkazi wa Mwembe Yanga wilayani Temeke, alikuwa akiendesha Bajaj jijini Dar es Salaam kwa kupeleka hesabu za jioni kila siku.

Hafla hiyo ilihudhuriwa na waumini wa kiislamu zaidi ya 500 wakiongozwa na Sheikh Mkuu wa Tanzania, Mufti Abubakar Zuberi, huku mgeni rasmi akiwa Naibu Spika wa Bunge la Muungano, Mhe. Hassan Zungu.

Mbali ya kutoa salamu za serikali, Mhe. Matinyi pia alikabidhi zawadi kwa wadhamini watatu wa shughuli hiyo iliyofuatiwa na chskyla cha mchana.

Kwa mujibu wa Sheikh Kishki, hii ni mara ya kwanza kwa ndoa 70 katika dini ya kiislamu kufungwa hapa nchini kwa pamoja.

Mmoja wa maharusi Bw. Ally Kundi, maarufu Babu Ally, akimshukuru Mwenyezi Mungu baada ya kupewa msaada wa Bajaj na Mafuta ya kuendesha Bajaj hiyo kwa mwaka mzima. Msaada huo ulitolewa na Mkuu wa Wilaya ya Temeke, Mhe. Mobhare Matinyi kwa kushirikiana na Taasisi ya Al-Hikma ambayo ndiyo iliyoandaa hafla hiyo.

Babu Ally (kushoto) akiiangalia bajaj aliyokabidhiwa.

Mkuu wa Wilaya ya Temeke jijini Dar es Salaam, Mhe. Mobhare Matinyi akizingumza kwenye hafla hiyo.